Read Hmong Njua 1 Xamuyees 11 Bible Online

1 Xamuyees 11 - Hmong Njua bible

1 Xamuyees 11

¹Tau ib hlis tom qaab, Vaajntxwv Nahas kws kaav tebchaws Amoos coj nwg cov tubrog tuaj vij hab tua lub nroog Yanpes huv cheebtsaam Nkile-as. Cov tuabneeg huv lub nroog Yanpes has rua Nahas has tas, “Thov koj coglug rua peb, peb yuav ca koj kaav peb.”

²Nahas teb has tas, “Kuv coglug rua mej los tau, tabsis ca kuv muab mej txhua tug lub qhovmuag saab xis kaus povtseg tsaiv, kuv maam coglug kuas cov Yixalayees poob ntsejmuag huv tuabsi.”

³Cov thawjcoj huv lub nroog Yanpes teb has tas, “Thov ncua sijhawm xyaa nub rua peb, peb khaiv tuabneeg moog has thoob plawg tebchaws Yixalayees. Yog tsi muaj leejtwg paab peb, peb maam swb koj.”

⁴Thaus cov tuabneeg xaa xuv moog txug huv lub nroog Nkinpe-as kws Xa-ules nyob, hab puab qha tej xwm nuav rua suavdlawg, ua rua suavdlawg ntshai hab tsaa suab hlo quaj.

⁵Thaus ntawd Xa-ules taabtom caab nwg tug txiv nyuj nraag teb lug, nwg nug has tas, “Muaj xwm dlaabtsi? Vim le caag suavdlawg yuav quaj zum zawg le nuav?” Puab txhaj pav qhov kws cov tuabneeg xaa xuv peg lub nroog Yanpes tuaj ntawd rua Xa-ules noog.

⁶Thaus Xa-ules nov tej xwm ntawd, Vaajtswv tug ntsujplig lug kaav hlo Xa-ules sab, nwg txhaj npautawg heev.

⁷Nwg muab ob tug txiv nyuj tua kag, txav ua tej thooj hab muab rua ib cov tuabneeg xaa moog thoob plawg lub tebchaws Yixalayees, hab has rua suavdlawg has tas, “Yog leejtwg tsi nrug Xa-ules hab Xamuyees moog tua rog, yuav muab tug ntawd cov txiv nyuj tua hab txav ua tej thooj le nuav!” Cov Yixalayees ntshai nyob tsaam tug TSWV ua le caag rua puab, puab txhaj koom ua ib lub sab tuaj ua ke.

⁸Xa-ules kuas suavdlawg tuaj sis sau rua huv Npexlees; cov Yixalayees muaj peb puas txheeb leej, hab cov Yudas muaj peb caug txheeb leej.

⁹Puab has rua cov tuabneeg kws xaa xuv peg lub nroog Yanpes tuaj has tas, “Mej ca le rov moog has rua mej cov tuabneeg paub has tas, pigkig peb yuav tuaj paab kuas tau mej ua ntej taav su.” Thaus cov tuabneeg huv Yanpes nov le ntawd puab zoo sab heev

¹⁰hab has rua Nahas has tas, “Pigkig peb maam le ua ib sab swb koj, koj yuav ua le caag rua peb los tau.”

¹¹Taagkig kaaj ntug txoog, Xa-ules muab cov tubrog faib ua peb paab, puab txawm mos tsaus tsi moog tua cov Amoos huv lub yeej hab puab sis tua ib taav su, Xa-ules cov tubrog tua cov Amoos tuag coob heev. Cov kws seem tuag, nyag taug nyag fuas kev tsiv lawm.

¹²Cov Yixalayees has rua Xamuyees tas, “Cov tuabneeg kws has tas, puas tsimnyog ca Xa-ules ua vaajntxwv kaav peb, cov tuabneeg ntawd nyob qhov twg lawm? ca le nteg puab lug rua peb, peb yuav muab puab tua povtseg.”

¹³Tabsis Xa-ules teb has tas, “Nub nua tsi xob muab ib tug twg tua povtseg, rua qhov nub nua yog nub kws tug TSWV cawm cov Yixalayees dlim.”

¹⁴Ces Xamuyees has rua puab has tas, “Peb ca le moog rua huv lub nroog Nkilenkas, hab has qha rua suavdlawg paub ib zag ntxiv has tas, Xa-ules yog peb tug vaajntxwv.”

¹⁵Yog le ntawd, puab suavdlawg txhaj moog rua ntawm qhov chaw pehawm Vaajtswv huv lub nroog Nkilenkas, hab qha rua cov pejxeem suavdlawg paub has tas Xa-ules yog vaajntxwv. Puab muab tsaj tua hlawv fij rua tug TSWV ua kev sis raug zoo, Xa-ules hab cov Yixalayees noj haus zoo sab kawg le.