Read Hmong Njua Tshwmsim 18 Bible Online

Tshwmsim 18 - Hmong Njua bible

Tshwmsim 18

¹Tom qaab ntawd kuv pum dlua ib tug timtswv ceebtsheej lug sau ntuj lug. Nwg muaj fwjchim hab ci ntsaa ab rua lub nplajteb.

²Nwg has nrov nrov has tas, “Lub nroog Npanpiloos kws luj dlua ndlais tub qaug lawm! Nwg tub qaug lawm! Nwgnuav tej dlaab hab tej ntsujplig phem tub lug nyob huv lub nroog ntawd lawm; txhua yaam noog kws phem hab qas los lug nyob huv lub nroog ntawd lawm hab.

³Rua qhov lub nroog ntawd yog lub kws cug cawv txiv maab lug yuam rua txhua tsaav tuabneeg haus. Cov cawv txiv maab kws qaab qaab ntawd pev txug lub nroog ntawd tej kev phem kev qas. tej vaajntxwv kws nyob huv nplajteb nuav tuaj nrug nwg sis ntxag, hab tej tub laag tub luam kws nyob huv nplajteb npluanuj taag, tub yog vim tej kev phem kev qas kws lub nroog ntawd ua tsi paub dlhuav le!”

⁴Tom qaab ntawd kuv rov nov dlua ib lub suab has sau ntuj tuaj has tas: “Kuv tsaav tuabneeg, mej ca le tawm plawg huv lub nroog ntawd moog! Mej tsi xob nrug tug quaspuj ntawd ua txhum; mej txhaj le tsi nrug nwg raug txim!

⁵Rua qhov nwg tej kev txhum tub tib moog nto ntuj lawm, hab Vaajtswv yeej ncu ntsoov tej kev phem kev qas kws lub nroog ntawd naj nub ua.

⁶Nwg ua le caag rua mej lawm, mej ca le ua le ntawd rov rua nwg; Mej yuavtsum ua ntau tshaaj ib npaug pauj tej kws nwg tau ua rua mej lawm. Nwg tub dlu cov tshuaj ab rua mej haus lawm, mej yuavtsum dlu cov tshuaj kws ab dlua nwg cov ib npaug rua nwg haus.

⁷Nwg zoo sab hab npluanuj heev npaum le caag, mej ca le ua kuas nwg tau kev ntxhuv sab hab raug kev txomnyem heev npaum le ntawd. Rua qhov nwg pheej xaav has tas, ‘Kuv nyob ntawm nuav, kuv tub zoo ib yaam le tug puj vaajntxwv lawm! Kuv tsi yog puj ntsuag. Kuv yuav tsi raug kev txomnyem ib zag le!’

⁸Yog le ntawd, tuab nub xwb tej sub tawg sub ntshaa yuav lug raug nwg; tsi has kev mob kev nkeeg, kev ntxhuv sab hab kev tshaib kev nqhes puavleej yuav raug nwg, hab suavtawg yuav kub nwg taag huv tuabsi. Rua qhov tug Tswv kws yog Vaajtswv tug kws rau txim rua lub nroog ntawd, nwg yog tug kws muaj fwjchim luj kawg nkaus.”

⁹Tej vaajntxwv huv nplajteb kws nrug lub nroog ntawd sis ntxag hab ua kev phem kev qas, thaus puab pum lub nroog kub nyab paa tawg nchu auv nab, puab yuav quaj nyav ntsoog qeeg.

¹⁰Puab tuaj dleb dleb saib, rua qhov puab tsi xaav pum lub nroog ntawd raug kev puamtsuaj. Puab seev has tas, “Lub nroog Npanpiloos kws luj hab nto moo, koj tub puamtsuaj lawm lauj! Nyavnyuas tuab txoog teev xwb koj txawm ca le raug txim lawm!”

¹¹Tej tub laag tub luam kws nyob huv nplajteb nuav los quaj nyav ntsoog qeeg rua lub nroog ntawd, vim tsi muaj tuabneeg tuaj yuav puab tej khoom lawm;

¹²tsi muaj leejtwg yuav puab tej nyaj tej kub, tej qai zeb ci ci kws muaj nqes, tej hlaws, tej ntaub maag zoo zoo, ntaub xav, ntaub tshwbkaab, ntaub lab hab tej ntoo kws muaj nqes, tej kws muab kaug ntxhw ua, tej kws muab tooj dlaag, muab hlau hab muab hlaws txaij ua;

¹³tej roj ntoos tsw qaab, tej fwjtxob, tej moov tshuaj tsw qaab, tej nroj tsw qaab, tej tshuaj tsw qaab, tej cawv txiv maab, tej roj, tej moov nplej, tej moov pobkws, tej nyuj, tej yaaj, tej neeg, tej tsheb neeg hab tej tubqhe, txawm yog tuabneeg txujsa los tsi muaj leejtwg xaav yuav.

