Read Hmong Njua Tshwmsim 20 Bible Online

Tshwmsim 20 - Hmong Njua bible

Tshwmsim 20

¹Tom qaab ntawd kuv pum ib tug timtswv ceebtsheej lug sau ntuj lug, nwg coj tug yumsij kws qheb lub qhov tub tub, hab nwg tuav ib txuj saw hlau luj luj.

²Nwg muab tug zaaj kws yog tug naab txwj naab laug kws suavdlawg hu ua dlaab Ntxwgnyoog lossis hu ua Xataas, khi kag ca ib txheeb xyoo.

³Tug timtswv ntawd muab tug zaaj pov rhees rua huv lub qhov tub tub. Nwg muab ntsugphoo ntsug hab nas homthawj rua, kuas tug zaaj tsi tau kev lug ntxag txhua tsaav tuabneeg ib txheeb xyoo. Tom qaab kws dlhau ib txheeb xyoo lawm, maam le tso tug zaaj ntawd tawm lug ib nyuas ntu.

⁴Tom qaab ntawd kuv pum ntau lub zwmtxwv hab pum cov tuabneeg kws nyob sau cov zwmtxwv ntawd tub tau lub fwjchim ua cov txav txim lawm. Hab kuv pum cov tuabneeg kws luas muab txav cejdlaab tuag lawm cov ntsujplig. Puab raug tua rua qhov puab qha tej lug tseeb kws Yexus qha rua puab hab puab qha Vaajtswv txujlug. Puab yeej tsi pe tug tsaj hab tug mlom kws muaj yaam ntxwv zoo le tug tsaj ntawd, puab tsi muaj tug tsaj ntawd lub cim nas rua ntawm puab hauvplaj lossis ntawm puab txhais teg. Puab nrug Yexus Khetos nyob hab nrug nwg kaav ib txheeb xyoo.

⁵(Dlua le tej, puab yuavtsum tog kuas dlhau ib txheeb xyoo tsaiv, puab maam le sawv huv qhov tuag rov lug.) Cov tuabneeg kws raug luas muab txav cejdlaab yog thawj cov kws sawv huv qhov tuag rov qaab lug.

⁶Thawj paab kws sawv huv qhov tuag rov lug nuav, puab tau nyob kaaj sab lug. Txujkev tuag zag ob tsi muaj fwjchim yuam tau puab lawm. Puab yuav ua Vaajtswv hab ua Yexus Khetos cov povthawj hab puab yuav nrug Yexus kaav ib txheeb xyoo.

⁷Tom qaab kws dlhau ib txheeb xyoo lawm, luas maam le qheb lub qhov hab tso dlaab Ntxwgnyoog tawm lug,

⁸thaus nwg tawm lug, nwg yuav moog dlaag ntxag txhua tsaav tuabneeg kws nyob plaub ceg kaum ntuj. Cov tuabneeg ntawd hu ua Nkaus hab Mankaus. Dlaab Ntxwgnyoog yuav sau txhua tug huv tuabsi tuaj ua rog, cov tuabneeg kws tuaj ntawd coob ib yaam le tej xuabzeb ntawm ntug havtxwv.

⁹Puab yuav tuaj moog thoob plawg nplajteb hab puav Vaajtswv cov tuabneeg lub loog hab lub nroog kws Vaajtswv hlub. Tabsis muaj suavtawg poob sau ntuj lug kub cov tuabneeg ntawd tuag taag huv tuabsi.

¹⁰Ces luas muab tug dlaab Ntxwgnyoog kws dlaag ntxag cov tuabneeg ntawd pov rua huv cov nplaim tawg leejfaaj kws cig ntswj pis yog. Qhov chaw ntawd yog qhov chaw kws luas tub xub muab tug tsaj hab tug cevlug cuav pov rua huv lawm; Puab yuav raug kev tsimtxom taag nub taag mo moog ibtxhis le.

¹¹Tom qaab ntawd kuv pum Vaajtswv lub zwmtxwv luj kws dlawb paug hab muaj ib tug nyob sau lub zwmtxwv ntawd. Lub nplajteb hab lub ntuj ca le pluj ndlais ntawm nwg lub xubndlag moog lawm.

¹²Hab kuv pum cov tuabneeg kws tuag lawm, tsi has tug hlub tug yau, suavdlawg puavleej sawv ntawm tug kws nyob sau lub zwmtxwv hauv ntej. Luas muab tej phoo ntawv lug nthuav, hab muab ib phoo ntawv lug nthuav saib, phoo ntawd yog phoo ntawv kws sau cov tuabneeg kws muaj sa ntev moog ibtxhis lawm tej npe. Luas txav txim rua cov tuabneeg kws tuag lawm lawv le puab teg num kws tub muab sau ca rua huv tej ntawv ntawd lawm.

¹³Dlej havtxwv xaa tej tuabneeg kws tuag rua huv havtxwv rov qaab lug. Txujkev tuag hab tubtuag teb los xaa cov tuabneeg tuag lawm rov qaab lug ib yaam nkaus. Luas txav txim rua txhua tug lawv le teg num kws puab tau ua lug lawm.

¹⁴Luas muab txujkev tuag hab tubtuag teb pov rua huv ntuj tawg. (Lub ntuj tawg ntawd yog txujkev tuag zag ob.)

¹⁵Txhua tug kws tsi muaj npe sau rua huv phoo ntawv kws sau cov tuabneeg kws muaj txujsa ntev moog ibtxhis lawm tej npe, luas muab cov tuabneeg ntawd pov rua huv ntuj tawg.