Read Hmong Njua Tshwmsim 13 Bible Online

Tshwmsim 13 - Hmong Njua bible

Tshwmsim 13

¹Tom qaab ntawd kuv pum ib tug tsaj tawm huv havtxwv tuaj. Tug tsaj ntawd muaj kaum tug kub hab muaj xyaa lub taubhau; kaum tug kub ntawd puavleej ntoo mom kub huv tuabsi, hab xyaa lub taubhau ntawd txhua lub puavleej muaj ib lub npe phem kawg le kws yog thuam Vaajtswv sau rua ntawd.

²Tug tsaj kws kuv pum ntawd zoo ib yaam le tug tsuv pomtxwv, nwg tej teg taw zoo le teg taw dlais, nwg lub qhovncauj zoo le tsuv ntxhuav lub. Tug zaaj ntawd muab hlo nwg lub fwjchim, nwg tug zug hab nwg lub zwmtxwv rua tug tsaj ntawd.

³Saib zoo le luas tub muab tug tsaj ntawd ib lub taubhau txav tu lawm, tabsis lub qhov txhaab tub zoo lawm. Tej tuabneeg kws nyob thoob plawg huv qaab ntuj nuav xaav tsi thoob le, ces puab txawm qaug sab rua tug zaaj ntawd.

⁴Tej tuabneeg puavleej tuaj pe tug zaaj, rua qhov nwg muab nwg lub fwjchim rua tug tsaj ntawd lawm. Hab puab tseem pe tug tsaj ntawd, puab has tas, “Leejtwg yuav muaj fwjchim npaum le tug tsaj nuav, hab leejtwg yuav tawmtsaam yeej nwg.”

⁵Luas ca tug tsaj ntawd has tej lug phem txobthuam Vaajtswv, hab ca tug tsaj muaj fwjchim ua le ntawd moog txug plaub caug ob lub hlis.

⁶Tug tsaj ntawd txawm pib tshev Vaajtswv, nwg thuam Vaajtswv lub npe, Vaajtswv lub chaw nyob, hab foom tsi zoo rua cov kws nyob sau ntuj ceebtsheej huv tuabsi.

⁷Luas ca tug tsaj ntawd tawmtsaam Vaajtswv tsaav tuabneeg hab luas ca nwg kovyeej puab. Luas tsaa nwg ua tug kaav taagnrho txhua lub tebchaws, tsi has xeem twg hab cov tuabneeg kws has yaam lug twg, hab tsaav tuabneeg twg los nwg kaav huv tuabsi.

⁸Tej tuabneeg kws nyob huv qaab ntuj nuav suavdlawg puavleej yuav pe tug tsaj ntawd. Tsuas yog tshwj cov tuabneeg kws thaus tsi tau tsim ntuj tsim teb, luas tub sau puab tej npe rua huv phoo ntawv kws sau cov tuabneeg muaj txujsa ntev dlhawv moog ibtxhis lawm tej npe. Phoo ntawv ntawd yog tug Mivnyuas Yaaj kws tub raug luas muab tua lawm phoo.

⁹“Yog mej leejtwg muaj qhovntsej, ca le khaws tej lug nuav ca!

¹⁰Tsi has leejtwg los thaus txug nub kws nwg yuav raug luas nteg moog, luas yeej yuav nteg nwg coj moog; thaus txug nub kws nwg raug luas muab ntaaj tua, nwg yeej yuav raug. Yog le ntawd Vaajtswv cov tuabneeg yuav tau ua sab ntev, hab muab sab rau ntseeg.”

¹¹Hab tom qaab ntawd kuv pum muaj dlua ib tug tsaj tawm huv aav lug. Nwg muaj ob tug kub zoo le mivnyuas yaaj tug, nwg has lug ib yaam le tug zaaj has.

¹²Thaus nwg lug nwg siv lub fwjchim luj kws thawj tug tsaj muab rua nwg. Nwg yuam lub nplajteb hab tej tuabneeg kws nyob huv nplajteb pe thawj tug tsaj kws tej qhov txhaab tub zoo taag lawm.

¹³Tug tsaj kws yog tug ob nuav los ua tau tej txujci luj kws suavdlawg xaav tsi thoob le hab; nwg ua kuas suavtawg poob sau ntuj lug rua huv nplajteb nuav taabmeeg suavdlawg.

¹⁴Nwg ua tej txujci luj ntawd dlaag ntxag tuabneeg nplajteb. Luas pub nwg ua tej txujci ntawd taabmeeg ntawm thawj tug tsaj. Hab luas yuam kuas tuabneeg nplajteb puab ib tug mlom zoo le thawj tug tsaj kws raug luas muab ntaaj tua, tabsis caj sa rov lug lawm ntawd.

¹⁵Luas ca tug tsaj kws yog tug ob ntawd rau sav rau paa rua tug mlom kws muaj yaam ntxwv zoo le thawj tug tsaj, ces tug mlom ntawd txawm txawj has lug, hab moog muab cov tuabneeg kws tsi kaam pe tug mlom ntawd tua povtseg.

¹⁶Tug tsaj ob ntawd yuam tej tuabneeg, tsi has tug hlub tug yau, tug muaj tug pluag, tug ua qhev lossis tug tsi ua qhev, kuas moog nas homthawj rua ntawm puab saab teg xis lossis ntawm hauvplaj.

¹⁷Lub homthawj ntawd yog tug tsaj ntawd lub npe. Yog leejtwg tsi muaj lub homthawj ntawd lossis tsi muaj cov lej xaamphaaj kws qha has tas yog tug tsaj ntawd lub npe, ces tug ntawd yuav tsi tau lossis muag tsi tau ib yaam dlaabtsi hlo le.

¹⁸Tug kws muaj tswvyim, nwg yeej yuav paub has tas, tug tsaj ntawd cov lej xaamphaaj yog le caag, rua qhov cov lej xaamphaaj ntawd yeej pev txug ib tug txivneej lub npe. Cov lej xaamphaaj ntawd yog rau pua rau caum rau.