Read Hmong Njua Cov Thawjtswj 6 Bible Online

Cov Thawjtswj 6 - Hmong Njua bible

Cov Thawjtswj 6

¹Cov Yixalayees rov ua txhum rua tug TSWV dlua, yog le ntawd, tug TSWV txhaj muab puab cob rua cov Midias kaav tau xyaa xyoo.

²Cov Midias muaj zug tshaaj cov Yixalayees. Cov Yixalayees txhaj tsiv moog nkaum cov Midias rua huv tej qhov tsua hab khawb qhov aav nkaum sau tej roob.

³Txhua zag kws cov Yixalayees cog puab tej qoobloo, cov Midias nrug cov Amalej hab tej tsaav tuabneeg kws nyob tom taj suabpuam tuaj tua puab.

⁴Puab tuaj tsuam yeej nyob rua huv lub tebchaws hab muab cov Yixalayees tej qoobloo ua puamtsuaj taag moog txug ndlua nraag saab qaabteb kws nyob ibncig lub nroog Nkaxas. Puab caab taagnrho cov Yixalayees tej yaaj, tej nyuj hab tej neeg luav huv tuabsi lawm, tsi tseg ib yaam dlaabtsi rua cov Yixalayees le.

⁵Cov Midias caab puab tej tsaj txhu hab kwv puab tej tsevntaub ua kev zawv tuaj coob npaum nkaus le kooj txomfaav. Puab hab puab tej ntxhuav coob heev suav tsi txheeb le. Puab tuaj ua rua lub tebchaws lamsim taag.

⁶Cov Yixalayees tsi muaj zug tawmtsaam tau cov Midias hlo le.

⁷Ces cov Yixalayees txhaj quaj thov tug TSWV paab puab tawmtsaam cov Midias,

⁸tug TSWV txhaj khaiv ib tug cevlug coj tug TSWV kws yog cov Yixalayees tug Vaajtswv tej lug lug has rua cov Yixalayees has tas, “Kuv tau coj mej tawm ntawm txujkev ua qhev nraag tebchaws Iziv lug.

⁹Kuv cawm mej dlim ntawm cov tuabneeg Iziv hab cov tuabneeg kws pheej tuaj tua mej huv lub tebchaws nuav. Kuv muab puab ntab tawm taabmeeg mej, hab kuv muab puab lub tebchaws pub rua mej nyob.

¹⁰Kuv tub qha rua mej has tas, kuv yog tug TSWV kws yog mej tug Vaajtswv, kuas mej tsi xob moog pe cov Amaules kws nrug mej nyob huv lub tebchaws nuav tej vaajtswv. Tabsis mej yeej tsi noog kuv tej lug hlo le.”

¹¹Ces tug TSWV tug timtswv txawm lug rua huv lub zog Aufelas, hab lug nyob ntawm Yau-as tsob qaab ntoo qheb, Yau-as yog Anpi-exes cuab kwvtij. Nwg tug tub Nkide-oos taabtom ntaus nplej huv lub chaw tsuam txiv maab, kuas cov Midias tsi xob pum nwg.

¹²Tug TSWV tug timtswv lug rua Nkide-oos pum ntawm qhov chaw ntawd hab has tas, “Tug txivneej sab tawv hab muaj zug, tug TSWV nrug nraim koj nyob.”

¹³Nkide-oos has rua tug timtswv has tas, “Kuv thov nug koj, yog has tas tug TSWV nrug nraim peb nyob tag, ua le caag peb pheej raug kev txomnyem ua luaj? Tug TSWV tej txujci tseemceeb kws thaus peb cov yawmkoob ibtxwm pav qha rua peb has tas, Tsi yog tug TSWV coj peb tawm nraag tebchaws Iziv lug los? Tej ntawd nyob qhov twg lawm? Tabsis nwgnuav tug TSWV muab peb tso povtseg, hab muab peb cob rua cov Midias teg lawm.”

¹⁴Ces tug TSWV txhaj has rua Nkide-oos has tas, “Koj ca le muab koj tug zug luj zug nchaav moog tso cov Yixalayees kuas dlim ntawm cov Midias txhais teg. Kuv yog tug kws khaiv koj moog ntaag.”

