Read Hmong Njua Tshwmsim 5 Bible Online

Tshwmsim 5 - Hmong Njua bible

Tshwmsim 5

¹Kuv pum tug kws nyob sau lub zwmtxwv, nwg txhais teg xis tuav rawv ib thooj ntawv; thooj ntawv ntawd muaj lug sau rua saab huv hab saab nrau huv tuabsi, hab muaj xyaa lub homthawj nas rua.

²Kuv pum ib tug timtswv ceebtsheej kws muaj fwjchim luj kawg nkaus, nwg has nrov nrov has tas, “Leejtwg txhaj tsimnyog muab tej homthawj tev hab muab thooj ntawv lug nthuav saib?”

³Tabsis luas nrhav tsi tau ib tug kws yuav tsimnyog moog muab thooj ntawv lug nthuav saib, tsi has sau ntuj ceebtsheej lossis huv nplajteb nuav lossis huv nruab tivtxwv los yeej nrhav tsi tau ib tug le.

⁴Kuv txawm quaj quas dlhev, rua qhov tsi muaj ib tug yuav tsimnyog muab thooj ntawv ntawd lug nthuav saib.

⁵Thaus ntawd ib tug txwjlaug has rua kuv has tas, “Koj tsi xob quaj. Koj saib! Xeem Yudas tug tsuv ntxhuav kws yog Daviv caajceg, nwg tub kovyeej lawm, nwg tsimnyog tev xyaa lub homthawj hab nthuav thooj ntawv ntawd.”

⁶Ces kuv txawm pum ib tug Mivnyuas Yaaj sawv ze ntawm tug kws nyob sau lub zwmtxwv hauv ntej, plaub tug qhelunpees hab cov txwjlaug puavleej sawv vij tug Mivnyuas Yaaj. Saib yaam le tub muaj tuabneeg muab tug Mivnyuas Yaaj ntawd tua lawm. Tug Mivnyuas Yaaj ntawd muaj xyaa tug kub hab muaj xyaa lub qhovmuag. Tej qhovmuag ntawd pev txug Vaajtswv xyaa tug ntsujplig kws Vaajtswv khaiv moog thoob plawg nplajteb nuav.

⁷Tug Mivnyuas Yaaj cev teg moog muab thooj ntawv ntawm tug kws nyob sau lub zwmtxwv saab teg xis.

⁸Thaus tug Mivnyuas Yaaj taabtom moog muab thooj ntawv, ces plaub tug qhelunpees hab neeg nkaum plaub tug txwjlaug txawm txhus caug ndlua ntawm tug Mivnyuas Yaaj hauv ntej pehawm tug Mivnyuas Yaaj. Puab cov ntawd ib leeg tuav rawv ib lub nkauj nogncaas hab ib leeg tuav rawv ib lub taig kub kws ntim moov tshuaj tsw qaab puv nkaus. Cov moov tshuaj ntawd yog pev txug tej lug kws cov ntseeg thov Vaajtswv.

⁹Puab hu ib zaaj nkauj tshab has tas: “Koj yog tug kws tsimnyog muab thooj ntawv ntawd hab muab tej homthawj tev. Rua qhov tub muaj tuabneeg muab koj tua lawm. Qhov kws koj tuag ntawd tub yog koj txhwv tuabneeg coj lug rua Vaajtswv. Cov tuabneeg kws koj txhwv ntawd tsi has xeem twg lossis cov kws has yaam lug twg lossis tsaav tuabneeg twg lossis nyob lub tebchaws twg puavleej yog koj txhwv lug huv tuabsi.

¹⁰Koj coj puab lug ua Vaajtswv tsaav tuabneeg hab tsaa puab ua povthawj ua peb tug Vaajtswv teg num. Hab puab cov ntawd yuav tau kaav lub nplajteb nuav.”

¹¹Kuv rov qaab saib dlua ib zag, kuv nov cov timtswv ceebtsheej ntau txheeb hab ntau plhom lub suab. Puab sawv vij lub zwmtxwv, plaub tug qhelunpees hab cov txwjlaug,

¹²puab hu nkauj has tas: “Tug Mivnyuas Yaaj kws tuabneeg muab tua lawm, koj yog tug muaj fwjchim hab yog tug kws npluanuj, yog tug kws muaj tswvyim hab muaj zug. Tsimnyog peb fwm koj, hab ua rua koj tau koob meej!”

¹³Kuv nov ib puas tsaav yaam kws muaj sa, tsi has tej kws nyob sau ntuj, nyob huv nplajteb nuav, nyob huv nruab tivtxwv hab nyob huv havtxwv hu nkauj has tas: “Peb suavdlawg yuavtsum fwm, yuavtsum qhuas, yuavtsum pehawm hab ua rua tug kws nyob sau lub zwmtxwv hab tug Mivnyuas Yaaj tau koob meej moog ibtxhis le.”

¹⁴Plaub tug qhelunpees teb has tas, “Amees!” Ces cov txwjlaug txawm txhus caug ndlua pehawm tug kws nyob sau lub zwmtxwv hab tug Mivnyuas Yaaj.