Read Hmong Njua 1 Xamuyees 1 Bible Online

1 Xamuyees 1 - Hmong Njua bible

1 Xamuyees 1

¹Muaj ib tug txivneej hu ua Ekanas kws yog xeem Efalayees, nwg nyob huv lub nroog Lamas sau lub laaj roob Efalayees. Ekanas txiv hu ua Yelauhaas hab nwg yawm hu ua Elihus, Ekanas yog Tauhus tsev tuabneeg hab yog cuab Xufes.

²Ekanas muaj ob tug quaspuj: Hanas hab Peninas. Peninas muaj mivnyuas, tabsis Hanas tsi muaj.

³Ekanas naj xyoo caab tsaj huv lub nroog Lamas moog fij hab pehawm tug TSWV kws muaj fwjchim luj kawg nkaus huv lub nroog Silaus. Haufenis hab Finehas kws yog Elis ob tug tub yog povthawj ua tug TSWV teg num nyob huv.

⁴Txhua zag kws Ekanas tua tsaj fij, nwg muab tej nqaj faib rua Peninas hab Peninas cov mivnyuas ib leeg ib co.

⁵Txawm yog Ekanas nyam Hanas heev dlua los nwg tsuas faib ib qho rua Hanas xwb, rua qhov tug TSWV tsi pub Hanas muaj mivnyuas.

⁶Peninas kws nrug Hanas sis tw ua neej, nwg pheej txobthuam hab rhuav Hanas ntsejmuag, rua qhov tug TSWV tsi pub Hanas muaj mivnyuas.

⁷Peninas pheej ua le nuav ib xyoos dlhau ib xyoos; thaus obtug nrug suavdlawg moog pehawm tug TSWV huv lub tuamtsev los Peninas pheej ua rua Hanas nyuaj sab hab quaj tsi xaav noj mov.

⁸Ekanas kws yog tug quasyawg nug Hanas has tas, “Hanas, vim le caag koj pheej quaj? Vim le caag koj tsi noj mov le? Vim le caag koj nyuaj sab ua luaj? Koj tau kuv zoo tsi cuag le koj muaj kaum leej tub los?”

⁹Muaj ib zag, thaus puab noj mov huv tug TSWV lub Tuamtsev huv lub nroog Silaus taag. Hanas ntxhuv sab heev, nwg txawm sawv tseeg, nwg thov tug TSWV hab quaj nca heev. Thaus ntawd tug povthawj Elis nyob quastsawg ntawm tug TSWV lub Tuamtsev lub qhovrooj ib saab.

¹¹Hanas coglug has tas: “Tug TSWV kws muaj fwjchim luj kawg nkaus, thov koj tsaa qhovmuag saib kuv kws yog koj tug ntxhais qhev! Thov koj pum kuv tej kev lwj sab hab hlub kuv! Thov koj ncu txug kuv hab pub kuv muaj ib tug tub! Kuv coglug rua koj has tas, kuv yuav muab tug tub ntawd fij rua koj, ua koj teg num moog taag nwg simneej hab yuav tsi chais nwg cov plaubhau le.”

¹²Hanas thov tug TSWV ntev loo. Elis saib ntsoov Hanas lub qhovncauj.

¹³Hanas thov Vaajtswv qhovncauj ua zug kais, tabsis tsi nov suab le. Yog le ntawd, Elis xaav has tas yog Hanas qaug cawv.

¹⁴Elis txhaj has rua Hanas has tas, “Koj tseem yuav qaug cawv le ko moog txug thaus twg? Koj ca le tseg tsi xob haus cawv lawm!”

¹⁵Hanas teb has tas, “Kuv tug tswv, tsi yog kuv qaug cawv, kuv tsi tau haus cawv! Kuv nyuaj sab heev, kuv taabtom thov Vaajtswv hab muab kuv tej kev nyuaj sab tso rua tug TSWV.

¹⁶Koj tsi xob xaav has tas, kuv yog ib tug quaspuj kws tsi tsimtxaj. Kuv thov Vaajtswv le nuav tub yog vim kuv muaj kev nyuaj sab heev.”

¹⁷Elis has tas, “Koj ca le moog tsev kaaj sab lug, hab thov tug TSWV kws yog cov Yixalayees tug Vaajtswv pub rua koj lawv le koj thov nwg lawm.”

¹⁸Hanas teb has tas, “Thov koj hlub kuv.” Ces Hanas txawm moog noj mov hab tsi nyuaj sab lawm.

¹⁹Thaus kaaj ntug Ekanas hab nwg tsev tuabneeg sawv ntxuv lug pehawm tug TSWV taag, ces puab txawm rov qaab lug tsev rua huv lub nroog Lamas lawm. Ekanas nrug Hanas pw, hab tug TSWV ua lawv le Hanas tej lug thov.

²⁰Ces Hanas txawm xeeb tub hab yug tau ib tug tub. Nwg muab tug mivtub ntawd tis npe hu ua Xamuyees, rua qhov Hanas has tas, “Kuv thov tug TSWV pub tug tub nuav rua kuv.”

²¹Xyoo tom qaab rov txug lub caij kws Ekanas coj tsaj moog tua fij rua tug TSWV lawv le nwg tau coglug tseg, nwg hab nwg quaspuj mivnyuas txhaj rov qaab moog rua huv lub nroog Silaus.

²²Tabsis zag nuav Hanas tsi moog lawm. Hanas has rua nwg tug quasyawg has tas, “Kuv yuav tog kuas kuv tug mivtub tseg taug mig tsaiv, kuv maam le coj nwg moog rua huv tug TSWV lub tsev, hab ca nwg nyob huv moog taag nwg simneej le.”

²³Ekanas teb has tas, “Koj ca le ua lawv le koj pum zoo; koj nyob huv tsev moog txug thaus tug mivtub tseg taug mig tsaiv. Thov tug TSWV ua kuas koj tej lug cog tseg tav.” Yog le ntawd, Hanas txhaj nyob huv tsev hab tu nwg tug mivtub xwb.

²⁴Thaus tug mivtub tseg taug mig lawm, Hanas txawm caab ib tug txiv nyuj noobnyoog peb xyoos, ris ib tawb moov qeb, ib naab cawv txiv maab, hab coj nwg tug mivtub moog rua peg lub nroog Silaus. Txawm yog Xamuyees tseem yau heev los nwg ca le coj moog rua huv tug TSWV lub tsev kws nyob peg lub nroog Silaus.

²⁵Thaus puab muab tug txiv nyuj ntawd tua fij taag lawm, puab txawm coj tug mivtub moog cob rua Elis.

²⁶Hanas has rua Elis has tas, “Tug tswv, koj puas tseem ncu tau kuv lawm? Kuv yog tug quaspuj kws thaus koj pum tuaj sawv ntawm nuav thov tug TSWV ntaag.

²⁷Kuv thov tug TSWV pub tug mivtub nuav rua kuv, mas tug TSWV pub rua kuv lawv le kuv tej lug thov.

²⁸Yog le ntawd, kuv txhaj muab kuv tug mivtub fij rua tug TSWV, ca nwg ua tug TSWV tuabneeg moog taag nwg simneej le.” Ces puab txawm pehawm tug TSWV qhov ntawd.