Read Hmong Njua Tshwmsim 21 Bible Online

Tshwmsim 21 - Hmong Njua bible

Tshwmsim 21

¹Tom qaab ntawd kuv pum lub ntuj tshab hab lub nplajteb tshab. Lub ntuj qub hab lub nplajteb qub tub pluj taag lawm, hab dlej havtxwv los pluj taag ib yaam nkaus.

²Hab kuv pum lub Nroog Dlawbhuv kws yog lub nroog Yeluxalees tshab lug ntawm Vaajtswv tug kws nyob sau ntuj ceebtsheej lug. Vaajtswv tub tu lub nroog ntawd txhij ca lawm, ib yaam le tug nkauj nyaab tu cev tog tug nraug vauv.

³Kuv nov ib lub suab has nrov nrov ntawm Vaajtswv lub zwmtxwv tuaj has tas, “Nwgnuav Vaajtswv tub lug nrug tuabneeg nyob lawm! Nwg yuav nrug puab nyob, puab yuav ua nwg tsaav tuabneeg hab nwg yuav nrug puab nyob hab yuav ua puab tug Vaajtswv.

⁴Nwg yuav so puab tej kua muag huv tuabsi moog. Tej kev tuag, kev ntxhuv sab, kev quaj ntsuag hab kev mob kev nkeeg yuav tsi muaj ib zag le lawm. Tej kws suavdlawg ibtxwm muaj lug tub pluj taag lawm.”

⁵Tug kws nyob sau lub zwmtxwv has rua kuv has tas, “Nwgnuav kuv yuav tsim dlua ib puas tsaav yaam tshab!” Hab nwg has dlua rua kuv has tas, “Koj ca le sau tej lug nuav ca: rua qhov tej lug nuav yog lug tseeb hab tso sab tau.”

⁶Hab nwg has tas, “Tav lawm! Kuv yog Alafas hab yog Aumenkas, kuv yog lub hauvpaug hab kuv yog lub ntsis. Kuv yuav pub cov dlej kws haus muaj txujsa huv lub qhovdlej txhawv rua tug kws nqhes dlej haus, kuv pub dlawb dlawb xwb, tsi yuav nqe le.

⁷Kuv yuav ua txhua tug kws kovyeej lawm tug Vaajtswv, hab puab yuav ua kuv cov tub.

⁸Tabsis cov tuabneeg sab yau, cov tuabneeg ntxeev sab, cov tuabneeg nyam ua phem ua qas, cov tuabneeg tua tuabneeg, cov tuabneeg ua kev nkauj kev nraug, cov tuabneeg ua khawvkoob, cov tuabneeg pe dlaab pe mlom hab cov tuabneeg dlaag, puab txhua tug yuav poob rua huv cov nplaim tawg leejfaaj kws cig ntswj pis yog kws yog txujkev tuag zag ob. Qhov chaw ntawd yog qhov chaw kws tub xub tu tseg ca rua puab lawm.”

⁹Xyaa tug timtswv ceebtsheej kws nqaa xyaa lub taig kws rau xyaa yaam sub tawg sub ntshaa puv nkaus, ib tug lug has rua kuv has tas, “Koj nrug kuv moog saib tug Nkauj Nyaab kws yog tug Mivnyuas Yaaj tug quaspuj.”

¹⁰Vaaj Ntsujplig lug kaav taagnrho kuv lub sab, ces tug timtswv ntawd coj kuv nce moog sau ib lub ncov roob sab sab. Nwg taw teg qha lub nroog Yeluxalees rua kuv saib, yog lub Nroog Dlawbhuv kws taabtom lug ntawm Vaajtswv tug kws nyob sau ntuj lug,

¹¹hab Vaajtswv tug tshwjchim ci ntsaa ab huv lub nroog ntawd tuaj. Lub nroog ntawd ci ntsaa ab ib yaam le lub qai zeb ci ci kws muaj nqes hu ua manixaus; lub qai zeb ntawd pum kev tshaab plawg ib yaam le dlaim av.

¹²Lub nroog ntawd muaj tug ntsaa yeej luj luj hab sab sab thaiv, muaj kaum ob lub roojvaag hab muaj kaum ob tug timtswv ceebtsheej ib tug zuv ntawm ib lub roojvaag. Luas sau cov Yixalayees kaum ob xeem tej npe rua ntawm cov roojvaag ntawd.

