Read Hmong Njua Tshwmsim 7 Bible Online

Tshwmsim 7 - Hmong Njua bible

Tshwmsim 7

¹Tom qaab ntawd kuv pum plaub tug timtswv ceebtsheej sawv ntawm plaub ceg kaum ntuj hab txwv tsi pub cua ntsawj plaub ceg kaum ntuj tuaj rua lub nplajteb lossis tuaj rua dlej havtxwv lossis tuaj rua tej xyoob ntoo.

²Hab kuv pum dlua ib tug timtswv ceebtsheej tawm tim saab nubtuaj tuaj, nwg nqaa rawv Vaajtswv tug kws muaj sa nyob lub homthawj. Nwg has nrov nrov rua plaub tug timtswv ceebtsheej kws Vaajtswv khaiv lug rhuav lub nplajteb hab havtxwv has tas,

³“Mej tsi xob rawm rhuav lub nplajteb, hab dlej havtxwv lossis tej xyoob ntoo, ca peb nas homthawj rua Vaajtswv cov tubkhai txhua tug hauvplaj tsaiv, mej maam le rhuav.”

⁴Hab tug timtswv ceebtsheej ntawd has rua kuv has tas, cov tuabneeg kws muaj Vaajtswv lub homthawj nas rua ntawm puab hauvplaj lawm muaj ib puas plaub caug plaub txheeb leej. Vaajtswv xaiv cov tuabneeg ntawd tawm huv kaum ob xeem Yixalayees lug.

⁵Nwg xaiv xeem Yudas kaum ob txheeb leej, xeem Lunpees kaum ob txheeb leej, xeem Khas kaum ob txheeb leej,

⁶xeem Aseles kaum ob txheeb leej, xeem Nathalis kaum ob txheeb leej, xeem Manaxes kaum ob txheeb leej,

⁷xeem Xime-oos kaum ob txheeb leej, xeem Levis kaum ob txheeb leej, xeem Ixakhas kaum ob txheeb leej,

⁸xeem Xenpuloos kaum ob txheeb leej, xeem Yauxej kaum ob txheeb leej, hab xeem Npeenyamees kaum ob txheeb leej.

⁹Tom qaab ntawd kuv saib dlheev, kuv pum muaj tuabneeg coob coob suav tsi txheeb le tuaj txhua lub tebchaws tuaj! Tsi has xeem twg, tsaav tuabneeg twg, hab cov tuabneeg kws has yaam lug twg los muaj, suavdlawg tuaj sawv ntawm hauv ntej lub zwmtxwv hab tug Mivnyuas Yaaj. Puab txhua tug puavleej naav ib leeg ib cev rig tsho dlawb, hab puab ib leeg tuav rawv ib dlaim nplooj toovlaaj.

¹⁰Puab has nrov nrov has tas, “Tug Vaajtswv kws nyob sau lub zwmtxwv hab tug Mivnyuas Yaaj tub txhwv peb dlim lawm!”

¹¹Cov timtswv ceebtsheej txhua tug sawv vij cov txwjlaug hab plaub tug qhelunpees. Ces cov timtswv ceebtsheej txawm txhus caug ndlua huv aav ntawm hauv ntej lub zwmtxwv hab pehawm Vaajtswv,

¹²puab has tas, “Amees! Vaajtswv, koj yog tug kws muaj fwjchim, muaj tswvyim, hab muaj zug, tsimnyog peb ua koj tsaug, qhuas koj hab ua rua koj tau koob meej moog ibtxhis le! Amees!”

¹³Cov txwjlaug ntawd muaj ib tug nug kuv has tas, “Cov tuabneeg kws naav tsho dlawb ntawd yog leejtwg hab puab tuaj qhov twg tuaj?”

¹⁴Kuv teb has tas, “Kuv tsi paub. Koj txhaj paub xwb!” Tug txwjlaug ntawd qha rua kuv has tas, “Cov tuabneeg ntawd yog cov kws tub tiv dlhau tej kev tsimtxom heev lug lawm. Puab tub muab tug Mivnyuas Yaaj cov ntshaav ntxhua puab tej rig tsho hab ntxuav puab dlawbhuv lawm.

¹⁵Yog le ntawd puab txhaj tau lug sawv taabmeeg ntawm Vaajtswv lub zwmtxwv, pehawm Vaajtswv taag nub taag mo huv lub Tuamtsev. Tug kws nyob sau lub zwmtxwv yuav nrug puab nyob hab tsomkwm puab.

¹⁶Puab yuav tsi tshaib tsi nqhes; naag yuav tsi ntub hab tshaav ntuj yuav tsi kub puab le lawm.

¹⁷Rua qhov tug Mivnyuas Yaaj kws sawv ntawm lub zwmtxwv yuav yug puab hab coj puab moog haus tej qhovdlej txhawv kws cawm tuabneeg txujsa. Hab Vaajtswv yuav so puab tej kua muag huv tuabsi moog.”