Read Hmong Njua Tshwmsim 8 Bible Online

Tshwmsim 8 - Hmong Njua bible

Tshwmsim 8

¹Thaus tug Mivnyuas Yaaj muab lub homthawj xyaa tev, ua cav sau ntuj ceebtsheej txawm ntsag quas tu kwvlaam le peb caug feeb.

²Kuv pum Vaajtswv muab xyaa lub xyu rua xyaa tug timtswv kws sawv taabmeeg ntawm Vaajtswv ib leeg ib lub.

³Muaj dlua ib tug timtswv ceebtsheej nqaa lub taig kub kws rau moov tshuaj tsw qaab. Nwg lug sawv ntawm lub thaaj kws luas ca tej khoom kws yuav muab fij rua Vaajtswv, hab Vaajtswv muab ib cov moov tshuaj tsw qaab ntau ntau rua tug timtswv ntawd coj moog ntxiv rua tej lug kws cov ntseeg thov Vaajtswv hab nqaa moog rua sau lub thaaj kub kws nyob ntawm hauv ntej lub zwmtxwv.

⁴Tug timtswv ntawd txawm muab cov moov tshuaj tsw qaab ntawd hlawv. Cov paa tshuaj ntawd nchu quas log ntawm nwg txhais teg nrug tej lug kws cov ntseeg thov moog rua Vaajtswv.

⁵Ces tug timtswv txawm muab tej suavtawg kws nyob sau lub thaaj kub lug ntim puv nkaus rua lub taig kws rau moov tshuaj tsw qaab, ces nwg txawm muab lub taig suavtawg ntawd pov rua huv nplajteb, ces xub txawm nroo hab tsaglig xub laim lab quas vog, muaj suab nrov qeeg nkawg hab lub nplajteb ua zug koog.

⁶Tom qaab ntawd xyaa tug timtswv ceebtsheej kws nqaa xyaa lub xyu txawm npaaj yuav tshuab puab cov xyu.

⁷Thaus thawj tug timtswv tshuab nwg lub xyu, ces txawm muaj lawg hab suavtawg xyaw ntshaav poob lug rua huv nplajteb. Lub nplajteb kub nyab taag ib feem peb, tej ntoo kub nyab taag ib feem peb, hab tej nroj tsuag kub nyab taag huv tuabsi.

⁸Thaus tug timtswv ob tshuab nwg lub xyu, txawm muaj ib yaam zoo le ib lub roob luj luj taabtom kub nyab nphau lug rua huv havtxwv, ces dlej havtxwv txawm txa ua ntshaav taag ib feem peb.

⁹Txhua tsaav yaam tsaj kws nyob huv havtxwv tuag taag ib feem peb, hab tej nkoj kws nyob huv havtxwv puamtsuaj taag ib feem peb.

¹⁰Thaus tug timtswv peb tshuab nwg lub xyu, muaj ib lub nubqub kub nyab cig lab ploog ib yaam le teg tsau poob sau ntuj lug npug tej dlej ndlwg hab tej qhovdlej taag ib feem peb.

¹¹(Lub nubqub ntawd hu ua “Ab.”) Ua rua tej dlej ab taag ib feem peb, muaj tuabneeg tuag coob heev, rua qhov puab haus cov dlej ab ntawd.

¹²Thaus tug timtswv plaub tshuab nwg lub xyu, ces lub nub txawm qauj taag ib feem peb, lub hli hab cov nubqub los puavleej qauj taag ib feem peb, nruab nub tsi pum kev taag ib feem peb, hab mo ntuj los tsi muaj qhov ci pum kev ib feem peb hab.

¹³Ces kuv txawm saib dlheev hab pum ib tug dlaav yaa sau nruab ntug. Tug dlaav ntawd quaj nrov nrov has tas, “Kev txomnyem! Kev txomnyem! Kev txomnyem! Thaus muaj dlua peb tug timtswv ceebtsheej tshuab puab tej xyu, mas tej tuabneeg kws nyob huv nplajteb yuav raug puamtsuaj!”