Read Hmong Njua 1 Xamuyees 12 Bible Online

1 Xamuyees 12 - Hmong Njua bible

1 Xamuyees 12

¹Xamuyees has rua cov Yixalayees has tas, “Kuv tub ua tav lawv le mej thov, hab tsaa tau ib tug vaajntxwv kaav mej,

²hab nwgnuav nwg yuav ua tug coj mej. Kuv laug plaubhau dlawb taag lawm, kuv tej mivnyuas puavleej nrug mej nyob. Kuv coj mej thaus kuv tseem hluas lug txug naj nub nua.

³Tsheem kuv tseem nyob ntawm nuav, yog yaav taag lug kuv tau ua txhum qhov twg, ces mej ca le kom kuv rua tug TSWV hab tug vaajntxwv kws tug TSWV xaiv. Kuv puas tau nyag mej leejtwg tug nyuj lossis tug neeg luav? Kuv puas tau ua tsi ncaaj lossis tsimtxom mej leejtwg? Kuv puas tau yuav mej leejtwg tej nyaj xab? Yog kuv tau ua tej nuav lawm, kuv yuav them tej ntawd huv tuabsi rov qaab.”

⁴Cov pejxeem teb has tas, “Koj yeej tsi tau ua tsi ncaaj lossis tsimtxom peb le, koj tsi tau muab leejtwg ib yaam dlaabtsi le.”

⁵Ces Xamuyees teb has tas, “Nub nua muaj tug TSWV hab tug vaajntxwv kws nwg xaiv ua timkhawv has tas, mej yeej tsi pum kuv ua ib qho txhum le.” Puab teb has tas, “Muaj tug TSWV ua peb suavdlawg tug timkhawv.”

⁶Xamuyees has ntxiv tas, “Tug TSWV yog tug kws xaiv Mauxes hab Aloos, hab nwg coj mej cov yawmkoob tawm nraag tebchaws Iziv lug.

⁷Nwgnuav mej nyag ca le sawv ntawm nyag qhov chaw, kuv yuav kom mej rua tug TSWV, kuas mej ncu txug tej txujci tseemceeb kws tug TSWV tau ua paab mej hab mej cov yawmkoob lawm.

⁸Thaus u Yakhauj tau coj nwg tsev tuabneeg moog nyob nraag tebchaws Iziv, hab cov Iziv tau tsimtxom puab. Mej cov yawmkoob tau tsaa ncauj thov tug TSWV paab puab. Tug TSWV txhaj khaiv Mauxes hab Aloos coj puab tawm nraag tebchaws Iziv lug nyob huv lub tebchaws nuav.

⁹Tabsis puab tsi ncu txug tug TSWV kws yog puab tug Vaajtswv lawm, tug TSWV txhaj muab puab cob rua cov Filitees txhais teg hab cob rua tug vaajntxwv kws kaav tebchaws Mau-am txhais teg, hab cob rua Xixelas kws yog Vaajntxwv Yanpees tug thawj tubrog huv lub nroog Haxaus txhais teg, puab txhaj tuaj ua rog rua mej cov yawmkoob.

¹⁰Puab txhaj tsaa ncauj thov tug TSWV has tas, ‘Tug TSWV, peb ua txhum lawm, rua qhov peb tau tso koj tseg, hab moog pe tug mlom Npa-aas hab tug mlom quaspuj Atates. Thov koj paab kuas peb dlim ntawm peb cov yeebncuab txhais teg, peb yuav pehawm koj tuab leeg xwb!’

¹¹Tug TSWV txhaj tsaa Nkide-oos, tsaa Npalaj, tsaa Yefethas, hab tsaa kuv ua tug kawg. Peb tau paab mej dlim ntawm mej cov yeebncuab txhais teg, mej txhaj tau nyob kaaj sab lug.

¹²Tabsis thaus mej pum Vaajntxwv Nahas kws kaav tebchaws Amoos taabtom tuaj tua mej, mej txawm tso tug TSWV kws yog mej tug Vaajntxwv tseg hab has rua kuv tas, ‘Peb xaav tau ib tug vaajntxwv lug kaav peb.’

¹³“Tug vaajntxwv kws mej xaiv, nwg nrug mej nyob ntawm nuav; mej thov tug TSWV kuas tsaa ib tug vaajntxwv rua mej, nwgnuav tug TSWV tub pub rua mej muaj lawm.

¹⁴Yog mej fwm tug TSWV kws yog mej tug Vaajtswv, ua nwg teg num, noog nwg lug, hab ua lawv le nwg tej lug saamfwm, mej hab mej tug vaajntxwv txhaj le yuav vaammeej.

¹⁵Tabsis yog mej tsi noog tug TSWV lug hab tsi ua lawv le nwg tej lug saamfwm, nwg yuav tawmtsaam mej hab mej tug vaajntxwv.

¹⁶Yog le ntawd, mej suavdlawg nyag sawv ntawm nyag qhov chaw, mej yuav pum ib yaam txujci tseemceeb kws tug TSWV ua.

¹⁷Nwgnuav yog lub caij ntuj qhua los tsi yog? Tabsis kuv yuav thov tug TSWV ua kuas xub nroo hab tso naag lug. Thaus mej pum tej nuav lawm, mej yuav paub has tas, qhov kws mej thov tug TSWV tsaa ib tug vaajntxwv kaav mej, yog mej ua txhum rua tug TSWV lawm!”

¹⁸Yog le ntawd, Xamuyees txhaj thov tug TSWV, hab nub ntawd tug TSWV ua rua xub nroo hab tso naag lug. Suavdlawg ntshai tug TSWV hab Xamuyees kawg le.

¹⁹Hab puab has rua Xamuyees has tas, “Thov koj thov tug TSWV kws yog koj tug Vaajtswv paab peb, peb txhaj yuav tsi tuag. Nwgnuav peb paub has tas, tsi yog peb ua lwm yaam kev txhum xwb, tabsis peb tseem thov kuas Vaajtswv tsaa ib tug vaajntxwv kaav peb hab, qhov ntawd yeej yog peb ua txhum lawm tag.”

²⁰Xamuyees teb has tas, “Mej tsi xob ntshai, txawm yog mej tau ua txhum le ntawd lawm los mej tsi xob tso tug TSWV tseg, tabsis mej yuavtsum ua nwg teg num kuas kawg sab kawg ntsws.

²¹Tsi xob moog pe tej vaajtswv cuav; tej ntawd yeej paab tsi tau lossis cawm tsi tau mej le, rua qhov tej ntawd yog vaajtswv cuav xwb.

²²Tug TSWV coglug tseg has tas, nwg yuav tsi tso mej tseg ib zag le, rua qhov nwg pum zoo xaiv mej ua nwg tsaav tuabneeg lawm.

²³Tug TSWV kuas kuv ncu ntsoov thov nwg tsi tseg paab mej. Yog kuv tsi thov nwg paab mej, ces yog kuv ua txhum rua nwg lawm. Kuv yuav qha kuas mej paub qhov zoo hab qhov kws tsimnyog mej ua.

²⁴Mej yuavtsum noog tug TSWV lug hab ua nwg teg num kuas kawg sab kawg ntsws. Mej yuavtsum ncu ntsoov tej txujci tseemceeb kws tug TSWV tau ua paab mej lawm.

²⁵Tabsis yog mej tseem rov ua txhum dlua, mej hab mej tug vaajntxwv yuav raug kev puamtsuaj.”