Read Hmong Njua Tshwmsim 4 Bible Online

Tshwmsim 4 - Hmong Njua bible

Tshwmsim 4

¹Tom qaab ntawd kuv rov ua ywgtoog pum dlua ib zaaj, kuv pum rooj ntug ceebtsheej qheb quas lug ca. Lub suab kws thawj zag kuv nov has nrov nrov rua kuv ib yaam le lub suab xyu, nwgnuav kuv rov nov lub suab ntawd has rua kuv has tas, “Koj ca le tuaj sau nuav, kuv yuav muab tej kws yaav pegsuab nuav yuav muaj tshwm lug rua koj saib.”

²Taamsim ntawd Vaaj Ntsujplig txawm lug kaav taagnrho kuv lub sab, kuv pum ib lub zwmtxwv nyob sau ntuj ceebtsheej hab muaj ib tug nyob sau lub zwmtxwv ntawd.

³Nwg lub ntsejmuag ci ib yaam le cov qai zeb muaj nqes kws hu ua manixaus hab philas, hab muaj ib tug dluab zaaj sawv vij lub zwmtxwv. Tug dluab zaaj ntawd ntsuab ib yaam le tej qai zeb muaj nqes kws hu ua emelas.

⁴Muaj neeg nkaum plaub lub zwmtxwv nyob puagncig lub zwmtxwv ntawd, hab muaj neeg nkaum plaub tug txwjlaug kws naav rig tsho dlawb hab ntoo mom kub nyob sau cov zwmtxwv ntawd.

⁵Muaj tsaglig xub laim lab quas vog, xub quaj hab muaj suab nrov nroo ntwg ntawm lub zwmtxwv ntawd tuaj. Muaj xyaa teg tsau kws cig laam quas lug ntawm tug kws nyob sau lub zwmtxwv hauv ntej. Xyaa teg tsau ntawd yog Vaajtswv xyaa tug ntsujplig.

⁶Nyob ntawm lub zwmtxwv hauv ntej muaj ib qho zoo le havtxwv kws ci le av pum kev tshaab plawg. Muaj plaub tug qhelunpees sawv vij lub zwmtxwv, plaub tug qhelunpees ntawd muaj qhovmuag thoob plawg saab xubndlag hab saab tom nrausqaum huv tuabsi.

⁷Thawj tug zoo ib yaam le tug tsuv ntxhuav; tug ob zoo ib yaam le tug txiv nyuj; tug peb lub ntsejmuag zoo le tuabneeg lub, hab tug plaub zoo ib yaam le tug dlaav kws taabtom yaa.

⁸Plaub tug qhelunpees ntawd ib tug muaj rau phob tis, rau phob tis ntawd muaj qhovmuag thoob plawg saab huv hab saab nrau huv tuabsi. Plaub tug qhelunpees ntawd hu nkauj taag nub taag mo has tas, “Tug Tswv kws yog Vaajtswv tug kws muaj Fwjchim Luj kawg nkaus, yog tug dlawbhuv, dlawbhuv, dlawbhuv, yog tug kws ibtxwm nyob thaus u lug lawm, yog tug kws nyob nwgnuav, hab yog tug kws yuav lug yaav tom ntej.”

⁹Txhua zag kws plaub tug qhelunpees ntawd hu nkauj qhuas tug kws muaj sa nyob moog ibtxhis kws nyob sau lub zwmtxwv hab ua nwg tsaug,

¹⁰ces neeg nkaum plaub tug txwjlaug txawm txhus caug ndlua pehawm tug kws muaj sa nyob moog ibtxhis kws nyob sau lub zwmtxwv, hab puab hle puab tej mom kub tso rua ntawm lub zwmtxwv hauv ntej, hab puab has tas,

¹¹“Tug Tswv kws yog peb suavdlawg tug Vaajtswv! Koj yog tug kws muaj fwjchim, tsimnyog peb suavdlawg fwm koj hab ua rua koj tau koob meej. Rua qhov koj yog tug kws tsim ib puas tsaav yaam huv tuabsi; koj pum zoo tsim tej ntawd hab pub tej ntawd muaj sa nyob.”