Read Hmong Njua Tshwmsim 2 Bible Online

Tshwmsim 2 - Hmong Njua bible

Tshwmsim 2

¹“Koj sau tej kws kuv yuav qha rua koj nuav xaa moog rua tug timtswv kws saib pawg ntseeg huv lub nroog Efexus has tas, “Tug kws tuav rawv xyaa lub nubqub huv nwg txhais teg xis, hab moog moog lug lug huv nruab nraab xyaa tug ncej kub txawb teeb has le nuav tas:

²“Kuv tub paub txhua yaam kws mej ua taag lug lawm. Kuv paub has tas mej ua num khwv khwv, hab ua sab ntev ua. Kuv paub has tas mej ua tsi taug sab ntev rua cov tuabneeg kws ua phem lawm, hab mej tub sim cov tuabneeg kws puab has tas puab yog cov timthawj lawm saib puab yog tag los tsi yog, hab mej paub has tas, puab tsi yog cov timthawj, puab yog tuabneeg dlaag xwb.

³Mej cov kws ntseeg kuv, txawm yog mej raug kev txomnyem los mej tseem ua sab ntev tiv hab tsi tso kuv tseg.

⁴Tabsis tshuav ib qho kws kuv tsi qhuas mej: Yaav taag lug mej yeej hlub kuv, tabsis nwgnuav mej tsi hlub kuv lawm.

⁵Mej yuavtsum ncu ntsoov has tas, mej tub yuam kev moog ua txhum ntau kawg le lawm! Yog le ntawd, mej yuavtsum tso mej tej kev txhum tseg, hab rov lug noog kuv lug le qub. Yog mej tsi tso mej tej kev txhum tseg, kuv yuav lug saib mej, hab muab mej tug ncej txawb teeb rhu tawm ntawm nwg qhov chaw moog.

⁶Tabsis muaj ib qhov kws kuv qhuas mej, qhov ntawd yog mej ntxub tej kws cov tuabneeg Nikaulaites ua ib yaam le kuv ntxub.

⁷“Yog mej leejtwg muaj qhovntsej, ca le noog tej lug kws Vaaj Ntsujplig qha rua cov ntseeg! “Kuv yuav pub tug kws kovyeej moog noj tsob txiv ntoo kws cawm tau tuabneeg txujsa kws nyob huv Vaajtswv lub Vaaj.

⁸“Koj sau tej kws kuv yuav qha rua koj nuav xaa moog rua tug timtswv kws saib pawg ntseeg huv lub nroog Xaminas has tas, “Tug kws yog lub hauvpaug hab yog lub ntsis, tug kws tub tuag hab sawv huv qhov tuag rov qaab lug lawm has tas,

⁹Kuv paub mej raug kev txomnyem; kuv paub has tas mej yog tuabneeg pluag, tabsis qhov tseeb mej yog tuabneeg npluanuj! Kuv paub cov tuabneeg sab phem kws has lug phem tawmtsaam mej, puab has tas puab yog tuabneeg Yudais, tabsis puab tsi yog; puab cov ntawd puavleej yog cov kws dlaab Ntxwgnyoog kaav!

¹⁰Mej tsi xob ntshai qhov kws mej yuav raug kev txomnyem. Mej ca le ua tuab zoo noog kuv tej lug! Dlaab Ntxwgnyoog yuav nteg mej cov qee leej coj moog kaw rua huv tsev lojcuj, sim saib mej yuav ua le caag. Mej yuav raug kev txomnyem kaum nub, tabsis mej yuavtsum muab sab rau ntseeg moog txug nub tuag, tsi xob tso kuv tseg, kuv txhaj yuav pub lub mom kub kws yog txujsa ua nqe zug rua mej.

¹¹“Yog mej leejtwg muaj qhovntsej, ca le noog tej lug kws Vaaj Ntsujplig qha rua cov ntseeg! “Tug kws kovyeej yuav tsi raug txujkev tuag zag ob.

¹²“Koj sau tej lug kws kuv yuav qha rua koj nuav xaa moog rua tug timtswv kws saib pawg ntseeg huv lub nroog Penkamus has tas: “Tug kws muaj raab ntaaj ob saab ntse has le nuav:

¹³Kuv yeej paub mej qhov chaw nyob, qhov chaw ntawd yog qhov chaw kws puab ua ib lub zwmtxwv rua dlaab Ntxwgnyoog nyob, tabsis mej tseem muab sab rau ntseeg kuv tsi tso kuv tseg. Txawm yog mej tub pum puab muab Aatipas tug kws ua timkhawv ncaaj nceeg tua rua ntawm qhov chaw kws dlaab Ntxwgnyoog nyob los mej tseem ntseeg mej le qub.

¹⁴Tabsis tshuav ob peb qho kws kuv tsi qhuas mej: rua qhov mej cov muaj qee leej xyum ua lawv le tej kws Npala-aas qha. Npala-aas yog tug kws qha rua Vaajntxwv Npalaj has tas, ‘Yog koj xaav kuas cov Yixalayees yuam kev ua txhum, koj ca le has kuas puab noj tej zaub mov kws luas muab fij rua tej dlaab tej mlom lawm hab kuas puab ua kev nkauj kev nraug.’

