Read Hmong Njua Cov Thawjtswj 7 Bible Online

Cov Thawjtswj 7 - Hmong Njua bible

Cov Thawjtswj 7

¹Muaj ib nub Nkide-oos hab nwg cov tubrog sawv ntxuv moog tsuam yeej rua ntawm lub qhovdlej Halaus. Tabsis cov Midias tub tuaj tsuam yeej nyob rua ntawm lub haav kws nyob ze ntawm lub Ncov Roob Maules saab peg lawm.

²Tug TSWV has rua Nkide-oos has tas, “Koj cov tuabneeg coob dlhau hwv lawm, yog kuv ca puab tua yeej cov Midias, nyob tsaam puab yuav khaav has tas, yog puab moog tua yeej xwb. Puab yuav tsi ncu txug has tas yog kuv paab puab.

³Koj tshaajtawm rua suavdlawg has tas, ‘Yog leejtwg ntshai, tug ntawd ca le rov moog tsev, hab peb yuav nyob ntawm lub Roob Nkile-as nuav.’ ” Yog le ntawd, muaj neeg nkaum ob txheeb leej txhaj rov qaab moog tsev lawm, tshuav kaum txheeb leej nyob lawm xwb.

⁴Ces tug TSWV has rua Nkide-oos has tas, “Koj tseem tshuav tuabneeg coob heev hab. Coj puab nqeg moog lawm nraag haav dlej, nyob nraag kuv yuav xaiv puab rua koj. Yog kuv kuas tug twg nrug koj moog, nwg yeej yuav moog. Yog kuv kuas tug twg tsi xob moog, nwg yeej yuav tsi moog.”

⁵Nkide-oos txhaj coj cov tuabneeg ntawd nqeg moog rua nraag haav dlej, hab tug TSWV has rua nwg tas, “Muab cov kws hlauv nplaig moog yaim dlej le dlev, cais tawm ntawm cov kws txhus caug nyo moog haus dlej.”

⁶Cov kws nyo hab muab phoov teg cug dlej lug haus muaj peb puas leej; dlua le cov puavleej txhus caug nyo moog haus dlej xwb.

⁷Tug TSWV has rua Nkide-oos has tas, “Kuv yuav paab koj hab pub kuas koj coj peb puas leej kws muab teg cug dlej lug haus ntawd moog tua yeej cov Midias. Dlua le cov, ces kuas puab rov qaab moog tsev huv tuabsi.”

⁸Yog le ntawd, Nkide-oos txhaj tso cov Yixalayees rov qaab moog tsev, tsuas tseg peb puas leej ntawd nrug nwg xwb, hab puab khaws taagnrho tej zaub mov hab tej raaj tej xyu ca. Cov Midias lub yeej nyob huv haav.

⁹Mo ntawd tug TSWV has rua Nkide-oos has tas, “Ca le sawv hab moog tua cov Midias lub yeej; kuv yuav pub kuas koj tua yeej puab.

¹⁰Tabsis yog koj ntshai moog tua, ca le coj koj tug tubkhai Pulas nrug koj nqeg moog rua huv puab lub yeej.

¹¹Koj yuav nov tej kws puab sis thaam, ces yuav txhawb koj tug zug moog tua lub yeej ntawd.” Yog le ntawd, Nkide-oos hab nwg tug tubkhai Pulas txhaj nqeg moog rua huv cov yeebncuab lub ntug yeej.

¹²Cov Midias, cov Amalej hab tej tsaav tuabneeg kws nyob saab nubtuaj, tuaj nyob rua huv lub haav coob ua npoj ntwg ib yaam le cov kooj txomfaav, puab muaj ntxhuav coob cuag le tej xuabzeb ntawm ntug havtxwv.

¹³Thaus Nkide-oos moog txug, nwg nov ib tug txivneej pav ib zaaj npau suav rua nwg tug phoojywg noog. Nwg has tas, “Kuv ua npau suav pum ib lub ncuav pas ndlog lug rua huv peb lub yeej hab lub ncuav ntawd tsoo ib lub tsevntaub. Lub tsevntaub qaug kag hab pua lua rua sau npoo aav.”

