Read Hmong Njua Tshwmsim 14 Bible Online

Tshwmsim 14 - Hmong Njua bible

Tshwmsim 14

¹Tom qaab ntawd kuv saib dlheev, kuv pum tug Mivnyuas Yaaj sawv sau lub Roob Xi-oos; hab pum ib puas plaub caug plaub txheeb leej kws muaj tug Mivnyuas Yaaj hab nwg Txiv lub npe nas rua ntawm puab hauvplaj, puab nrug tug Mivnyuas Yaaj sawv ua ke.

²Kuv nov ib lub suab has sau ntuj tuaj nrov ib yaam le lub suab dlej tsaws tsaag hab nrov le xub nroo. Lub suab ntawd nrov ib yaam le lub suab nkauj nogncaas kws luas taabtom qoj.

³Cov tuabneeg ib puas plaub caug plaub txheeb leej ntawd sawv tig xubndlag rua ntawm lub zwmtxwv hab ntawm cov qhelunpees hab cov txwjlaug; puab hu ib zaaj nkauj tshab kws tsi muaj leejtwg kawm tau, tsuas yog cov kws Vaajtswv tub txhwv tawm huv nplajteb lawm txhaj kawm tau xwb.

⁴Puab yog cov kws ceev tau puab lub cev kuas huv, hab puab tsi tau nrug dlua quaspuj pw le; puab yog nraugxwb. Puab nrug nraim tug Mivnyuas Yaaj ua ke. Puab yog cov kws Vaajtswv tub xub txhwv tawm huv txhua tsaav tuabneeg lug lawm, puab yog thawj paab kws luas muab fij rua Vaajtswv hab rua tug Mivnyuas Yaaj.

⁵Cov tuabneeg ntawd yog cov kws yeej tsi tau has lug dlaag hab tsi tau ua ib qhov txhum le.

⁶Ces kuv txawm pum ib tug timtswv ceebtsheej yaa sau nruab ntug, nwg coj Txujmoo Zoo kws nyob moog ibtxhis lug qha rua tej tuabneeg kws nyob thoob plawg lub qaab ntuj nuav, tsi has tsaav tuabneeg twg, xeem twg hab cov tuabneeg kws has yaam lug twg los nwg qha txhua tug huv tuabsi.

⁷Nwg has nrov nrov has tas, “Mej yuavtsum fwm Vaajtswv hab qhuas has tas Vaajtswv yog tug kws muaj fwjchim luj kawg nkaus! Rua qhov tub txug lub sijhawm kws Vaajtswv yuav txav txim rua txhua tsaav tuabneeg huv nplajteb nuav lawm. Yog le ntawd mej ca le txhus caug ndlua pehawm tug Vaajtswv kws yog tug tsim lub ntuj hab lub nplajteb, tsim havtxwv hab tej dlej cag huv tuabsi!”

⁸Muaj dlua ib tug timtswv ceebtsheej kws yog tug ob yaa lawv thawj tug timtswv qaab lug. Thaus nwg tseem taabtom yaa nwg has tas, “Lub nroog Npanpiloos kws luj tshaaj plawg tub qaug lawm! Lub nroog ntawd yuam txhua tsaav tuabneeg kuas suavdlawg haus cov cawv txiv maab qaab qaab kws pev txug lub nroog ntawd tej kev phem kev qas!”

⁹Tug timtswv ceebtsheej kws yog tug peb yaa lawv tug ob qaab lug. Thaus nwg tseem taabtom yaa, nwg has nrov nrov has tas, “Cov tuabneeg kws pe tug tsaj hab tug mlom kws muaj yaam ntxwv zoo le tug tsaj ntawd, hab muaj tug tsaj ntawd lub cim nas rua ntawm nwg hauvplaj hab ntawm nwg txhais teg,

¹⁰puab yuavtsum haus Vaajtswv cov cawv txiv maab kws yeej tsi muaj ib yaam dlaabtsi tov le kws Vaajtswv muab laub rua huv Vaajtswv lub khob dlej ab dlej dlaw. Cov cawv txiv maab ntawd pev txug qhov kws Vaajtswv txav txim rua puab. Txhua tug kws haus yuav raug kev txomnyem huv cov nplaim tawg leejfaaj taabmeeg cov timtswv ceebtsheej kws dlawbhuv hab tug Mivnyuas Yaaj.

¹¹Cov paa tawg kws tsimtxom puab ntawd yuav nchu moog ibtxhis. Txhua tug kws pe tug tsaj hab tug mlom kws muaj yaam ntxwv zoo le tug tsaj ntawd hab muaj lub cim kws qha tug tsaj ntawd lub npe nas rua puab lawm, yuav nyob tsau rawv huv txujkev tsimtxom taag nub taag mo moog ibtxhis le.”

¹²Yog le ntawd Vaajtswv tsaav tuabneeg yuavtsum ua sab ntev, Vaajtswv cov tuabneeg yog cov kws coj lawv le Vaajtswv txuj kevcai hab muab sab npuab Yexus.

¹³Hab kuv nov ib lub suab has sau ntuj tuaj rua kuv has tas, “Koj ca le sau has le nuav: Txij nuav moog cov tuabneeg kws ua Vaajtswv teg num kws raug luas muab tua lawm, puab yuav tau nyob kaaj sab lug!” Vaaj Ntsujplig txawm teb has tas, “Yeej yog le ntawd tag! Puab yuav tso puab tej num khwv khwv tseg, rua qhov puab yeej yuav tau nqe zug rua tej num kws puab tau ua lug lawm.”

¹⁴Kuv saib dlheev kuv txawm pum ib tauv fuab dlawb dlawb, muaj ib tug zoo le tuabneeg nyob sau tauv fuab ntawd, nwg ntoo ib lub mom kub, nwg txhais teg tuav rawv ib raab lag ntse ntse.

¹⁵Ces txawm muaj ib tug timtswv ceebtsheej tawm huv lub tuamtsev tuaj, nwg has nrov nrov rua tug kws nyob sau tauv fuab dlawb has tas, “Koj ca le muab koj raab lag hlais tej qoobloo kws nyob huv nplajteb, rua qhov tej qoobloo ntawd tub sav taag hab tub txug caij hlais lawm!”

¹⁶Ces tug kws nyob sau tauv fuab txawm cev nwg raab lag lug hlais tej qoobloo kws nyob huv nplajteb nuav taag huv tuabsi.

¹⁷Kuv pum dlua ib tug timtswv ceebtsheej tawm huv lub tuamtsev kws nyob sau ntuj tuaj, nwg tuav rawv ib raab lag ntse ntse hab.

¹⁸Hab muaj dlua ib tug timtswv ceebtsheej kws saib suavtawg, nwg tawm ntawm lub thaaj tuaj. Nwg has nrov nrov rua tug timtswv kws tuav raab lag has tas, “Koj ca le muab koj raab lag hlais tej tauv txiv maab kws nyob huv nplajteb, rua qhov tej txiv maab ntawd tub sav zoo hlais lawm!”

¹⁹Tug timtswv ntawd txawm cev nwg raab lag lug rua huv nplajteb hab hlais hlo tej tauv txiv maab pov rua huv lub qhov tsuam txiv maab kws pev txug Vaajtswv txujkev txav txim.

²⁰Luas muab tej txiv maab tsuam rua huv lub qhov tsuam txiv maab kws nyob ntawm ntug nroog, txawm muaj ntshaav tawm huv lub qhov ntawd ndlwg moog dleb le peb puas neeg nkaum kilumev kev hab sab txij neeg nplooj pus.