Read Hmong Njua 1 Xamuyees 13 Bible Online

1 Xamuyees 13 - Hmong Njua bible

1 Xamuyees 13

¹Thaus Xa-ules ua vaajntxwv nwg noobnyoog muaj… xyoo hab nwg kaav tebchaws Yixalayees tau ob xyoos

²Xa-ules xaiv tau cov Yixalayees peb txheeb leej ua nwg cov tubrog, nwg tseg ob txheeb leej nrug nwg nyob huv lub nroog Mikemas hab sau lub laaj roob ntawm lub nroog Npethees, hab tso ib txheeb leej nrug nwg tug tub Yaunathaas moog rua nraag lub nroog Nkinpe-as, huv xeem Npeenyamees cheebtsaam aav. Dlua le cov, nwg kuas puab rov moog tsev lawm.

³Yaunathaas tua cov Filitees tug thawj tubrog tuag rua huv Nkenpas, hab cov Filitees puavleej nov has tas puab tug thawj tubrog tuag lawm. Xa-ules khaiv tuabneeg moog hu hab tshuab raaj tshuab xyu thoob tebchaws kuas cov Henplais tuaj moog ua rog.

⁴Thaus cov Yixalayees nov has tas, Xa-ules tua cov Filitees tug thawj tubrog tuag, hab nov has tas cov Filitees ntxub cov Yixalayees heev, yog le ntawd, cov Yixalayees txhaj tuaj ua tubrog ntxiv rua Xa-ules cov tubrog huv lub nroog Nkilenkas.

⁵Cov Filitees txhij tubrog tuaj tua cov Yixalayees; cov Filitees muaj peb caug txheeb lub tsheb neeg ua rog, rau txheeb leej tubrog caij neeg, hab muaj tubrog coob ib yaam le tej xuabzeb ntawm ntug havtxwv. Puab tuaj tsuam yeej rua ntawm Mikemas kws nyob ntawm Npethavees saab nubtuaj.

⁶Cov Filitees tua cov Yixalayees nyaav heev, ua rua cov Yixalayees yuav laug swb. Cov Yixalayees ibtxha tub tsiv moog nkaum rua huv tej qhov zeb qhov tsua, tej kis zeb kis tsua lossis huv tej qhov aav hab huv tej qhov tshij;

⁷Muaj ibtxha tub tsiv hlaa tug Dlej Yauladees moog rua tim Nkile-as hab Khas cheebtsaam aav lawm. Xa-ules tseem nyob huv lub nroog Nkilenkas, hab cov tubrog kws nrug nwg ntshai tshee nyo.

⁸Nwg tog Xamuyees tau xyaa nub, lawv le Xamuyees has rua nwg, tabsis Xamuyees tseem tuaj tsi tau txug huv lub nroog Nkilenkas. Suavdlawg txawm tsiv zum zawg tso Xa-ules tseg.

⁹Yog le ntawd, Xa-ules txhaj has rua puab tas, “Mej ca le caab tej tsaj kws mej coj tuaj tua hlawv fij hab tej kws fij rua tug TSWV ua kev sis raug zoo lug rua kuv.” Ces Xa-ules txawm muab tsaj tua hlawv fij rua tug TSWV,

¹⁰thaus Xa-ules muab tsaj tua hlawv fij taag, Xamuyees txawm tuaj txug ndlua, Xa-ules tawm moog cuag Xamuyees hab tog txais nwg,

¹¹tabsis Xamuyees nug has tas, “Koj ua dlaabtsi tod?” Xa-ules teb has tas, “Suavdlawg tsiv zum zawg tso kuv tseg, hab koj tsi tuaj lawv le koj teem tseg. Dlua le ntawd, cov Filitees tub tuaj sis sau rua huv lub nroog Mikemas lawm.

¹²Kuv txhaj xaav has tas, ‘Cov Filitees yeej yuav tuaj tua kuv huv lub nroog Nkilenkas nuav, hab kuv tseem tsi tau ua ib yaam dlaabtsi kuas tug TSWV paab kuv.’ Yog le ntawd, kuv txhaj xaav has tas ca kuv muab tsaj tua fij rua tug TSWV.”

¹³Xamuyees teb has tas, “Koj ruag kawg le, koj txhaj ua tej nuav, koj yeej tsi noog tug TSWV kws yog koj tug Vaajtswv tej lug saamfwm rua koj. Yog koj noog tug TSWV lug, nwg yuav ca koj hab koj cov xeebntxwv ua vaajntxwv kaav cov Yixalayees moog le.

¹⁴Tabsis vim koj tsi noog tug TSWV lug, nwgnuav koj yuav tsi tau kaav cov Yixalayees lawm. Tug TSWV yuav tsaa dlua ib tug kws ua hum nwg sab lug kaav nwg tsaav tuabneeg.”

¹⁵Xamuyees txawm tawm huv lub nroog Nkilenkas moog lawm. Cov tuabneeg kws tseem nrug Xa-ules nyob txhaj nrug nwg moog rua ntawm nwg cov tubrog. Puab tawm huv lub nroog Nkilenkas moog txug rua ntawm lub nroog Nkinpe-as huv xeem Npeenyamees cheebtsaam aav, Xa-ules txheeb nwg cov tubrog, tseem tshuav kwvlaam le rau pua leej.

¹⁶Xa-ules hab nwg tug tub Yaunathaas, hab obtug cov tubrog tsuam yeej rua ntawm lub nroog Kenpas huv xeem Npeenyamees cheebtsaam aav; cov Filitees tsuam yeej rua ntawm lub nroog Mikemas.

¹⁷Cov Filitees faib ua peb paab tawm huv puab lub yeej tuaj: ib paab moog rua ntawm Aufelas huv Sualis cheebtsaam aav,

¹⁸ib paab moog rua ntawm Npethes Hauloos, hab ib paab moog rua ntawm nrimteb kws saib pum lub Haav Xenpauyees hab lub roob mojsaab qhua.

¹⁹Lub sijhawm ntawd, nyob huv tebchaws Yixalayees tsi muaj ib tug txawj ntaus hlau le, rua qhov cov Filitees tsi pub cov Henplais ntaus ntaaj ntaus muv le.

²⁰(Cov Yixalayees txhaj coj puab tej khais, tej toomtxhob, tej taus hab tej lag moog rua cov Filitees khu hab huv xwb;

²¹huv ib raab taus hab tawm tug ku yog ib lub nyaj, huv raab khais hab raab toomtxhob, yog ob lub nyaj.)

²²Yog le ntawd, thaus puab sis tua, cov tubrog Yixalayees txhaj tsi muaj ntaaj lossis muv le, tsuas yog Xa-ules hab nwg tug tub Yaunathaas txhaj le muaj xwb.

²³Cov tubrog Filitees ib paab tuaj zuv ntawm lub dlawm Mikemas.