Read Hmong Njua Luv 4 Bible Online

Luv 4 - Hmong Njua bible

Luv 4

¹Npau-am moog nyob quastsawg ntawm roojvaag nroog qhov chaw kws suavdlawg ibtxwm moog saablaaj. Ces tug kwvtij kws txheeb Elimelej tshaaj plawg kws Npau-am tau has qha rua Luv lawm, txawm taug kev tuaj txug ntawd. Npau-am has rua nwg tas, “Lug ntawm nuav hab nyob quastsawg wb sis thaam.” Ces tug txivneej ntawd txawm lug hab nrug nwg nyob quastsawg.

²Ces Npau-am txawm moog coj tau kaum leej thawjcoj huv lub nroog ntawd tuaj hab thov puab nrug obtug nyob ntawd hab. Thaus puab lug nyob txhij lawm,

³Npau-am has rua nwg tug kwvtij ntawd tas, “Nwgnuav Na-aumis rov nraag tebchaws Mau-am lug lawm, nwg xaav muab peb tug kwvtij Elimelej thaaj teb muag,

⁴kuv xaav has tas tsimnyog koj paub txug zaaj nuav. Nwgnuav yog koj xaav yuav thaaj teb nuav, koj ca le yuav taabmeeg cov kev txwjlaug kws tuaj nyob ntawm nuav. Tabsis yog koj tsi yuav thaaj teb ntawd, koj ca le tu lug, rua qhov koj yog tug kws muaj cai xub yuav; yog koj tsi yuav ces kuv maam le yuav.” Ces tug txivneej ntawm teb has tas, “Kuv yuav yuav thaaj teb ntawd.”

⁵Npau-am has tas, “Zoo lawm lauj, yog koj yuav thaaj teb ntawd ntawm Na-aumis mas koj yuavtsum yuav Luv kws yog tug puj ntsuag kws yog tuabneeg Mau-am lug ua koj quaspuj hab, thaaj teb ntawd txhaj yuav yog tug txivneej kws tuag lawm tsev tuabneeg tug.”

⁶Tug txivneej ntawd teb has tas, “Yog le ntawd kuv yuav tso tseg tsi yuav thaaj teb ntawd, rua qhov thaus dlua kuv lawm, thaaj teb ntawd yuav tsi yog kuv cov mivnyuas qubtxeeg qubteg. Koj ca le yuav, kuv tsi yuav lawm.”

⁷Txuj kevcai kws cov Yixalayees ibtxwm coj, mas yog leejtwg tau tso ncauj muag lossis pauv tej teb, tug muag yuavtsum hle nwg txhais khau hab muab cob rua tug yuav. Qhov kws ua le nuav tub yog ua timkhawv rua cov Yixalayees paub has tas, obtug has hum lawm.

⁸Yog le ntawd, thaus tug txivneej has rua Npau-am has tas, “Koj ca le yuav.” Nwg txhaj hle hlo nwg txhais khau hab muab cob kag rua Npau-am.

⁹Ces Npau-am has rua cov thawjcoj hab cov tuabneeg kws tuaj ntawd tas, “Nub nua kuv thov mej nrug ua timkhawv has tas, kuv tau yuav txhua yaam kws yog Elimelej hab nwg ob tug tub kws yog Khili-oos hab Maloos le tug ntawm Na-aumis lawm.

¹⁰Tsi yog le ntawd xwb, kuv tseem yuav Luv tug kws yog tuabneeg Mau-am hab yog Maloos tug quaspuj lug ua kuv quaspuj hab. Ua le nuav txhaj yuav muaj tug lug tuav tug kws tuag lawm lub cuabtaam, hab nwg caajceg tsev tuabneeg txhaj yuav fuamvaam ntawm nwg cuab kwvtij hab huv nwg lub nroog. Nub nua thov mej ua timkhawv nrug kuv paub txug zaaj nuav.”

¹¹Cov thawjcoj hab cov tuabneeg suavdlawg kws tuaj ntawd teb has tas, “Peb suavdlawg nrug ua timkhawv ntaag. Thov tug TSWV foom koob moov rua koj tug quaspuj kuas zoo ib yaam le Laxees hab Le-as obtug kws yug tau mivnyuas coob heev rua Yakhauj. Thov kuas koj ua neej muaj txag npluanuj rua huv Efalas cuab kwvtij hab muaj koob meej nyob nto moo lug huv lub nroog Npelehees.

¹²Thov kuas tej mivnyuas kws tug TSWV yuav pub rua koj lug ntawm tug quaspuj nuav, ua rua koj tsev tuabneeg zoo ib yaam le Peles kws yog Yudas hab Tamaj obtug tug tub tsev tuabneeg.”

¹³Yog le ntawd, Npau-am txhaj moog coj Luv lug tsev hab yuav Luv ua nwg quaspuj, tug TSWV foom koob moov rua Luv hab nwg txawm xeeb tub hab nwg yug tau ib tug tub.

¹⁴Tej quaspuj tuaj has rua Na-aumis tas, “Ua tug TSWV tsaug kws nub nua nwg tau pub ib tug xeebntxwv lug tuav koj lub neej hab saib koj lawm. Thov kuas tug mivtub nuav muaj koob meej nto moo lug nyob rua huv tsaav tuabneeg Yixalayees lauj!

¹⁵Koj tug nyaab hlub koj heev, hab ua tug saib koj zoo tshaaj xyaa leej tub lawm hab. Nwgnuav nwg yug tau ib tug xeebntxwv rua koj. Nwg yuav ua rua koj muaj lub neej tshab hab koj yuav tau lub neej suv sab so thaus koj laug lawm.”

¹⁶Na-aumis txawm puag hlo hab coj tug mivtub ntawd lug zuv hab tu nwg zoo zoo le.

¹⁷Cov quaspuj nruab ze tuaj tis tug mivtub ntawd npe hu ua Aunpes. Puab qha rua suavdlawg has tas, “Na-aumis muaj ib tug tub xeebntxwv lawm lauj!” Aunpes muaj ib tug tub npe hu ua Yexais, tug kws yog Daviv txiv ntaag.

¹⁸Ntawm nuav yog Pelej caajceg tsev tuabneeg moog txug rua Daviv. Peles tug tub yog Heloos. Heloos tug tub yog Las, Las tug tub yog Aminadas. Aminadas tug tub yog Nasoos, Nasoos tug tub yog Samoos. Samoos tug tub yog Npau-am, Npau-am tug tub yog Aunpes, Aunpes tug tub yog Yexais hab Yexais tug tub yog Daviv.