Read Hmong Njua Tshwmsim 16 Bible Online

Tshwmsim 16 - Hmong Njua bible

Tshwmsim 16

¹Kuv nov ib lub suab has nrov nrov huv lub tuamtsev tuaj rua xyaa tug timtswv ceebtsheej ntawd has tas, “Mej ca le moog muab xyaa lub taig kws ntim Vaajtswv txujkev rau txim laub rua huv nplajteb!”

²Thawj tug timtswv ceebtsheej muab nwg lub taig laub rua huv nplajteb. Ces cov tuabneeg kws muaj tug tsaj hab tug mlom kws muaj yaam ntxwv zoo le tug tsaj ntawd lub cim nas rua hab pe tug tsaj ntawd txawm mob rwj thoob plawg ib ce huv tuabsi.

³Tom qaab ntawd tug timtswv ceebtsheej kws yog tug ob muab nwg lub taig laub rua huv havtxwv. Ces dlej txawm txa ua ntshaav zoo le tej ntshaav tuabneeg tuag, hab txhua yaam muaj sa kws nyob huv havtxwv puavleej tuag taag huv tuabsi.

⁴Tug timtswv ceebtsheej kws yog tug peb muab nwg lub taig laub rua huv txhua tug dlej luj hab txhua lub qhovdlej txhawv, ces tej dlej ntawd txawm txa ua ntshaav taagnrho.

⁵Kuv nov tug timtswv kws saib tej dlej has tas, “Tug Tswv kws Dlawbhuv, koj yog tug muaj sa nyob hab yog tug kws ibtxwm nyob thaus u lug, koj tub txav txim ncaaj rua tej ntawd lawm!

⁶Qhov kws koj muab ntshaav rua puab haus, nyavnyuas hum qhov kws puab muab koj cov tuabneeg hab koj cov cevlug tua povtseg lawm!”

⁷Ces kuv nov ib lub suab has ntawm lub thaaj fij tuaj has tas, “Yog tag, tug Tswv kws yog Vaajtswv, koj yog tug kws muaj Fwjchim Luj kawg nkaus! Koj txav txim ncaaj nceeg hab lawv le qhov tseeb!”

⁸Tom qaab ntawd, tug timtswv ceebtsheej kws yog tug plaub txawm muab nwg lub taig laub rua sau lub nub, ces tej dluab tshaav ntuj ca le kub tej tuabneeg ib yaam le suavtawg kub.

⁹Cov tuabneeg kws raug tej dluab tshaav ntuj ntawd kub txawm tshev Vaajtswv tug kws muaj fwjchim luj dlua tej sub tawg sub ntshaa ntawd lub npe. Txawm yog puab raug tshaav ntuj kub los puab tseem tsi tso puab tej kev txhum tseg hab tsi fwm Vaajtswv le.

¹⁰Tom qaab ntawd tug timtswv ceebtsheej kws yog tug tsib txawm muab nwg lub taig laub rua sau tug tsaj ntawd lub zwmtxwv. Ces lub tebchaws kws tug tsaj ntawd kaav txawm tsaus ntuj nti, hab tej tuabneeg puavleej tum nplaig ntxig, rua qhov mob puab heev,

¹¹ces puab txawm tshev Vaajtswv tug kws nyob sau ntuj, rua qhov puab tej rwj mob ncug quas nco. Txawm yog mob puab npaum le ntawd los puab yeej tsi tso puab tej kev phem kev qas tseg le.

¹²Tom qaab ntawd, tug timtswv ceebtsheej kws yog tug rau muab nwg lub taig laub rua tug Dlej luj Efalates. Ces tug dlej ntawd txawm nqhuab kag ua kev qhuav qhawv rua cov vaajntxwv kws nyob saab nubtuaj tau kev tuaj.

¹³Ces kuv txawm pum peb tug ntsujplig phem qas kws muaj yaam ntxwv zoo le tug qaav tawm huv tug zaaj, huv tug tsaj hab huv tug cevlug cuav lub qhovncauj lug.

¹⁴Puab yog cov ntsujplig ntawm cov dlaab kws ua tau tej txujci luj kws xaav tsi thoob. Peb tug ntsujplig ntawd moog cuag txhua tug vaajntxwv kws nyob huv nplajteb nuav, hab coj puab tuaj ua ke ua rog rua Nub tseemceeb kws Vaajtswv tug kws muaj Fwjchim Luj kawg nkaus teem ca lawm.

¹⁵“Mej ca le ua tuab zoo noog kuv tej lug! Kuv yuav lug ib yaam le tug tubsaab tuaj! Tug kws ceevfaaj zuv tog, hab txuag nwg cev rig tsho kuas zoo, nwg yuav tau nyob kaaj sab lug. Nwg tsi labqaab, nwg yuav muaj ntsejmuag moog rua nuav rua u, tsi txaajmuag rua leejtwg le!”

¹⁶Tom qaab ntawd peb tug dlaab txawm coj cov vaajntxwv tuaj nyob ua ke ntawm ib qhov chaw kws lug Henplais hu ua Amankedoos!

¹⁷Ces tug timtswv ceebtsheej kws yog tug xyaa maam muab nwg lub taig laub rua sau nruab ntug. Ces txawm muaj ib lub suab has nrov nrov ntawm Vaajtswv lub zwmtxwv kws nyob huv lub tuamtsev tuaj has tas, “Tav lawm lauj!”

¹⁸Ces tsaglig xub txawm laim lab pis vog, xub nrov nroo quas ntwg, hab muaj aav qeeg luj. Txij thaus tsim tuabneeg lug txug naj nub nua yeej tsi tau muaj dlua aav qeeg luj le zag nuav le!

¹⁹Lub nroog kws luj kawg nkaus tej aav txawm tawg rhe ua peb feem, hab tej nroog kws nyob huv txhua lub tebchaws puavleej puamtsuaj taag huv tuabsi. Tej ntawd ua rua suavdlawg paub has tas, Vaajtswv ncu ntsoov lub nroog Npanpiloos kws luj kawg nkaus, hab muab Vaajtswv khob cawv txiv maab kws pev txug Vaajtswv txujkev txav txim rua lub nroog ntawd haus.

²⁰Txhua lub koog povtxwv hab txhua lub roob puavleej yaaj hab pluj taagnrho.

²¹Muaj tej lub lawg luj luj kws nyaav txug plaub caug tsib kilus poob sau ntuj lug raug tej tuabneeg. Suavdlawg txawm tshev Vaajtswv, rua qhov puab raug tej sub tawg sub ntshaa kws lawg ntaus, tej ntawd ua rua puab raug kev txomnyem kawg le.