Read Hmong Njua Tshwmsim 9 Bible Online

Tshwmsim 9 - Hmong Njua bible

Tshwmsim 9

¹Thaus tug timtswv ceebtsheej tsib tshuab nwg lub xyu, kuv pum lub nubqub kws tub poob sau ntuj lug rua huv nplajteb lawm, luas muab ib tug yumsij kws qheb lub qhov tub tub rua lub nubqub ntawd.

²Lub nubqub ntawd txawm moog qheb lub qhov tub tub, muaj paa nchu log tawm huv lub qhov ntawd tuaj, ib yaam le lub cubtawg kws cig hlub hlub nchu paa. Tej paa ntawd txawm tuaj moog laum nkaus lub nub hab lub ntuj tsaus ntuj nti taag huv tuabsi.

³Muaj ib cov kooj txwg yaa tawm huv cov paa nchu ntawd tuaj rua sau npoo aav, hab luas pub cov kooj ntawd muaj taug ib yaam le raubris teb.

⁴Tabsis luas txwv tsi pub cov kooj ntawd noj tej xyoob ntoo hab tej qoobloo. Luas tsuas pub cov kooj ntawd tsimtxom cov tuabneeg kws tsi muaj Vaajtswv lub homthawj nas rua ntawm puab hauvplaj xwb.

⁵Tabsis luas txwv tsi pub cov kooj tua cov tuabneeg kws raug tsimtxom ntawd, luas tsuas pub cov kooj tsimtxom cov tuabneeg ntawd tsib lub hlis xwb. Qhov kws puab raug tsimtxom le ntawd mob ib yaam le raubris teb plev.

⁶Tsib lub hlis kws puab raug tsimtxom ntawd, puab nrhav kev tuag, tabsis puab nrhav tsi tau; puab xaav tuag, tabsis puab tuag tsi taug.

⁷Cov kooj ntawd zoo ib yaam le tej neeg kws luas tub muab eeb pem rua lawm yuav caij moog ntaus rog; muaj tej lub zoo le lub mom kub nyob sau cov kooj ntawd taubhau, hab kooj lub ntsejmuag zoo le tuabneeg lub.

⁸Hab kooj tej plaubhau zoo le quaspuj tej plaubhau, hab kooj tej kaugnav zoo le kaugnav tsuv ntxhuav.

⁹Hab txhua tug kooj puavleej muaj tej dlaim zoo le hlau thaiv ntawm puab hauvsab. Kooj yaa nrov le tej tsheb neeg coob coob kws dlha moog rua tom tshaav rog nrov.

¹⁰Kooj tug kutwv muaj ple hab txawj plev ib yaam le raubris teb plev. Hab tug kutwv ntawm muaj taug tsimtxom tuabneeg txug tsib lub hlis.

¹¹Cov kooj ntawd muaj ib tug vaajntxwv kaav puab, tug vaajntxwv ntawd yog tug timtswv ceebtsheej kws saib lub qhov tub tub. Tug timtswv ntawd lub npe lug Henplais hu ua Anpadoos; hab lug Kilis hu ua Apauliyoos (txhais has tas “Tug Kws Rhuav Kuas Puamtsuaj”).

¹²Thawj zag kev txomnyem tub dlhau lawm, tabsis tseem tshuav ob zag kev txomnyem hab.

¹³Thaus tug timtswv ceebtsheej rau tshuab nwg lub xyu; kuv nov ib lub suab has ntawm lub thaaj kub kws nyob ntawm Vaajtswv hauv ntej plaub ceg kaum tuaj.

¹⁴Lub suab ntawd has rua tug timtswv ceebtsheej rau kws nqaa lub xyu has tas, “Ca le muab plaub tug timtswv ceebtsheej kws raug khi rua nraag ntug Dlej Luj Efalates tso!”

¹⁵Thaus muab plaub tug timtswv ntawd tso lawm, Vaajtswv khaiv puab moog tua tej tuabneeg nplajteb tuag taag ib feem peb. Vaajtswv npaaj plaub tug timtswv ntawd kuas puab ua le ntawd rua xyoo ntawd, lub hlis ntawd, nub ntawd hab lub sijhawm ntawd.

¹⁶Luas qha rua kuv has tas cov tubrog kws caij neeg muaj ob puas plhom leej.

¹⁷Thaus kuv tseem ua ywgtoog ntawd, kuv pum cov neeg hab cov tuabneeg kws caij neeg; cov tuabneeg ntawd, puab ib leeg muaj ib dlaim hlau thaiv hauvsab, dlaim hlau ntawd lab le nplaim tawg, xav le ntaub xav, hab dlaaj le leejfaaj. Cov neeg ntawd lub taubhau zoo ib yaam le tsuv ntxhuav lub, muaj nplaim tawg paa tawg, hab leejfaaj tawm huv cov neeg ntawd lub qhovncauj lug.

¹⁸Cov nplaim tawg, paa tawg hab leejfaaj kws tawm huv cov neeg ntawd lub qhovncauj lug, ua rua tuabneeg nplajteb tuag ib feem peb.

¹⁹Tej taug ntawd nyob huv cov neeg lub qhovncauj hab nyob tom neeg tug kutwv. Tug kutwv zoo le tug naab hab muaj taubhau, cov neeg ntawd siv puab tug kutwv tum tuabneeg.

²⁰Cov tuabneeg kws tsi raug peb yaam sub tawg sub ntshaa ntawd hab tsi tuag, puab tsi kaam muab tej kws puab txhais teg ua lug lawm tso povtseg. Puab tseem teev dlaab, pe mlom kub, mlom nyaj, mlom tooj, mlom pobzeb hab mlom ntoo, tej mlom ntawd tsi pum kev, tsi nov lug lossis tsi txawj moog kev,

²¹hab puab tsi tso kev sis ntaus sis tua, ua khawvkoob, ua nkauj ua nraug, hab ua tubsaab tub nyag tseg le.