Read Hmong Njua Cov Thawjtswj 8 Bible Online

Cov Thawjtswj 8 - Hmong Njua bible

Cov Thawjtswj 8

¹Ces cov Efalayees has rua Nkide-oos has tas, “Vim le caag koj tsi hu peb thaus koj moog tua cov Midias? Vim le caag koj ua saib tsi taug peb le?” Puab ywg Nkide-oos txug zaaj nuav phem kawg le.

²Tabsis Nkide-oos has rua puab tas, “Muab tej kws kuv ua taag lug pev rua tej kws mej ua mas tsi muaj nqes dlaabtsi. Tej txiv maab kws mej cov Efalayees moog khaws tau lug tseem zoo dlua tej kws kuv cov Anpi-exes moog dle lug hab.

³Vaajtswv muab Aules hab Xees kws yog cov Midias ob tug thawjcoj cob rua mej teg. Yuav ua le caag muab tej kws kuv ua pev tau rua qhov ntawd.?” Thaus Nkide-oos has le nuav taag, puab txhaj zoo sab tsi chim lawm.

⁴Thaus lub sijhawm ntawd, Nkide-oos hab nwg peb puas leej tubrog tub lug txug rua ntawm tug Dlej Yauladees, hab hlaa dlej rua saab tim lawm.

⁵Thaus puab lug txug rua huv lub nroog Xukaus, Nkide-oos has rua cov tuabneeg kws nyob huv lub nroog ntawd tas, “Thov mej muab ib cov ncuav rua kuv cov tubrog noj, puab qaug zug heev lawm, hab kuv tseem taabtom caum Xenpas hab Xamunas kws yog cov Midias ob tug vaajntxwv.”

⁶Tabsis cov thawjcoj kws nyob huv Xukaus has tas, “Yog vim le caag koj txhaj kuas peb muab mov rua koj cov tubrog noj? Mej tseem caum nteg tsi tau Xenpas hab Xamunas obtug los sav?”

⁷Nkide-oos teb has tas, “Tau lawm! Thaus tug TSWV muab Xenpas hab Xamunas obtug cob rua kuv, kuv maam muab nplawm maab xuavpaug hab nplawm xuavpaug kaug nraaj tom taj suabpuam lug nplawm mej.”

⁸Nkide-oos moog rua huv lub nroog Penuyees, hab thov cov tuabneeg huv lub nroog ntawd mov noj ib yaam nkaus, tabsis cov tuabneeg huv lub nroog Penuyees los kuj teb nwg ib yaam le cov tuabneeg huv lub nroog Xukaus hab.

⁹Yog le ntawd, nwg txhaj has rua puab tas, “Thaus kuv moog ntaus rog yeej rov qaab lug, kuv yuav rhuav lub chaw tsomfaaj nuav povtseg.”

¹⁰Xenpas hab Xamunas coj obtug tej tubrog nrug obtug moog nyob huv lub nroog Kakaus. Taagnrho cov tuabneeg kws nyob saab nubtuaj, cov tubrog tsuas tshuav kwvyees le kaum tsib txheeb leej lawm xwb; cov tubrog kws raug tua tuag lawm, muaj ib puas neeg nkaum txheeb leej.

¹¹Nkide-oos taug txujkev lawv ntug taj suabpuam kws nyob saab nubtuaj, ntawm lub nroog Naunpas hab Yanpehas, nyaag moog tua yeebncuab cov tubrog thaus puab tsi ncu ceevfaaj hlo le.

¹²Cov Midias ob tug vaajntxwv kws yog Xenpas hab Xamunas dlha tawm tsiv, tabsis Nkide-oos caum obtug hab nteg tau obtug rov qaab lug, ua rua obtug cov tubrog ceeb hab tsiv tawg ri sua.

¹³Thaus Nkide-oos rov huv tshaav rog lug, nwg taug txujkev kws hlaa ntawm Heles lug,

¹⁴nwg nteg tau ib tug tub hluas nyob huv lub nroog Xukaus tuaj, nwg ua tuab zoo nug tug tub hluas ntawd. Ces tug tub hluas txawm sau xyaa caum xyaa leej thawjcoj kws nyob huv lub nroog Xukaus cov npe rua Nkide-oos.

¹⁵Nkide-oos rov qaab lug ntsib cov tuabneeg huv Xukaus hab has rua puab tas, “Mej puas ncu txug qhov kws mej tsi kaam paab kuv lawm? Mej has tas mej tsi pub zaub mov rua kuv cov tubrog noj, rua qhov kuv nteg tsi tau Xenpas hab Xamunas obtug. Nwgnuav kuv nteg tau obtug lug ntawm nuav lawm!”

¹⁶Ces Nkide-oos muab cov nplawm maab xuavpaug hab cov nplawm xuavpaug nraaj kws txav tom taj suabpuam lug nplawm cov thawjcoj huv lub nroog Xukaus ntawd.

¹⁷Hab nwg muab lub chaw tsomfaaj huv lub nroog Penuyees rhuav qaug taag hab muab cov txivneej huv lub nroog ntawd tua povtseg huv tuabsi.

