Read Hmong Njua Tshwmsim 10 Bible Online

Tshwmsim 10 - Hmong Njua bible

Tshwmsim 10

¹Tom qaab ntawd kuv pum dlua ib tug timtswv ceebtsheej kws muaj fwjchim luj kawg nkaus lug sau ntuj lug. Muaj ib tauv fuab qhwv nwg hab muaj ib tug dluab zaaj vij nwg lub taubhau; nwg lub ntsejmuag ci ib yaam le lub nub, hab nwg ob txhais ceg zoo ib yaam le tug nplaim tawg kws cig ntswj pis yog.

²Nwg txhais teg tuav rawv ib thooj ntawv miv miv kws tub muab nthuav lawm. Nwg rhais nwg saab taw xis moog tsuj huv havtxwv, hab nwg saab taw txhumphem tsuj sau nruab nqhuab.

³Nwg has lug nrov ib yaam le tsuv ntxhuav nyooj. Thaus nwg has lug taagnrho, ces xub txawm nroo xyaa zag teb.

⁴Thaus xub nroo xyaa zag teb taag lawm kuv tub yuav laug sau, tabsis kuv tsua nov ib lub suab has sau ntuj tuaj rua kuv has tas, “Koj ca le muab tej lug kws xub nroo xyaa zag ntawd npog ca tsi xob sau!”

⁵Kuv pum tug timtswv ceebtsheej kws ib saab kutaw tsuj huv havtxwv hab ib saab kutaw tsuj sau nruab nqhuab tsaa nwg saab teg xis rua sau ntuj,

⁶hab nwg tuav Vaajtswv tug kws muaj sa nyob moog ibtxhis, tug kws tsim lub ntuj, lub nplajteb, havtxwv, hab tsim ib puas tsaav yaam kws nyob sau ntuj hab huv nplajteb nuav lub npe coglug has tas, “Luas yuav tsi ncua sijhawm ntev lawm!

⁷Tabsis thaus tug timtswv xyaa tshuab nwg lub xyu, Vaajtswv yuav ua Vaajtswv teg num kws Vaajtswv muab zais ca lawm kuas tav, lawv le tej kws Vaajtswv tub xub qha rua nwg cov tubkhai hab cov kws cev Vaajtswv lug lawm.”

⁸Tom qaab ntawd kuv nov lub suab kws thawj zag has rua kuv lawm rov has rua kuv has tas, “Koj ca le moog muab thooj ntawv miv miv kws tub muab nthuav lawm ntawm tug timtswv ceebtsheej kws ib saab kutaw tsuj huv havtxwv hab ib saab kutaw tsuj sau nruab nqhuab txhais teg.”

⁹Ces kuv txawm moog cuag tug timtswv ntawd, hab thov nwg muab thooj ntawv miv miv ntawd rua kuv. Nwg has rua kuv has tas, “Koj ca le muab thooj ntawv nuav noj; thaus koj nqog lawm yuav ua rua koj lub plaab ab, tabsis thaus nyob huv koj lub qhovncauj mas yuav qaab zib ib yaam le zib ntaab.”

¹⁰Kuv txhaj muab thooj ntawv miv miv ntawm tug timtswv txhais teg lug noj, thaus tseem nyob ntawm kuv qhovncauj mas qaab zib ib yaam le zib ntaab. Tabsis thaus kuv nqog rua huv plaab lawm, ab le tug timtswv has tag.

¹¹Tom qaab ntawd luas has rua kuv has tas, “Koj yuavtsum rov qaab qha Vaajtswv txujlug kws has txug txhua tsaav tuabneeg, txhua lub tebchaws, txhua yaam lug, hab txhua tug vaajntxwv dlua ib zag.”