Read Hmong Njua Cov Thawjtswj 9 Bible Online

Cov Thawjtswj 9 - Hmong Njua bible

Cov Thawjtswj 9

¹Nkide-oos tug tub Anpimelej moog saib nwg nam cov neejtsaa huv lub nroog Sekhees, hab nwg has rua nwg nam cov neejtsaa

²kuas nug cov tuabneeg huv Sekhees has tas, “Saib mej yuav taagnrho Nkide-oos xyaa caum leej tub ua nom kaav mej lossis mej xaav yuav ib tug kaav mej xwb? Ncu ntsoov has tas, Anpimelej txhaj yog mej nqaj mej tawv hab yog mej roj mej ntshaav xwb.”

³Nwg nam cov neejtsaa txhaj moog paab nwg has zaaj nuav rua cov tuabneeg kws nyob huv lub nroog Sekhees, hab cov tuabneeg huv lub nroog Sekhees pum zoo yuav Anpimelej, rua qhov nwg txheeb ze puab.

⁴Puab muab tau xyaa caum dlaim nyaj huv lub tsev kws puab teev Npa-aas Npelis lug rua nwg. Hab nwg muab cov nyaj nuav moog ndlav tau ib paab tuabneeg lajlees kws tsi tsimtxaj lug tuaj nwg tog.

⁵Nwg txhaj rov moog tom nwg txiv lub tsev kws nyob huv lub nroog Aufelas, hab moog nteg nwg xyaa caum leej kwvtij kws puavleej yog Nkide-oos cov tub coj moog tua huv tuabsi rua sau ib dlaim laag zeb. Tabsis Yauthaas kws yog Nkide-oos tug tub ntxawg tsiv nkaum lawm nwg txhaj tsi raug tua xwb.

⁶Ces taagnrho cov tuabneeg huv lub nroog Sekhees hab huv lub nroog Npemilaus tuaj txoos ua ke rua ntawm qaab tsob ntoo xeeb huv lub nroog Sekhees. Puab moog muab Anpimelej tsaa ua vaajntxwv.

⁷Thaus Yauthaas nov dlheev txug zaaj nuav, nwg txhaj moog sawv sau lub ncov Roob Nkelixees, hab qw tuaj rua puab has tas, “Cov tuabneeg Sekhees, yog mej noog kuv has, Vaajtswv txhaj yuav noog mej has!

⁸Muaj ib zag tej ntoo txawm tawm moog xaiv ib tug vaajntxwv kaav puab. Puab has rua tug ntoo roj has tas, ‘Koj ca le ua vaajntxwv kaav peb.’

⁹Tug ntoo roj teb has tas, ‘Yog muab kuv tsaa ua vaajntxwv kaav mej, kuv tsi tau txi kuv tej txiv lug ua roj siv rua tej dlaab hab tej tuabneeg tau ntsejmuag lawm.’

¹⁰Ces tej ntoo ntawd has rua tug ntoo txiv ncuav pas has tas, ‘Koj ca le ua vaajntxwv kaav peb.’

¹¹Tug ntoo txiv ncuav pas teb has tas, ‘Yog muab kuv tsaa ua vaajntxwv kaav mej, kuv yuav tsi tau txi kuv tej txiv kws qaab zib heev lawm.’

¹²Yog le ntawd, tej ntoo txhaj has rua tsob txiv maab has tas, ‘Koj ca le ua vaajntxwv kaav peb.’

¹³Tabsis tsob txiv maab teb has tas, ‘Yog muab kuv tsaa ua vaajntxwv kaav mej, kuv yuav tsi tau txi kuv tej txiv lug ua cawv rua tej dlaab hab tej tuabneeg muaj kev zoo sab lawm.’

¹⁴Ces taagnrho tej ntoo ntawd txawm has rua tsob maab xuavpaug has tas, ‘Koj ca le ua vaajntxwv kaav peb.’