¹⁴Nwg tug phoojywg teb has tas, “Zaaj npau suav nuav mas yog Yau-as tug tub Nkide-oos kws yog tsaav tuabneeg Yixalayees raab ntaaj xwb! Muab txhais lug mas yuav tsi yog lwm yaam le lauj! Vaajtswv yeej yuav pub rua nwg tua yeej cov Midias hab peb cov tubrog huv tuabsi ntaag!”

¹⁵Thaus Nkide-oos nov tug txivneej ntawd zaaj npau suav hab paub lub ntsab lug lawm, nwg txawm txhus caug dlua pe tug TSWV. Ces nwg txawm rov lug rua sau cov Yixalayees lub yeej hab has tas, “Ca le sawv! Tug TSWV tub pub mej tua yeej cov tubrog Midias lawm!”

¹⁶Nkide-oos muab nwg peb puas leej tubrog faib ua peb paab hab muab ib tug tubrog twg ib lub xyu hab ib leeg ib lub hub ntim roj nrug ib teg tsau.

¹⁷Nwg has rua puab tas, “Thaus kuv moog txug ndlua ntawm ntug yeej, mej saib kuv ua le caag, mej ca le ua lawv le kuv ua ntawd.

¹⁸Thaus kuv hab cov tuabneeg kws nrug kuv, peb tshuab peb tej xyu, ces mej ca le tshuab mej tej xyu hab qw txhua qhov ncig lub yeej has tas, ‘Peb ua rua tug TSWV hab ua rua Nkide-oos.’ ”

¹⁹Nkide-oos hab nwg cov tubrog ib puas leej moog txug rua ntawm ntug yeej ua ntej thaus ib taag mo, tom qaab lub sijhawm kws cov faajxwm nyavnyuas hloov tuabneeg. Ces puab txawm tshuab raaj tshuab xyu hab tsoo tej hub kws puab tuav ntawm teg,

²⁰ob paab tom qaab los kuj ua ib yaam le ntawd. Puab txhua tug ib leeg tuav rawv ib teg tsau ntawm saab teg txhumphem, hab saab teg xis tuav rawv xyu tshuab, puab qw nrov heev has tas, “Tug TSWV hab Nkide-oos raab ntaaj tuaj lawm lauj!”

²¹Txhua tug nyag sawv tuabywv ntawm nyag qhov chaw ncig lub yeej. Yeebncuab cov tubrog ntshai heev hab quaj qw sis fuas kev tsiv rov qaab.

²²Thaus Nkide-oos cov tubrog tseem taabtom tshuab puab tej xyu, tug TSWV ua rua cov yeebncuab rhu puab tej ntaaj lug, ib leeg rov tua ib leeg. Puab tsiv moog txug ntawm Npethes Sitas hab taug txujkev ntawm XalethAas moog txug ndlua ntawm lub nroog Anpees Mehaulas kws nyob ze Tanpas.

²³Ces puab moog hu xeem Nathalis, xeem Aseles hab taagnrho xeem Manaxes kuas tuaj; hab puab moog caum cov Midias tua.

²⁴Nkide-oos khaiv tuabneeg moog has thoob plawg cov tuabneeg kws nyob peg tej ncov roob Efalayees has tas, “Mej ca le nqeg lug hab moog tog kev tua cov Midias, moog zuv lawv tug ntug Dlej Yauladees hab lawv tej ntug dlej ua ntu zug moog kuas txug rua ntawm Npenpalas, tsi xob pub cov Midias tsiv lug hlaa le. Yog le ntawd txhaj muaj tuabneeg moog hu cov Efalayees tuaj txoos ua ke, hab puab moog zuv lawv tug ntug dlej Yauladees hab lawv tej ntug dlej ua ntu zug moog txug ndlua rua ntawm Npenpalas.”

²⁵Puab nteg tau Aules hab Xees, obtug yog cov Midias ob tug thawj; puab muab Aules tua rua ntawm lub Pobzeb Aules, hab muab Xees tua rua ntawm lub chaw tsuam txiv maab Xees. Puab rau sab ntso caum cov Midias tua, hab nqaa Aules hab Xees obtug ob lub taubhau lug rua Nkide-oos, Nkide-oos nyob ntawm tug Dlej Yauladees saab nubtuaj.