Read Hmong Njua Tshwmsim 12 Bible Online

Tshwmsim 12 - Hmong Njua bible

Tshwmsim 12

¹Tom qaab ntawd muaj ib yaam txujci tseemceeb tshwm sau nruab ntug. Hab muaj ib tug quaspuj naav lub nub, nwg tsuj nreeg lub hli, hab nwg ntoo kaum ob lub nubqub.

²Tug quaspuj ntawd suab ib plaab mivnyuas tub yuav txug caij yug, thaus nwg mob plaab yuav yug tug mivnyuas, nwg quaj quaj.

³Muaj dlua ib yaam txujci tseemceeb tshwm sau nruab ntug hab, yaam ntawd yog ib tug zaaj luj luj lab ploog nyob sau. Tug zaaj ntawd muaj xyaa lub taubhau hab muaj kaum tug kub, xyaa lub taubhau ntawd puavleej muaj mom kub looj huv tuabsi.

⁴Zaaj muab zaaj tug kutwv nplawm cov nubqub sau nruab ntug poob taag ib feem peb. Nwg sawv ntawm tug quaspuj kws yuav yug mivnyuas hauv ntej, hab nwg tog rawv yuav noj tug mivnyuas kws yuav yug lug ntawd.

⁵Tug quaspuj ntawd yug tau ib tug mivtub. Tug mivtub ntawd yuav muab qws hlau lug kaav txhua tsaav tuabneeg huv tuabsi. Tabsis tub muaj tuabneeg tuaj txeeb tug mivtub ntawd coj moog rua Vaajtswv tug kws nyob ntawm lub zwmtxwv lawm.

⁶Ces tug quaspuj ntawd txawm tsiv moog rua tom taj suabpuam thaaj chaw kws Vaajtswv npaaj tseg rua nwg lawm, Vaajtswv yuav tsomkwm nwg qhov ntawd moog txug ib txheeb ob puas rau caum nub.

⁷Tom qaab ntawd muaj kev tsuv kev rog sis ntaus sis tua sau nruab ntug. Yog Mikhayees hab Mikhayees cov timtswv nrug zaaj sis tua. Zaaj hab zaaj cov timtswv tuaj tua Mikhayees,

⁸tabsis zaaj tog tua tsi yeej, zaaj hab zaaj cov timtswv txhaj tsi tau nyob sau ntuj lawm.

⁹Luas muab tug zaaj kws luj luj hab nwg cov timtswv pov rua huv nplajteb. Tug zaaj ntawd yog tug naab txwj naab laug thaus u kws suavdlawg hu ua dlaab Ntxwgnyoog lossis hu ua Xataas kws dlaag ntxag tuabneeg nplajteb.

¹⁰Ces kuv nov ib lub suab has nrov nrov sau ntuj tuaj rua kuv has tas, “Nwgnuav Vaajtswv tub cawm peb dlim lawm! Nwgnuav Vaajtswv tub qha rua suavdlawg pum lawm has tas, Vaajtswv yog tug Vaajntxwv kws muaj fwjchim! Hab nwgnuav tug Mexiyas kws Vaajtswv khaiv lug tub qha rua suavdlawg pum nwg lub fwjchim lawm! Rua qhov tug kws naj nub naj mo nkaug peb cov kwvtij ntseeg taabmeeg rua ntawm Vaajtswv tub raug muab pov sau ntuj lug lawm.

¹¹Tug Mivnyuas Yaaj cov ntshaav hab Vaajtswv txujlug kws peb qha tub ua rua puab kovyeej tug kws nkaug puab lawm. Txawm yog cov kwvtij ntawd yuav raug kev tuag los puab tsi khauvxwm puab txujsa le.

¹²Yog le ntawd, lub ntuj hab mej txhua tug kws nyob sau ntuj, mej ca le zoo sab hlo! Tabsis nplajteb hab havtxwv yuav raug kev txomnyem heev, rua qhov dlaab Ntxwgnyoog tub lug rua ntawm meb lawm. Dlaab Ntxwgnyoog chim kawg le, rua qhov nwg paub has tas nwg yuav tsi tau nyob ntev lawm.”

¹³Thaus tug zaaj ntawd ncu dlheev txug has tas, nwg tub lug rua huv nplajteb lawm, ces nwg txawm caum tug quaspuj kws yug tug mivtub ntawd qaab.

¹⁴Tabsis luas muab ob phob tis luj luj ib yaam le tis dlaav npoj rua tug quaspuj ntawd, kuas nwg yaa taug moog txug nwg lub chaw kws nyob tom taj suabpuam. Luas yuav tsomkwm tug quaspuj ntawd moog txug peb xyoos hab rau lub hlis, tsi pub tug zaaj ntawd ua phem tau rua nwg.

¹⁵Ces tug zaaj ntawd txawm txau dlej tawm huv nwg lub qhovncauj lug ib yaam le ib tug dlej luj luj ndlwg lawv tug quaspuj ntawd qaab, zaaj ua le ntawd kuas txhaj kuav tau tug quaspuj ntawd moog.

¹⁶Tabsis aav paab tug quaspuj ntawd, aav txawm ca le tawg pleb hab nqug cov dlej kws tawm huv tug zaaj ntawd lub qhovncauj lug taag lawm.

¹⁷Zaaj chim rua tug quaspuj ntawd heev, zaaj txhaj moog tawmtsaam tug quaspuj ntawd cov xeebntxwv kws tseem muaj nyob. Cov xeebntxwv ntawd yog txhua tug kws ua lawv le Vaajtswv txuj kevcai, hab muab sab npuab Yexus tej lug qha.

¹⁸Ces tug zaaj txawm moog sawv ntawm ntug havtxwv.