Read Hmong Njua Tshwmsim 11 Bible Online

Tshwmsim 11 - Hmong Njua bible

Tshwmsim 11

¹Tom qaab ntawd luas muab ib tug paas ntsuag kws zoo le ib tug paas nreg rua kuv, hab has rua kuv has tas, “Koj ca le moog ntsuag lub tuamtsev, lub thaaj hab suav cov tuabneeg kws tuaj pehawm Vaajtswv huv lub tuamtsev saib muaj pistsawg leej.

²Tabsis koj tsi xob ntsuag ibncig lub Tuamtsev saab nrau, rua qhov tub muab saab nrau rua cov tuabneeg kws tsi ntseeg Vaajtswv lawm, puab yuav tuaj tsuj lub Nroog Dlawbhuv moog txug plaub caug ob lub hlis.

³Kuv yuav khaiv kuv ob tug timkhawv kws naav ntaub tsaaj moog qha Vaajtswv txujlug ib txheeb ob puas rau caum nub ntawd.”

⁴Ob tug timkhawv ntawd yog ob tsob ntoo roj hab yog ob tug ncej txawb teeb kws nyob ntawm Vaajtswv tug kws kaav lub nplajteb nuav lub xubndlag.

⁵Yog leejtwg yuav ua phem rua obtug, ces nplaim tawg yuav tawm huv obtug qhovncauj lug kub cov kws ua yeebncuab rua obtug. Yog leejtwg yuav ua limham rua obtug, ces tug ntawd yuav raug kub nyab tuag.

⁶Ob tug timkhawv ntawd muaj fwjchim txwv tsi pub kuas ntuj lug naag rua lub sijhawm kws obtug qha Vaajtswv txujlug. Obtug muaj fwjchim ua rua tej dlej txa ua ntshaav; hab obtug muaj fwjchim ua rua lub nplajteb raug tej sub tawg sub ntshaa, obtug xaav ua le ntawd pistsawg zag los obtug yeej ua tau huv tuabsi.

⁷Thaus obtug qha taag lawm, tug tsaj kws tawm huv lub qhov tub tub lug, yuav lug tawmtsaam obtug. Tug tsaj ntawd yuav kovyeej obtug hab muab obtug tua povtseg,

⁸hab nwg yuav muab obtug ob lub cev tso rua ntawm ntug kev huv lub nroog luj, lub nroog ntawd yog lub nroog kws luas muab obtug tug Tswv ntsa rua sau ntoo khaublig. Suavdlawg txeev muab lub nroog ntawd pev rua lub nroog Xaudoos hab lub tebchaws Iziv.

⁹Muaj tuabneeg coob coob tuaj ntau lub tebchaws tuaj saib, tsi has tsaav tuabneeg twg, xeem twg, cov tuabneeg kws has yaam lug twg los tuaj, suavdlawg puavleej tuaj saib obtug ob lub cev tau peb nub hab ib taav su. Puab tsi pub leejtwg coj obtug lub cev moog log le.

¹⁰Thaus tej tuabneeg nplajteb pum has tas obtug tuag lawm, puab zoo sab kawg le. Puab ua rooj noj rooj haus hab muab khoom sis pub, rua qhov ob tug kws cev Vaajtswv lug kws ua rua tuabneeg nplajteb raug kev txomnyem tuag lawm.

¹¹Tabsis thaus dlhau peb nub hab ib taav su ntawd lawm, Vaajtswv rau sav rau paa rua obtug ob lub cev, ces obtug txawm caj hab sawv tseeg sawv ntsug; cov tuabneeg kws pum obtug sawv, suavdlawg ntshai kawg le.

¹²Obtug nov ib lub suab has nrov nrov sau ntuj tuaj rua obtug has tas, “Meb ca le lug sau nuav!” Thaus cov tuabneeg kws ntxub obtug tseem saib ntsoov obtug, ces muaj ib tauv fuab lug coj kag obtug moog rua sau ntuj lawm.

¹³Taamsim ntawd lub nplajteb txawm qeeg ua zug koog; lub nroog ntawd raug puamtsuaj taag ib feem kaum, tuabneeg tuag txug xyaa txheeb leej. Cov tuabneeg kws tsi tuag ntshai kawg le hab puab qhuas Vaajtswv tug kws muaj fwjchim luj kawg nkaus kws nyob sau ntuj ceebtsheej.

¹⁴Txujkev txomnyem zag ob tub dlhau lawm, tabsis mej saib, tshuav tsi ntev txujkev txomnyem zag peb yuav lug!

¹⁵Thaus tug timtswv ceebtsheej kws yog tug xyaa tshuab nwg lub xyu, txawm muaj ib lub suab has nrov nrov sau ntuj tuaj has tas, “Tug kws muaj fwjchim kaav lub nplajteb nuav, nwg yog peb tug Tswv hab yog tug Mexiyas, nwg yuav kaav moog ibtxhis le.”

¹⁶Thaus ntawd neeg nkaum plaub tug txwjlaug kws nyob ntawm puab cov zwmtxwv ntawm Vaajtswv hauv ntej txawm txhus caug ndlua pehawm Vaajtswv,

¹⁷puab has tas, “Tug Tswv kws yog Vaajtswv, koj yog tug kws muaj Fwjchim Luj kawg nkaus, tug kws nyob nwgnuav hab tug kws ibtxwm muaj nyob thaus u lug lawm. Peb ua koj tsaug, rua qhov koj siv koj lub fwjchim kws luj kawg nkaus hab nwgnuav koj taabtom yuav pib kaav lub nplajteb nuav!

¹⁸Cov tuabneeg kws tsi ntseeg Vaajtswv, puab chim heev, rua qhov tub txug lub sijhawm kws koj rau txim lawm. Hab tub txug lub sijhawm kws koj txav txim rua cov tuabneeg kws tuag lawm. Tub txug lub sijhawm kws koj yuav muab nqe zug rua koj cov cevlug lawm, hab muab nqe zug rua txhua tug kws fwm koj, tsi has tug hlub tug yau huv tuabsi. Hab tub txug lub sijhawm kws koj yuav rhuav cov tuabneeg kws ua rua lub nplajteb nuav puamtsuaj, kuas puamtsuaj moog!”

¹⁹Thaus ntawd kuv pum lub Tuamtsev kws nyob sau ntuj lub qhovrooj qheb hlo, muaj ib lub Phijxaab kws ntim Vaajtswv tej lug cog tseg nyob huv. Ces thaus ntawd tsaglig xub laim lab pis vog hab xub nroo nrov nroo ntwg, muaj aav qeeg, hab muaj lawg lug hlub heev.