Read Hmong Njua Tshwmsim 1 Bible Online

Tshwmsim 1 - Hmong Njua bible

Tshwmsim 1

¹Phoo ntawv nuav yog has txug tej kws Yexus Khetos qha rua Vaajtswv cov tubkhai paub tej kws tshuav tsi ntev tom ntej nuav yuav muaj tshwm lug. Vaajtswv tub xub qha tej ntawd rua Yexus Khetos lawm, Yexus Khetos txhaj khaiv nwg ib tug timtswv lug qha tej ntawd rua Yauhaas tug kws yog Yexus Khetos ib tug tubkhai,

²hab Yauhaas sau txhua yaam kws nwg pum huv tuabsi rua huv phoo ntawv nuav. Tej ntawd yog Vaajtswv tej lug hab yog tej lug tseeb kws Yexus Khetos qha rua Yauhaas.

³Cov tuabneeg kws nyeem phoo ntawv nuav, hab cov tuabneeg kws noog tej lug kws Vaajtswv qha nuav, hab ua lawv le cov lug kws sau tseg rua huv phoo ntawv nuav, cov ntawd yuav tau nyob kaaj sab lug, rua qhov tub yuav txug lub sijhawm kws tej nuav yuav muaj tshwm lug.

⁴Kuv yog Yauhaas, kuv sau tsaab ntawv nuav xaa tuaj rua xyaa pawg ntseeg kws nyob huv lub xeev Axias: Thov Vaajtswv foom koob moov rua mej hab paab kuas mej tau nyob kaaj sab lug. Vaajtswv tug kws nyob nwgnuav, tug kws ibtxwm nyob thaus u lug lawm, hab yog tug kws yuav lug yaav tom ntej nuav, hab thov kuas xyaa tug ntsujplig kws nyob ntawm Vaajtswv lub zwmtxwv,

⁵hab Yexus tug kws ua timkhawv ncaaj nceeg, tug kws yog tug Tub hlub kws Vaajtswv tub tsaa sawv huv qhov tuag rov qaab lug lawm, hab yog tug kws kaav taagnrho tej vaajntxwv huv nplajteb nuav huv tuabsi. Thov kuas Yexus Khetos tug kws hlub peb hab tuag theej peb lub txhoj, hab nwg paab peb dlim peb tej kev txhum,

⁶hab nwg tsaa peb ua povthawj ua Vaajtswv kws yog Yexus Khetos leej Txiv teg num tau koob meej. Thov kuas Yexus Khetos tau tug tshwjchim kws ci ntsaa ab hab lub fwjchim moog ibtxhis le! Amees.

⁷Mej saib, nwg nrug fuab nrug cua lug! Suavdlawg yuav pum nwg, txawm yog cov tuabneeg kws muab muv nkaug nwg los puab yuav pum nwg hab. Thaus nwg lug, txhua tsaav tuabneeg kws nyob huv qaab ntuj nuav yuav quaj nyav ntsoog quas qeeg. Yeej yuav muaj le ntawd tag! Amees.

⁸Tug Tswv kws yog Vaajtswv tug kws muaj Fwjchim Luj kawg nkaus has tas, “Kuv yog Alafas hab Aumenkas, kuv yog tug kws ibtxwm nyob thaus u lug lawm, hab yog tug kws yuav lug yaav tom ntej nuav.”

⁹Kuv yog mej tug kwvtij kws hu ua Yauhaas. Kuv tub nrug Yexus Khetos koom ib txujsa lawm, kuv raug kev txomnyem, kuv lug ua Vaajtswv tsaav tuabneeg, hab kuv ua sab ntev ib yaam le mej, vim kuv qha Vaajtswv Txujlug hab tej lug tseeb kws Yexus Khetos qha rua kuv lawm, txhaj le muaj tuabneeg nteg kuv coj moog kaw rua tim lub koog Povtxwv Pamaus.

¹⁰Nub kws yog tug Tswv nub, Vaaj Ntsujplig lug kaav taagnrho kuv lub sab, kuv nov ib lub suab has nrov nrov rua kuv ib yaam le lub suab xyu nrov tom kuv qaab tuaj.

¹¹Lub suab ntawd has tas, “Koj yuavtsum sau tej kws koj pum huv tuabsi tseg rua huv ntawv, hab xaa moog rua cov pawg ntseeg kws nyob huv xyaa lub nroog nuav: Efexus, Xaminas, Penkamus, Thiyatilas, Xaladis, Filadeefias, hab Laudikeyas.”

¹²Thaus kuv nov lub suab ntawd kuv tig hlo moog saib, saib yog leejtwg has rua kuv, kuv txawm pum xyaa tug ncej kub kws txawb teeb nyob ntawd,

¹³nyob huv nruab nraab xyaa tug ncej kub ntawd, muaj ib tug zoo le tuabneeg sawv huv, nwg naav ib lub tsho ntev suab zaw nraag kutaw, hab nwg sa ib txuj hlaab kub sau nwg qhovtsus.

¹⁴Nwg cov plaubhau dlawb ib yaam le xuv paaj lossis ib yaam le cov dlaus, hab nwg lub qhovmuag ci ib yaam le nplaim tawg;

¹⁵nwg txhais kutaw ci ib yaam le tej tooj dlaag kws luas tub muab nchuav hab txhuam tau ci ci lawm, hab nwg lub suab nrov ib yaam le dlej tsaws tsaag nrov.

¹⁶Nwg txhais teg xis tuav rawv xyaa lub nubqub, hab muaj ib raab ntaaj ob saab ntse tawm huv nwg qhovncauj tuaj. Nwg lub ntsejmuag ci ib yaam le lub nub ci thaus taav su.

¹⁷Thaus kuv pum dlheev nwg, kuv txawm ca le qaug ntawg rua ntawm nwg kutaw, kuv zoo ib yaam le tug tuabneeg kws tuag lawm. Nwg txawm cev hlo nwg txhais teg xis lug tuav nkaus kuv, hab nwg has tas, “Koj tsi xob ntshai! Kuv yog lub hauvpaug hab yog lub ntsis.

¹⁸Kuv yog tug kws muaj sa nyob! Kuv tub tuag lawm, tabsis koj saib, nwgnuav kuv muaj sa nyob moog ibtxhis le. kuv yog tug kws kaav txujkev tuag hab tubtuag teb.

¹⁹Yog le ntawd, koj yuavtsum sau tej kws koj pum, tsi has tej kws nwgnuav koj pum lossis tej kws yuav muaj lug yaav tom ntej nuav.

²⁰Kuv yuav txhais zaaj kws tsi muaj tuabneeg paub has txug xyaa lub nubqub kws koj pum nyob huv kuv txhais teg xis, hab has txug xyaa tug ncej kub txawb teeb ntawd rua koj paub: xyaa lub nubqub ntawd yog xyaa tug timtswv kws saib xyaa pawg ntseeg, hab xyaa tug ncej kub txawb teeb yog xyaa pawg ntseeg.