Read Hmong Njua Tshwmsim 6 Bible Online

Tshwmsim 6 - Hmong Njua bible

Tshwmsim 6

¹Ces kuv txawm pum tug Mivnyuas Yaaj muab xyaa lub homthawj ntawd tev, hab thaus nwg tev thawj lub, kuv nov ib tug ntawm plaub tug qhelunpees has nrov nrov ib yaam le xub nroo has tas, “Ca le lug!”

²Kuv saib dlheev, kuv pum ib tug txiv neeg dlawb tawm plawg lug. Tug kws caij tug txiv neeg dlawb ntawd, nwg nqaa ib raab neevnti hab nwg ntoo ib lub mom kub. Nwg caij neeg tawm moog ib yaam le tug kws kovyeej lawm, nwg yuav moog tawmtsaam kuas yeej.

³Ces tug Mivnyuas Yaaj txawm muab lub homthawj kws yog lub ob tev; thaus nwg muab tev lawm, kuv nov tug qhelunpees kws yog tug ob has tas, “Ca le lug!”

⁴Ces txawm muaj ib tug txiv neeg lab tawm plawg lug. Luas muab ib raab ntaaj luj luj rua tug kws caij tug txiv neeg lab ntawd, nwg muaj fwjchim ua rua lub nplajteb ua tsuv ua rog hab sis ntaus sis tua.

⁵Ces tug Mivnyuas Yaaj txawm muab lub homthawj kws yog lub peb tev; thaus nwg tev lawm, kuv nov tug qhelunpees kws yog tug peb has tas, “Ca le lug!” Kuv saib dlheev, kuv pum ib tug txiv neeg dlub tawm plawg lug. Tug kws caij tug txiv neeg dlub ntawd txhais teg tuav rawv ib raab teev.

⁶Kuv nov ib lub suab yaam le yog suab tuabneeg has ntawm plaub tug qhelunpees ntawd tuaj has tas, “Cov tuabneeg kws ua luas zug, yog yuav ntsab, mas ib nub twg ib taig ntsab, yog yuav pas, ces ib nub peb taig pas; tabsis tsi xob muab cov roj txiv ntoo hab cov cawv txiv maab nchuav povtseg!”

⁷Tug Mivnyuas Yaaj txawm muab lub homthawj kws yog lub plaub tev; thaus nwg muab tev lawm, kuv nov tug qhelunpees kws yog tug plaub has tas, “Ca le lug!”

⁸Kuv saib dlheev, kuv pum ib tug txiv neeg txheeb tawm plawg lug. Tug kws caij tug txiv neeg txheeb ntawd lub npe hu ua Txujkev Tuag, hab Tub Tuag Teb lawv nwg qaab lug. Obtug muaj fwjchim tua cov tuabneeg kws nyob huv nplajteb nuav tuag ib feem plaub, tsi has tuag rua kev tsuv kev rog, tuag rua kev tshaib kev nqhes, tuag rua kev mob kev nkeeg, hab raug tej tsaj nyaum tum.

⁹Ces tug Mivnyuas Yaaj txawm muab lub homthawj kws yog lub tsib tev; thaus nwg muab tev lawm, kuv pum ib cov ntsujplig nyob huv lub qaab rooj kws ca tej khoom fij rua Vaajtswv. Cov ntsujplig ntawd yog cov tuabneeg kws luas muab tua tuag taag lawm cov ntsujplig. Puab raug tua rua qhov puab qha Vaajtswv txujlug hab ua timkhawv ncaaj nceeg.

¹⁰Cov tuabneeg ntawd cov ntsujplig has nrov nrov has tas, “Tug Tswv, koj yog tug muaj Fwjchim Luj kawg nkaus, yog tug dlawbhuv hab yog tug tseeb! Tshuav ntev le caag koj maam le txav txim rua tuabneeg nplajteb hab rau txim rua cov tuabneeg kws muab peb lub cev tua povtseg?”

¹¹Luas muab tsho dlawb rua cov tuabneeg kws raug tua ntawd ib leeg ib lub, hab tug Tswv has rua puab has tas, kuas puab ca le su ntev mivntsiv tsaiv. Thaus puab tej phoojywg kws ua Vaajtswv cov tubkhai hab cov kwvtij kws yeej yuav raug txujkev tuag, raug luas tua taag ib yaam le puab lawm, Vaajtswv maam le txav txim.

¹²Ces kuv txawm pum tug Mivnyuas Yaaj muab lub homthawj kws yog lub rau tev. Thaus nwg tev, lub nplajteb ua zug koog. Lub nub txawm tsaus nti dlub ncab ib yaam le tej ntaub maag dlub, hab lub hli txawm ca le lab ploog ib yaam le ntshaav.

¹³Tej nubqub txawm poob zum zawg sau ntuj lug rua huv nplajteb, ib yaam le tej txiv ncuav pas kws tsi tau sav kws cua ntsawj poob.

¹⁴Lub ntuj txawm pluj quas zug moog ib yaam le luas dlov thooj ntawv. Txhua lub roob hab txhua lub koog povtxwv puavleej txaav moog rua lwm qhov lawm.

¹⁵Tej vaajntxwv kws kaav nplajteb, tej numtswv, tej thawj tubrog, tej tuabneeg npluanuj, tej tuabneeg tseemceeb hab cov kws ua qhev hab cov kws tsi ua qhev, suavdlawg puavleej tsiv moog nkaum rua huv tej qhov tsua hab huv tej qaab tsuas hab sau tej roob.

¹⁶Puab has rua tej roob hab tej pobzeb pobtsuas has tas, “Ca le nphau lug txhub peb hab npug peb, kuas tug kws nyob sau lub zwmtxwv tsi xob pum peb, hab kuas tug Mivnyuas Yaaj tsi xob rau txim tau rua peb!

¹⁷Rua qhov tub txug nub kws tug Tswv hab tug Mivnyuas Yaaj rau txim lawm, yog le ntawd tseem yuav muaj tuabneeg tawv dlhau hab los?”