¹⁵Tsob maab xuavpaug teb has tas, ‘Yog mej xaav muab kuv tsaa ua mej tug vaajntxwv tag, mej ca le lug nkaum huv kuv tug dluab ntxoov ntxoo. Yog mej tsi kaam lug, suavtawg yuav tawm huv kuv tej ceg tuaj kub tej ntoo cab peg Lenpanoos kuas taag huv tuabsi.’ ”

¹⁶Yauthaas has ntxiv tas, “Mej yeej muaj nplooj sab ncaaj nceeg dlawb paug thaus mej tsaa Anpimelej ua mej tug vaajntxwv tag los? Mej ua le nuav puas yog mej pauj txaj ntsig rua Nkide-oos hab nwg tsev tuabneeg?

¹⁷Mej yuavtsum ncu ntsoov has tas, kuv txiv yog tug kws tuaj paab mej tua mej cov yeebncuab. Nwg muab nwg txujsa cawm mej dlim ntawm cov Midias txhais teg lug.

¹⁸Tabsis nub nua mej ntxeev sab tig rov qaab tawmtsaam kuv txiv tsev tuabneeg. Mej muab kuv txiv xyaa caum leej tub tua rua sau ib dlaim laag zeb, hab mej muab Anpimelej kws yog kuv txiv tug nkauj qhe tug tub tsaa ua vaajntxwv kaav mej huv lub nroog Sekhees, rua qhov nwg txheeb ze mej.

¹⁹Tej kws nub nua mej ua, yog ua rua Nkide-oos hab nwg tsev tuabneeg, hab yog ua lug ntawm lub sab ncaaj nceeg tag, ces mej ca le txaus sab rua Anpimelej hab nwg ca le txaus sab rua mej.

²⁰Yog has tas tsi yog le ntawd, thov kuas nplaim tawg ca le tawm huv Anpimelej tuaj kub cov tuabneeg kws nyob huv lub nroog Sekhees hab Npemilaus. Thov kuas nplaim tawg tawm huv cov tuabneeg kws nyob huv lub nroog Sekhees hab Npemilaus tuaj kub Anpimelej kuas taag.”

²¹Vim Yauthaas ntshai nwg tug tijlaug Anpimelej, nwg txhaj tsiv moog nyob huv lub nroog Npe-eles lawm.

²²Anpimelej kaav cov Yixalayees tau peb xyoos.

²³Ces Vaajtswv ua rua Anpimelej hab cov tuabneeg huv lub nroog Sekhees tsi sis humxeeb, puab tau ntxeev sab tawmtsaam Anpimelej.

²⁴Tej xwm nuav tshwmsim tub yog vim Anpimelej tua Nkide-oos xyaa caum leej tub tuag lab ntshaa tsuag, nwgnuav tej ntshaav ntawd txhaj ua siv ua npug poob lug rua sau puab tug kwvtij Anpimelej hab cov tuabneeg huv Sekhees kws paab Anpimelej tua nwg cov kwvtij.

²⁵Cov tuabneeg huv lub nroog Sekhees txhij ib paab tuabneeg moog nkaum huv tej koog ntoo sau tej ncov roob tog kev tua Anpimelej, hab puab fuab txhua tug tuabneeg kws taug txujkev ntawd. Ces txawm muaj tuabneeg moog has zaaj nuav rua Anpimelej paub.

²⁶Enpes tug tub Nka-as nrug nwg cov kwvtij tuaj txug huv lub nroog Sekhees, mas cov tuabneeg huv lub nroog ntawd ca sab heev rua nwg.

²⁷Puab txawm tawm moog dle tej txiv maab huv puab tej vaaj coj lug tsuam ua cawv, hab npaaj ua ib rooj noj haus. Puab moog rua huv puab tug vaajtswv lub tuamtsev, puab noj haus ua kev lomzem hab luag Anpimelej plig heev.

²⁸Nka-as has tas, “Peb cov tuabneeg kws nyob huv lub nroog Sekhees nuav yog tuabneeg dlaabtsi? Vim le caag peb ca nyuas Anpimelej ntawd kaav peb? Nwg yog leejtwg tag? Nwg tsuas yog Nkide-oos tug tub xwb los sav! Hab Xenpules yog tug sawv cev ntawm nwg, vim le caag peb pheej ua num rua nwg? Ca le fwm mej yawmkoob Hamaules tug kws yog cov tuabneeg Sekhees leej txiv!