¹⁵Nkide-oos teb has tas, “Tug TSWV, kuv yuav ua le caag moog tso tau cov Yixalayees? Kuv cuab kwvtij yog ib cuab kws tsawg heev nyob huv xeem Manaxes, hab kuv yog tug kws tsi tseemceeb nyob huv kuv tsev tuabneeg.”

¹⁶Tug TSWV teb has tas, “Koj yeej muaj peevxwm ua tau xwb, rua qhov kuv yuav paab koj. Koj yuav ntaus tau cov Midias yoojyim ib yaam le puab yog tuab leeg xwb.”

¹⁷Nkide-oos teb has tas, “Yog koj txaus sab rua kuv, koj ca le ua tej yaam qha rua kuv has tas, koj yog tug TSWV tag.

¹⁸Thov koj tsi xob maaj moog, ca kuv coj zaub mov tuaj fij rua koj tsaiv.” Tug timtswv teb has tas, “Kuv yuav nyob ntawm nuav tog txug thaus koj rov qaab tuaj.”

¹⁹Yog le ntawd, Nkide-oos txhaj moog rua huv nwg tsev, nwg muab ib tug thaav tshis tua ua zaub hab muab cov moov nplej huv lub tawb zuaj ua ib cov ncuav tsi xyaw keeb. Nwg muab cov nqaj tso rua huv tawb hab muab cov kua nqaj tso rua huv laujkaub, nwg nqaa tej zaub mov ntawm moog rua tug TSWV tug timtswv huv qaab tsob ntoo qheb, hab muab tej zaub mov ntawd rua nwg.

²⁰Tug timtswv has rua Nkide-oos has tas, “Muab cov nqaj hab cov ncuav tso rua sau lub pobzeb nuav hab muab cov kua laub ywg cov nqaj hab cov ncuav ntawd.” Nkide-oos txawm ua le ntawd.

²¹Ces tug TSWV tug timtswv txawm muab tug paas nreg kws nwg tuav rawv ntawm teg moog twb nkaus cov nqaj hab cov ncuav. Ces suavtawg txawm cig plawg huv lub pobzeb tuaj kub cov nqaj hab cov ncuav ntawd. Ces tug timtswv txawm pluj ndlais lawm.

²²Nkide-oos txhaj paub tseeb has tas, nwg tau pum tug TSWV tug timtswv lawm tag, nwg txhaj has lug ntshai tshee nyo has tas, “Tug TSWV kws kaav txhua tsaav yaam, kuv tau pum koj tug timtswv tim ntsej tim muag lawm tag!”

²³Tabsis tug TSWV has rua nwg has tas, “Koj ca le kaaj sab. Tsi xob ntshai. Koj yuav tsi tuag.”

²⁴Nkide-oos txawm ua tau ib lub thaaj rua tug TSWV ntawm thaaj chaw ntawd, hab tis npe hu ua, “Tug TSWV Yog Tug Muaj Kev Kaaj Sab.” (Lub thaaj ntawd yog Anpi-exes cuab kwvtij tug, hab tseem nyob huv lub zog Aufelas lug txug naj nub nua.)

²⁵Mo ntawd tug TSWV lug has rua Nkide-oos has tas, “Ca le moog caab koj txiv tug txiv nyuj hab caab dlua ib tug txiv nyuj kws noobnyoog muaj xyaa xyoo tuaj, muab koj txiv lub thaaj teev Npa-aas tsoo hab muab tug ncej dlaab Aselas kws txhus rua ntawm lub thaaj ib saab ntuv povtseg.

²⁶Ua ib lub thaaj kuas ruaj khov rua tug TSWV kws yog koj tug Vaajtswv rua sau lub ncov roob nuav. Ces caab tug txiv nyuj kws yog tug ob lug tua hab muab hlawv taagnrho rua sau ua khoom fij, muab tug ncej dlaab Aselas kws koj ntuv ntawd ua tawg rauv ntaag.”

²⁷Yog le ntawd, Nkide-oos txhaj coj nwg cov tubkhai kaum leej nrug nwg moog hab ua lawv le tug TSWV has kuas nwg ua. Nwg ntshai nyob tsaam nwg tsev tuabneeg hab cov tuabneeg kws nyob huv nroog pum nwg rhuav lub thaaj thaus nruab nub, nwg txhaj moog rhuav lub thaaj thaus tsaus ntuj.

