Read Hmong Njua Tshwmsim 22 Bible Online

Tshwmsim 22 - Hmong Njua bible

Tshwmsim 22

¹Tug timtswv ceebtsheej kws qha tug dlej cawm sav kws ci pum kev tshaab plawg le dlaim av rua kuv. Tug dlej ntawd ndlwg sau Vaajtswv hab tug Mivnyuas Yaaj lub zwmtxwv lug,

²hab ndlwg taug txujkev huv plawv nroog. Ob saab ntug dlej puavleej muaj tsob txiv ntoo cawm sav kws ib xyoos twg txi kaum ob phaum txiv, ib hlis twg txi ib phaum. Tsob ntoo ntawd tej nplooj yog hauv tshuaj kuab muaj tsuas kws khu tau txhua tsaav tuabneeg.

³Yeej tsi muaj tej kws Vaajtswv foom tsi zoo rua lawm nyob huv lub nroog ntawd hlo le. Vaajtswv hab tug Mivnyuas Yaaj lub zwmtxwv yuav nyob huv lub nroog ntawd, hab nwg cov tubkhai yuav pehawm nwg.

⁴Puab yuav pum nwg lub ntsejmuag, hab nwg yuav sau nwg lub npe rua ntawm puab hauvplaj.

⁵Yuav tsi muaj mo ntuj le lawm, puab yuav tsi taws teeb hab tsi taag yuav muaj tshaav ntuj, rua qhov tug Tswv kws yog Vaajtswv yuav ci rua puab pum kev, hab puab yuav ua vaajntxwv kaav lub nroog ntawd moog ibtxhis le.

⁶Tom qaab ntawd tug timtswv has rua kuv has tas, “Tej lug nuav yog lug tseeb kws tso sab tau. Hab tug Tswv kws yog Vaajtswv tug kws muab nwg tug Ntsujplig rua cov cev Vaajtswv lug, tau khaiv nwg cov timtswv lug qha tej kws yuav muaj lug sai sai yaav tom ntej rua nwg cov tubkhai paub.”

⁷Yexus has tas, “Mej ua tuab zoo noog kuv tej lug! Kuv tub yuav lug sai sai nuav! Tug kws ua lawv le tej lug kws sau rua huv phoo ntawv nuav yog tug kws tau nyob kaaj sab lug!”

⁸Kuv yog Yauhaas, kuv tau nov hab kuv tau pum txhua tsaav yaam nuav. Thaus kuv nov hab kuv pum taag lawm, kuv txawm txhus caug ndlua ntawm tug timtswv ceebtsheej kws qha txhua yaam rua kuv txhais kutaw hab yuav pe nwg.

⁹Tabsis tug timtswv ntawd has rua kuv has tas, “Koj tsi xob pe kuv! Kuv yog ib tug tubkhai ib yaam le koj hab ib yaam le koj cov kwvtij kws ua cov cev Vaajtswv lug, hab ib yaam le txhua tug kws ua lawv le tej lug kws sau rua huv phoo ntawv nuav xwb. Koj ca le pehawm Vaajtswv xwb!”

¹⁰Hab tug timtswv has rua kuv has tas, “Koj tsi xob muab tej kws Vaajtswv qha rua huv phoo ntawv nuav npog ca, rua qhov tub yuav txug lub sijhawm kws muaj tej ntawd.

¹¹Tug kws ua phem yeej yuav ua phem moog le, tug kws ua qas yeej yuav ua qas moog le; tug kws ua zoo yeej yuav ua zoo moog le, hab tug kws dlawbhuv yeej yuav dlawbhuv moog le.”

¹²Yexus has tas, “Mej ua tuab zoo noog kuv tej lug! Kuv tub yuav lug sai sai nuav! Kuv yuav coj kuv tej nqe zug lug, kuv yuav muab rua mej txhua tug lawv le teg num kws mej tau ua lug lawm.

¹³Kuv yog Alafas hab Aumenkas, kuv yog lub hauvpaug hab yog lub ntsis.”

¹⁴Cov kws ntxhua puab tej rig tsho huv lawm, yog cov kws nyob kaaj sab lug, puab muaj feem moog noj cov txiv kws muaj txujsa, hab muaj feem moog ntawm cov roojvaag moog rua huv lub nroog.

¹⁵Tabsis cov tuabneeg kws ua phem ua qas, cov tuabneeg ua khawvkoob, cov tuabneeg kws ua kev nkauj kev nraug, cov tuabneeg tua tuabneeg, cov tuabneeg pe mlom, cov tuabneeg dlaag, tsi has tej lug kws puab has hab tej num kws puab ua, txhua tug puavleej yuav tau nyob saab ntug nroog nrau xwb.

¹⁶“Kuv yog Yexus, kuv tub khaiv kuv tug timtswv lug qha tej nuav rua mej txhua tug huv tej pawg ntseeg lawm. Kuv yog Daviv caajceg, kuv yog lub nubqub kws ci ci thaus yuav kaaj ntug.”

¹⁷Vaaj Ntsujplig hab tug Nkauj Nyaab has tas, “Ca le lug ntawm nuav!” Txhua tug kws nov lu lug ntawd yuavtsum teb has tas, “Ca le lug ntawm nuav!” Tug kws nqhes dlej ca le lug ntawm nuav; tug kws xaav haus ca le lug txais cov dlej cawm txujsa moog haus. Cov dlej nuav yog pub dlawb dlawb xwb tsi yuav nqe.

¹⁸Kuv yog Yauhaas, kuv ceebtoom rua txhua tug kws nov tej lug kws Vaajtswv qha rua huv phoo ntawv nuav has tas: yog leejtwg ntxiv ib lu lug rua tej kws sau tseg rua huv phoo ntawv nuav lawm, Vaajtswv yuav muab tej sub tawg sub ntshaa kws has huv phoo ntawv nuav rua tug ntawd.

¹⁹Hab yog leejtwg rhu tej lug kws Vaajtswv qha rua huv phoo ntawv nuav ib lus tawm, Vaajtswv yuav tsi pub tsob txiv cawm txujsa kws yog nwg feem rua nwg noj, hab Vaajtswv yuav tsi pub lub chaw huv lub Nroog Dlawbhuv rua nwg nyob. Kuv tub has txug tej ntawd rua huv phoo ntawv nuav lawm.

²⁰Tug kws ua timkhawv txug tej nuav, nwg has tas, “Kuv tub yuav lug sai sai nuav!” Thov kuas muaj lawv le ntawd. Tswv Yexus, thov koj ca le lug!

²¹Thov tug Tswv Yexus foom koob moov rua mej txhua tug.