²⁹Kheev laam yog kuv tau ua cov pejxeem nuav tug thawj xwb lauj! Kuv yuav lawv Anpimelej tawm tsiv moog ntaag! Kuv yuav has rua nwg has tas, ‘Ca le txhij koj cov tubrog tawm tuaj nrug peb sis tua!’ ”

³⁰Thaus Xenpules kws kaav lub nroog nov tej lug kws Nka-as has ntawd, ua rua nwg chim heev.

³¹Nwg txhaj xaa xuv moog rua Anpimelej huv lub nroog Alumas has tas, “Enpes tug tub Nka-as hab nwg cov kwvtij tau tuaj txug huv lub nroog Sekhees, hab puab tau txwv tsi pub koj rov lug rua huv lub nroog Sekhees nuav ntxiv lawm.

³²Mo nuav, koj hab koj cov tubrog ca le maub moog nkaum rua huv tej teb.

³³Taagkig sawv ntxuv, mej ca le sawv hab nyaag tuaj tua lub nroog. Ces thaus kws Nka-as hab nwg cov tubrog tawm tuaj tua mej, txhua tug kws mej nteg tau, mej ca le muab ntaus kuas txaus sab ntaag!”

³⁴Yog le ntawd Anpimelej txhaj muab nwg cov tubrog faib ua plaub paab, mo ntawd puab maub lug nkaum rua ntawm ntug nroog Sekhees.

³⁵Thaus Anpimelej hab nwg cov tubrog pum Nka-as tawm tuaj sawv ntawm roojvaag nroog, puab txawm sawv pis tseeg ntawm tej chaw kws puab nkaum lug.

³⁶Nka-as pum dlheev puab hab has rua Xenpules has tas, “Saib maj! Muaj tuabneeg coob heev dlha nplawg nta sau ncov roob lug lawm lauj!” Xenpules teb has tas, “Cov ntawd tsi yog tuabneeg, puab yog tej dluab ntxoov ntxoo lug sau roob lug xwb.”

³⁷Nka-as rov has ntxiv tas, “Saib maj! Cov tid dlha nplawg nta nqeg taug laaj roob lug hab muaj ib paab taug txujkev ntawm cov tuabneeg saib moov tsob ntoo xeeb lug!”

³⁸Ces Xenpules has rua Nka-as has tas, “Nwgnuav tej lug kws koj pheej khaavtheeb dlua twg lawm? Koj yog tug kws pheej nug has tas, vim le caag peb pheej ca nyuas Anpimelej ntawd kaav peb? Cov tuabneeg ntawd yog cov kws koj pheej luag puab plig ntaag. Ca le tawm moog nrug puab sis tua los mas!”

³⁹Nka-as hab cov tuabneeg huv lub nroog Sekhees tawm moog nrug Anpimelej sis tua.

⁴⁰Anpimelej moog caum nteg Nka-as, hab Nka-as tsiv nkaum rua nuav rua u. Muaj tuabneeg raug mob ua ntu zug lug txug ndlua rua ntawm roojvaag nroog.

⁴¹Anpimelej rov moog nyob huv lub nroog Alumas, ces Xenpules txhaj muab Nka-as hab nwg cov kwvtij lawv tsiv tawm huv nroog Sekhees lawm, yog le ntawd, puab txhaj nyob tsi tau huv lub nroog Sekhees.

⁴²Nub tom qaab muaj tuabneeg moog qha rua Anpimelej has tas, cov tuabneeg huv lub nroog Sekhees taabtom tuav tswvyim nrhav kev tsiv moog rua tom tej teb.

⁴³Yog le ntawd, Anpimelej txhaj txhij nwg cov tubrog, muab puab faib ua peb paab moog nkaum tom teb tog. Thaus nwg pum cov pejxeem tawm huv nroog tuaj, nwg txhaj tawm huv qhov chaw kws nwg nkaum lug tua puab.