²⁸Thaus kaaj ntug tej tuabneeg zej zog sawv ntxuv tuaj, puab pum tuabneeg tub muab lub thaaj kws teev Npa-aas hab tug ncej dlaab Aselas tsoo tawg taag lawm, hab tub muab tug txiv nyuj kws yog tug ob tua hlawv rua sau lub thaaj kws ua tshab lawm.

²⁹Puab sis nug zum zawg has tas, “Leejtwg yog tug ua le nuav?” Puab nug hab taug, ua cav yog Yau-as tug tub Nkide-oos rhuav tej ntawd ntaag.

³⁰Ces puab txawm moog has rua Yau-as has tas, “Coj koj tug tub tawm tuaj nrau nuav, peb muab nwg tua povtseg saib! Rua qhov nwg muab lub thaaj kws teev Npa-aas rhuav hab muab tug ncej dlaab Aselas kws txhus rua ntawm lub thaaj ib saab ntuv povtseg lawm.”

³¹Tabsis Yau-as has rua puab txhua tug kws sawv ntawm nwg xubndlag has tas, “Mej tuaj Npa-aas tog tshev kuv los? Mej paab Npa-aas los? Txhua tug kws tuaj Npa-aas tog, yuav raug tua tuag ua ntej kaaj ntug. Yog has tas Npa-aas yog vaajtswv tag, ca nwg paab nwg xwb. Lub thaaj kws muab rhuav ntawd tub yog nwg lub los sav.”

³²Ces txij thaus ntawd lug suavdlawg txawm muab Nkide-oos hu ua Yelunpa-aas, rua qhov Yau-as has tas, “Ca Npa-aas paab Npa-aas xwb; lub thaaj kws muab rhuav lawm tub yog nwg lub.”

³³Ces taagnrho cov Midias, cov Amalej, hab tej tsaav tuabneeg kws nyob saab nubtuaj sau hlo ua ke hlaa tug Dlej Yauladees tuaj tsuam yeej rua huv lub Haav Yexelees.

³⁴Tug TSWV tug ntsujplig lug kaav hlo Nkide-oos, ces nwg txawm tshuab raaj tshuab xyu hu cov txivneej kws yog Anpi-exes cuab kwvtij tuaj nrug nwg moog.

³⁵Nwg khaiv tuabneeg moog hu Xeem Manaxes Saab Nubtuaj hab saab Nubpoob tuaj nrug nwg moog. Nwg khaiv tuabneeg moog hu xeem Aseles, Xenpuloos hab Nathalis, puab puavleej tuaj nrug nwg moog huv tuabsi.

³⁶Ces Nkide-oos has rua tug TSWV has tas, “Koj tau has tas koj yeej pum zoo khaiv kuv moog cawm cov Yixalayees.

³⁷Yog le ntawd, kuv yuav muab mivntsiv plaub yaaj coj moog tso rua huv aav ntawm lub chaw kws peb ntaus nplej. Yog thaus sawv ntxuv, lwg ntsu rua cov plaub yaaj, tabsis tsi ntub rua cov aav, ces kuv txhaj yuav paub has tas, koj siv kuv moog cawm cov Yixalayees tag.”

³⁸Ces txawm muaj lawv le ntawd tag. Thaus kaaj ntug Nkide-oos moog nqaa cov plaub yaaj lug, hab muab tsu, ua cav dlej si laim lug puv nkaus taig.

³⁹Nkide-oos has rua Vaajtswv has tas, “Thov koj tsi xob chim rua kuv; ca kuv has ib lus ntxiv hab tsaiv. Thov ca kuv rov qaab muab cov plaub yaaj sim dlua ib zag ntxiv hab. Zag nuav ca cov plaub yaaj qhuav hab ca cov aav ntub lwg.”

⁴⁰Mo ntawd Vaajtswv ua txhua yaam le ntawd tag. Taagkig kaaj ntug cov plaub yaaj yeej qhuav qhawv, tabsis cov aav ntub lwg taag.