¹⁵Hab txawm yog mej cov los tub muaj qee leej ua lawv le cov tuabneeg Nikaulaites tej lug qha lawm hab.

¹⁶Yog le ntawd, mej ca le tso plhuav mej tej kev txhum tseg! Yog mej tsi tso, kuv yuav lug saib mej sai sai, hab kuv yuav muab raab ntaaj kws tawm huv kuv qhovncauj tuaj tua cov tuabneeg ntawd povtseg.

¹⁷“Yog mej leejtwg muaj qhovntsej, ca le noog tej lug kws Vaaj Ntsujplig qha rua cov ntseeg! “Kuv yuav muab cov manas kws kuv tub muab zais ca lawm rua tug kws kovyeej noj. Hab kuv yuav muab tej pobzeb dlawb rua puab txhua tug ib leeg ib lub hab muaj ib lub npe tshab sau rua ntawm lub pobzeb ntawd. Tsi muaj leejtwg paub tej npe ntawv ntawd le, tsuas yog tug kws tau lub pobzeb ntawd txhaj paub xwb.

¹⁸“Koj sau tej kws kuv yuav qha rua koj nuav xaa moog rua tug timtswv kws saib pawg ntseeg huv lub nroog Thiyatilas has tas: “Vaajtswv tug Tub kws lub qhovmuag ci ib yaam le nplaim tawg, hab kutaw ci ib yaam le tej tooj dlaag kws luas tub muab txhuam ci ci lawm has le nuav:

¹⁹Kuv paub tej kws mej naj nub ua. Kuv paub has tas mej muaj lub sab hlub luas, mej muab sab rau ntseeg, mej rau sab ntso ua Vaajtswv teg num, hab mej ua taug sab ntev. Nwgnuav mej muab sab rau ua Vaajtswv teg num heev dlua yaav taag lug lawm hab.

²⁰Tabsis tshuav ib qho kws kuv tsi qhuas mej: qhov ntawd yog mej ca tug quaspuj kws hu ua Yexenpees qha mej. Tug quaspuj ntawd khaav has tas nwg yog ib tug cev Vaajtswv lug. Nwg qha hab nwg ntxag kuv cov tubkhai kuas puab ua kev nkauj kev nraug hab kuas puab noj tej zaub mov kws luas tub muab fij rua tej mlom lawm.

²¹Kuv ca sijhawm rua nwg tso nwg tej kev txhum tseg, tabsis nwg tsi kaam tso tej kev nkauj kev nraug kws nwg ua ntawd tseg le.

²²Yog le ntawd, kuv yuav muab tug quaspuj nuav pov rua sau lub laav mob, cov tuabneeg kws nrug nwg sis ntxag yuav nrug nwg raug kev txomnyem heev kawg nkaus le. Yog puab tsi muab tej kev phem kws puab nrug tug quaspuj ntawd ua tso tseg, ces kuv yuav ua le ntawd rua puab taamsim nuav ntaag,

²³hab kuv yuav muab tug quaspuj ntawd cov mivnyuas tua povtseg; cov ntseeg kws nyob txhua qhov chaw txhaj yuav paub has tas, kuv yog tug kws paub tuabneeg lub sab xaav le caag hab nyam le caag. Kuv yuav muab nqe zug rua mej txhua tug kuas tsimnyog tej num kws mej tau ua lug lawm.

²⁴“Tabsis mej cov kws nyob huv lub nroog Thiyatilas, muaj ibtxha yeej tsi tau coj lawv le tej lug qha kws phem ntawd hab tsi tau kawm tej kws luas has tas, ‘Tej nuav yog dlaab Ntxwgnyoog tej ntsab lug kws tsi muaj tuabneeg paub.’ Kuv qha rua mej has tas, kuv yuav tsi muab lwm lub nraa lug ntxiv rua mej lub lawm.

²⁵Tabsis mej yuavtsum tuav tej kws mej muaj lawm ruaj ruaj moog txug nub kws kuv rov qaab lug.

²⁶Txhua tug kws kovyeej hab ua lawv le kuv lub sab nyam moog txug nub kawg, kuv yuav pub fwjchim rua cov ntawd, ib yaam le kuv Txiv tub pub rua kuv lawm. Kuv yuav tsaa cov ntawd ua cov kws kaav txhua tsaav tuabneeg huv tuabsi. Puab yuav muab qws hlau kaav hab ntaus txhua tsaav tuabneeg kuas tawg mog nyoos ib yaam le tej laujkaub aav. Hab kuv yuav muab lub nubqub kws ci ci thaus yuav kaaj ntug rua cov tuabneeg ntawd.

²⁹“Yog mej leejtwg muaj qhovntsej ca le noog tej lug kws Vaaj Ntsujplig qha rua cov ntseeg!