⁴⁴Thaus Anpimelej hab paab tubrog kws nrug nwg taabtom dlha ceev nrooj lug zuv ntawm roojvaag nroog, ob paab kws moog zuv tom teb tub muab cov yeebncuab kws nyob tom teb tua tuag taag.

⁴⁵Puab sis tua ib nub nkaus, Anpimelej txhaj txeeb tau lub nroog, muab cov tuabneeg huv tua tuag taag. Muab lub nroog tsoo qaug taag, hab muab ntsev nphoo plooj nkaus rua sau npoo aav.

⁴⁶Thaus cov thawjcoj kws nyob ntawm lub chaw faajxwm huv lub nroog Sekhees nov txug zaaj nuav, puab txhaj tsiv moog nkaum rua ib chaav huv lub tuamtsev kws pe Npa-aas.

⁴⁷Muaj tuabneeg moog qha rua Anpimelej has tas, puab tsiv moog nkaum rua huv lawm,

⁴⁸Nwg txhaj coj nwg cov tubrog nce moog rua sau Roob Zalemoos. Anpimelej muab taus moog txav tau ib kheev ceg ntoo kwv lug. Anpimelej has kuas nwg cov tubrog ua ib yaam nkaus le nwg ua.

⁴⁹Ces txhua tug tubrog, ib leeg moog txav tau ib kheev ceg ntoo kwv lug; puab ua lawv le Anpimelej ua hab muab cov ceg ntoo ntsaws rua lub ncauj qho ntawd. Puab tis suavtawg hlawv, ces cov tuabneeg kws nkaum huv chaav ntawd hab cov tuabneeg kws nyob huv lub chaw faajxwm huv lub nroog Sekhees tuag taagnrho, quaspuj hab txivneej huv tuabsi muaj kwvyees ib txheeb leej.

⁵⁰Ces Anpimelej txawm moog rua huv lub nroog Thenpej, moog vij lub nroog ntawd hab nteg cov tuabneeg huv.

⁵¹Nyob huv lub nroog ntawd, muaj ib lub chaw tsomfaaj zoo heev, ces txhua tug txivneej hab quaspuj kws nyob huv lub nroog ntawd, hab taagnrho tej thawjcoj nkaag moog nkaum rua huv lub chaw tsomfaaj ntawd. Puab muab qhovrooj laag hab nce moog nkaum rua sau ruv lawm.

⁵²Anpimelej tuaj tua puab ntawm lub chaw tsomfaaj, nwg moog rua ntawm lub qhovrooj hab zig tawg hlawv lub chaw tsomfaaj.

⁵³Tabsis muaj ib tug quaspuj muab ib txhib zeb pov lug raug Anpimelej taubhau, hab ua rua nwg txhaa taubhau tawg.

⁵⁴Ces Anpimelej txawm hu tug tub hluas kws nqaa nwg tej cuabyeej ua rog kuas ca le ceev nrooj lug cuag nwg hab nwg has rua tug tub hluas ntawd tas, “Ca le rhu koj raab ntaaj tua kuv kuas tuag. Kuv tsi xaav kuas luas xyaav has tas, tug quaspuj ntawd tua kuv tuag.” Tug tub hluas ntawd txhaj rhu ntaaj nkaug Anpimelej tshaab plawg, Anpimelej txhaj tuag lawm.

⁵⁵Thaus cov Yixalayees pum Anpimelej tuag lawm, puab nyag txawm rov moog nyag tsev taag.

⁵⁶Tub yog Vaajtswv muab Anpimelej tua pauj txujkev phem kws nwg tau ua tawmtsaam nwg txiv, hab muab nwg cov kwvtij xyaa caum leej tua tuag taag ntawd.

⁵⁷Vaajtswv tseem ua rua cov tuabneeg kws nyob huv lub nroog Sekhees raug kev txomnyem vim puab txujkev ua phem, Nkide-oos tug tub Yauthaas tej lug kws thaus nwg foom ntawd txhaj poob lug raug puab.