¹³Ib saab ntsaa yeej muaj peb lub roojvaag: saab nubtuaj muaj peb lub, saab qaabteb muaj peb lub, saab qaumteb muaj peb lub, hab saab nubpoob muaj peb lub.

¹⁴Luas muab kaum ob lub pobzeb kws muaj tug Mivnyuas Yaaj kaum ob tug timthawj npe sau rua lug tag tug taw loog kws xov lub nroog ntawd.

¹⁵Tug timtswv kws has lug rua kuv ntawd coj ib tug paas ntsuag kws yog kub, nwg yuav ntsuag lub nroog, tej roojvaag hab tug ntsaa yeej.

¹⁶Lub nroog ntawd ua xwmfaab xwmmeem. Tug timtswv muab nwg tug paas ntsuag lub nroog, qhov ntev muaj ob txheeb plaub puas kilumev, qhov dlaav hab qhov sab ntev ib yaam nkaus.

¹⁷Tug timtswv ntsuag tug ntsaa yeej hab, qhov sab muaj ib puas plaub caug plaub tshim, lawv le tej paas ntsuag kws tuabneeg ibtxwm ntsuag.

¹⁸Tug ntsaa yeej ntawd yog muab tej qai zeb ci ci kws npe hu ua manixaus lug ua, hab lub nroog yog muab cov tseem kub kws pum kev tshaab plawg le av lug ua.

¹⁹Tug taw tag tug ntsaa yeej yog muab pobzeb ua, hab muab txhua yaam qai zeb ci ci kws muaj nqes lug lu rua kuas tug ntsaa yeej zoo nkauj. Thawj ntu taw ntsaa yeej yog qai zeb manixaus, ntu ob yog qai zeb xafiles, ntu peb yog qai zeb maulas hab ntu plaub yog qai zeb emelas,

²⁰ntu tsib yog qai zeb aunis, ntu rau yog qai zeb kanelis, ntu xyaa yog qai zeb npulakas, ntu yim yog qai zeb npelis, ntu cuaj yog qai zeb tupas, ntu kaum yog qai zeb khixupas, ntu kaum ib yog qai zeb yaxees, hab ntu kaum ob yog qai zeb amathis.

²¹Kaum ob lub roojvaag ntawd yog muab kaum ob lub hlaws muaj nqes ua. Tej kev kws nyob huv lub nroog ntawd luas muab cov tseem kub kws pum kev tshaaj plawg ib yaam le av lug ua.

²²Kuv tsi pum muaj ib lub tuamtsev nyob huv lub nroog ntawd le, rua qhov tug Tswv kws yog Vaajtswv tug kws muaj Fwjchim Luj kawg nkaus hab tug Mivnyuas Yaaj yog lub tuamtsev ntaag.

²³Huv lub nroog ntawd tsi muaj nub lossis hli ci, rua qhov Vaajtswv tug tshwjchim yeej ci ntsaa ab tuaj rua huv, hab tug Mivnyuas Yaaj yog lub teeb kws ci rua suavdlawg pum kev.

²⁴Txhua tsaav tuabneeg yuav pum kev kaaj nrig moog moog lug lug, hab tej vaajntxwv kws nyob huv nplajteb yuav nqaa puab tej nyaj tej kub hab tej qhov txhua chaw tuaj rua huv lub nroog.

²⁵Lub nroog ntawd tej roojvaag qheb lug ca tsi kaw le, rua qhov nyob huv lub nroog ntawd yeej tsi txawj tsaus ntuj.

²⁶Txhua tsaav tuabneeg yuav coj puab tej fwjchim hab puab tej meejmom tuaj rua huv lub nroog.

²⁷Tabsis yuav tsi muaj tej kev phem kev qas, tej kev poob ntsejmuag lossis tej tuabneeg dlaag nyob huv lub nroog ntawd le, luas tsuas pub cov tuabneeg kws tub muaj npe sau ca rua huv tug Mivnyuas Yaaj phoo ntawv kws sau cov tuabneeg kws muaj sa ntev moog ibtxhis lawm tej npe moog nyob huv lub nroog ntawd xwb.