¹⁴Tej tub laag tub luam has rua lub nroog ntawd has tas, “Txhua tsaav yaam zoo kws koj ntshaw tub pluj taag lawm, koj tej qhov txhua chaw hab tej nyaj tej kub kws ci ntsaa ab los puavleej poob taag. Koj yuav nrhav tsi tau tej ntawd rov lug dlua ib zag le lawm!”

¹⁵Tej tub laag tub luam kws ua luam npluanuj huv lub nroog ntawd, puab yuav tuaj dleb dleb saib, rua qhov puab tsi xaav pum lub nroog ntawd raug kev puamtsuaj. Puab yuav quaj nyav ntsoog qeeg

¹⁶hab seev zum zawg has tas, “Lub nroog kws luj, koj tub puamtsuaj taag lawm! Koj puamtsuaj lawm lauj! Koj ibtxwm naav tej tsoog tsho ntaub maag zoo zoo, ntaub xav, ntaub lab, koj coj saw nyaj saw kub, coj tej qai zeb ci ci kws muaj nqes, hab coj hlaws thoob plawg ib ce!

¹⁷Ua le caag tuab txoog teev xwb, koj txujkev npluanuj txawm ca le pluj ndlais moog lawm!” Tej tuabneeg tsaav nkoj, tej tuabneeg caij nkoj, tej tuabneeg ua num huv lub nkoj hab tej tuabneeg kws nrhav noj huv havtxwv txhua tug puavleej tuaj dleb dleb saib,

¹⁸thaus puab pum lub nroog ntawd kub nyab paa nchu auv nab, puab qw nrov nrov has tas, “Ibtxwm yeej tsi muaj ib lub nroog luaj le lub nuav!”

¹⁹Puab tsuab moov aav rua sau puab taubhau, puab quaj nyav ntsoog qeeg has tas, “Lub nroog kws luj, koj puamtsuaj lawm! Koj puamtsuaj lawm lauj! Lub nroog nuav yog lub kws ua rua tej tuabneeg muaj nkoj dlha moog dlha lug huv havtxwv npluanuj taag! Ua le caag tuab txoog teev xwb, txhua tsaav yaam kws koj muaj huv lub nroog nuav txawm siv pluj taag huv tuabsi lawm.”

²⁰Lub ntuj, koj ca le zoo sab, rua qhov lub nroog nuav tub puamtsuaj taag lawm! Vaajtswv cov tuabneeg, cov timthawj, hab cov cev Vaajtswv lug, ca le zoo sab! Rua qhov Vaajtswv tub rau txim rua lub nroog kws tsimtxom mej lawm!

²¹Ces ib tug timtswv ceebtsheej kws muaj fwjchim txawm muab ib lub pobzeb kws luaj le ib txhib zeb pov rua huv havtxwv, hab nwg has tas, “Luas yuav muab lub nroog Npanpiloos kws luj dlua ndlais ntawd ua kuas puamtsuaj taag ib yaam le luas muab lub pobzeb nuav ntsawm. Txij nuav moog yuav tsi muaj leejtwg pum lub nroog nuav le lawm.

²²Yuav tsi muaj leejtwg nov suab raaj suab xyu hab suab nkauj nogncaas nrov huv lub nroog nuav le lawm. Yuav tsi muaj leejtwg ua vaaj ua tsev, nchuav tooj nchuav hlau, hab yuav tsi muaj suab zum zeb tuav cug nrov le lawm!

²³Yuav tsi muaj leejtwg pum teeb cig huv lub nroog nuav; hab yuav tsi muaj leejtwg nov nkauj nyaab nraug vauv lub suab le lawm. Tej tub laag tub luam kws nyob huv lub nroog nuav puavleej yog cov kws muaj tswvyim luj dlua tej tub laag tub luam huv nplajteb nuav huv tuabsi. Hab lub nroog nuav tau ua khawvkoob dlaag ntxag txhua tsaav tuabneeg huv nplajteb nuav kuas qaug sab rua nwg!”

²⁴Lub nroog Npanpiloos raug txim, rua qhov nwg muab cov kws cev Vaajtswv lug hab Vaajtswv cov tuabneeg kws nyob huv nplajteb nuav tua povtseg taag lawm.