¹⁸Nkide-oos nug Xenpas hab Xamunas obtug has tas, “Cov tuabneeg kws meb muab tua sau Roob Tanpaus zoo le caag?” Obtug teb has tas, “Puab zoo ib yaam le koj. Puab txhua tug puavleej zoo ib yaam le vaajntxwv tej tub hab ntaag.”

¹⁹Nkide-oos has tas, “Puab yog kuv cov kwvtij, hab yog kuv nam cov tub kag ntaag. Tug TSWV kws muaj sa nyob, paub has tas yog meb tsi tua puab povtseg, kuv yuav tsi tua meb ib yaam nkaus hab.”

²⁰Nkide-oos has rua nwg tug tub hlub Yethes has tas, “Koj ca le muab obtug tua los mas.” Tabsis tug tub tsaa tsi taug nwg raab ntaaj tua obtug le. Nwg ntshai heev, rua qhov nwg tseem yog tub hluas xwb.

²¹Xenpas hab Xamunas obtug has rua Nkide-oos has tas, “Yog koj yog txivneej yawg tag, koj ca le tua wb xwb.” Yog le ntawd, Nkide-oos txhaj muab obtug tua hab dlaws tej saw tooj ntawm obtug cov ntxhuav nqaa huv tuabsi lawm.

²²Tom qaab ntawd, cov Yixalayees has rua Nkide-oos has tas, “Koj ca le ua tug tswjfwm peb, hab tom qaab kws dlua koj lawm los koj tug tub hab koj cov xeebntxwv yuav ua ib yaam nkaus le ntawd, rua qhov koj cawm peb dlim ntawm cov Midias txhais teg lug lawm.”

²³Nkide-oos teb has tas, “Kuv hab kuv tug tub yuav tsi ua tug tswjfwm mej, tug TSWV yuav tswjfwm mej.”

²⁴Tabsis nwg txaav zog moog hab has tas, “Ca kuv thov yuav ib yaam ntawm mej. Thov mej txhua tug muab tej qhws ntsej kws mej moog fuab tau lug nqaa huv tuabsi tuaj rua kuv.” (Cov Midias coj qhws ntsej kub ib yaam le cov tuabneeg kws nyob tom taj suabpuam hab.)

²⁵Cov pejxeem teb has tas, “Peb txaus sab yuav nqaa tej qhws ntsej ntawd tuaj rua koj.” Puab nthuav hlo ib dlaim ntaub lug pua, hab txhua tug nqaa tej qhws ntsej kub kws puab fuab tau lug ntawd tuaj tso rua ntawm dlaim ntaub.

²⁶Cov qhws ntsej kub kws Nkide-oos tau ntawd nyaav tshaaj plaub caug choj, hab cov nuav tub tsi tau xaam tej saw, tej paug hab tej rig tsho ntaub paajyeeb kws cov Midias ob tug vaajntxwv naav lossis tej saw tooj kws puab dlai rua ntawm puab cov ntxhuav cejdlaab.

²⁷Nkide-oos muab cov kub ntawd nchuav ua ib tug Efaus, nqaa moog txawb rua huv Aufelas kws yog nwg lub nroog. Taagnrho cov Yixalayees puavleej muab Vaajtswv tso tseg hab moog pe tug Efaus ntawd rua huv lub nroog Aufelas. Tug Efaus ntawd yog rooj ntaa npuj kws cuab tog Nkide-oos hab nwg tsev tuabneeg kev ntaag.

²⁸Txij thaus ntawd lug cov Midias txhaj swb cov Yixalayees hab puab tsaa tsi tau taubhau ntxiv le lawm. Lub tebchaws muaj kev thaajyeeb tau plaub caug xyoo moog txug thaus Nkide-oos tuag lawm.

²⁹Nkide-oos rov moog nyob huv nwg lub tsev.

³⁰Nkide-oos muaj xyaa caum leej tub, rua qhov nwg muaj ntau tug quaspuj.

³¹Nwg tseem muaj ib tug nam yau nyob huv lub nroog Sekhees; tug nam yau ntawd yug tau ib tug tub rua Nkide-oos, nwg tis tug tub ntawd npe hu ua Anpimelej.

³²Yau-as tug tub Nkide-oos tuag thaus nwg noobnyoog laug heev, hab luas coj nwg moog log rua huv nwg txiv Yau-as lub qhov ntxaa, huv lub nroog Aufelas kws yog Anpi-exes cuab kwvtij lub nroog.

³³Tom qaab kws Nkide-oos tuag lawm, cov Yixalayees rov tsi muab sab npuab Vaajtswv hab moog teev Npa-aas dlua. Puab teev Npa-aas Npelis ua puab tug vaajtswv,

³⁴hab tseg tsi pehawm tug TSWV kws yog puab tug Vaajtswv tug kws cawm puab dlim ntawm puab cov yeebncuab kws nyob puagncig puab lawm.

³⁵Puab yeej tsi ris Nkide-oos tsev tuabneeg tej txaj ntsig hab txhua yaam zoo kws nwg tau ua paab cov Yixalayees taag lug lawm.