Read Hmong Njua 1 Xamuyees 14 Bible Online

1 Xamuyees 14 - Hmong Njua bible

1 Xamuyees 14

¹Muaj ib nub Yaunathaas has rua tug tub hluas kws nqaa nwg raab ntaaj hab raab muv has tas, “Wb moog huv cov Filitees lub yeej.” Tabsis Yaunathaas tsi qha rua Xa-ules tug kws yog nwg txiv

²kws tsaa tsevntaub nyob huv qaab tsob ntoo txiv ntsab pobkws ntawm lub nroog Minkeloos kws nyob tsi dleb ntawm lub nroog Nkinpe-as; Xa-ules cov tubrog muaj kwvlaam le rau pua leej.

³(Tug povthawj kws naav lub tsho efaus yog Ahiyas kws yog Ahitus tug tijlaug Ikhanpaus tug tub, Ikhanpaus hab Ahitus yog Finehas tub hab yog Elis xeebntxwv. Elis yog tug povthawj kws ua Tug TSWV teg num nyob huv lub nroog Silaus.) Cov tubrog tsi paub has tas, Yaunathaas tub moog lawm.

⁴Ntawm lub dlawm Mikemas kws Yaunathaas obtug hlaa moog rua ntawm cov Filitees lub yeej, muaj ob tug ncej zeb luj ntse zuag plag, ib tug nyob ib saab kev: ib tug hu ua Npauxes, hab ib tug hu ua Xenes.

⁵Tug kws nyob saab peg, tig moog rua lub nroog Mikemas, hab tug kws nyob saab nraag, tig moog rua nraag lub nroog Nkenpas.

⁶Yaunathaas has rua tug tub hluas has tas, “Wb ca le hlaa moog rua tom cov Filitees kws tsi ua kevcai txav lub yeej. Tej zag tug TSWV yuav paab wb; yog nwg paab wb, yeej tsi muaj dlaabtsi yuav txwv tau nwg kuas tsi pub wb yeej le. Txawm yog wb ob leeg xwb los wb yuav kovyeej.”

⁷Tug hluas teb has tas, “Koj ua dlaabtsi kuv nrug koj ua, koj moog qhov twg kuv nrug koj moog.”

⁸Yaunathaas teb has tas, “Zoo heev, wb ca le moog kuas cov Filitees pum wb.

⁹Yog puab hu kuas wb tog puab tuaj cuag wb tsaiv, los wb ca le nyob tuabywv tog.

¹⁰Tabsis yog puab kuas wb moog cuag puab, wb ca le moog, rua qhov tej ntawd yuav yog lub cim qha rua wb paub has tas, tug TSWV tub muab puab cob rua wb teg lawm tag.”

¹¹Yog le ntawd, Yaunathaas hab tug tub hluas txawm tawm moog rua cov Filitees pum hab cov Filitees has tas, “Mej saib tim saib, cov Henplais muaj qee leej tawm huv tej qhov aav kws puab nkaum lug lawm!”

¹²Cov Filitees txawm hu Yaunathaas hab tug tub hluas has tas, “Meb ca le lug ntawm nuav! peb yuav qha dlaabtsi rua meb!” Yaunathaas has rua tug tub hluas has tas, “Koj ca le lawv kuv qaab, tug TSWV tub pub peb cov Yixalayees kovyeej puab lawm.”

¹³Yaunathaas txawm nkaag ua ntej hab tug tub hluas nkaag lawv nwg qaab. Yaunathaas ntaus cov Filitees qaug rua huv aav, ces tug tub hluas ca le khaws tua xwb.

¹⁴Thawj zag nuav Yaunathaas hab tug tub hluas tua cov Filitees tuag kwvlaam le neeg nkaum leej. Thaaj chaw kws puab sis ntaus sis tua lwj ntsuav ntawd dlaav le ob zeg laj.

¹⁵Cov Filitees, tsi has cov kws nyob huv taj, cov tubrog kws nyob huv yeej, hab cov tubrog kws pheej nyag tuaj tua cov Yixalayees, puavleej ntshai kawg le. Aav txawm qeeg ua zug koog ua rua cov Filitees ntshai hab yoob taag.

¹⁶Xa-ules cov tubrog kws zuv huv lub nroog Nkinpe-as huv xeem Npeenyamees cheebtsaam aav, pum cov Filitees tsiv zum zawg rua txhua qhov.

¹⁷Yog le ntawd, Xa-ules has rua nwg cov tubrog has tas, “Mej ca le txheeb peb cov tubrog saib leejtwg tsi nyob huv yeej lawm.” Thaus puab txheeb, puab tsi pum Yaunathaas hab tug tub hluas kws nqaa Yaunathaas raab ntaaj hab raab muv lawm.

¹⁸Xa-ules has rua tug povthawj Ahiyas has tas, “Koj ca le nqaa lub efaus lug ntawm nuav.” (Nub ntawd Ahiyas yog tug nqaa lub efaus ua cov Yixalayees ntej).

¹⁹Thaus Xa-ules tseem has rua tug povthawj, cov tubrog Filitees kws nyob huv yeej yimfuab ua ntxhuv quas nab. Yog le ntawd Xa-ules txhaj has rua tug povthawj Ahiyas has tas, “Tsi muaj sijhawm nug tug TSWV lawm!”

²⁰Xa-ules hab nwg cov tubrog txhaj dlha moog tua cov Filitees kws puab taabtom rov sis ntaus sis tua ntxhuv quas nyo ntawd.

²¹Cov Henplais qee leej kws tuaj cov Filitees tog hab nrug cov Filitees nyob huv lub yeej ntawd, puab txawm hloov sab rov lug tuaj Xa-ules hab Yaunathaas tog tua cov Filitees.

²²Cov Henplais kws tsiv moog nkaum peg tej roob huv tebchaws Efalayees, nov has tas, cov Filitees taabtom swb hab tsiv zum zawg lawm, puab txawm sau nthwv tuaj paab Xa-ules tua cov Filitees

²³moog dlhau plawg lub nroog Npethavees. Nub ntawd tug TSWV paab cov Yixalayees dlim.

²⁴Nub ntawd cov Yixalayees tshaib plaab hab qaug zug heev, rua qhov Xa-ules coglug has tas, “Nub nua yog leejtwg noj mov ua ntej kws kuv ua pauj rua kuv cov yeebncuab, tug ntawd yuav raug foom tsi zoo.” Yog le ntawd, nub ntawd ib nub txhaj tsi muaj leejtwg noj mov le.

²⁵Taagnrho cov tubrog lug txug rua huv ib thaaj haav zoov kws muaj zib ntaab ntau heev,

²⁶zib ntaab nyob puv nreeg txhua qhov, tabsis tsi muaj leejtwg muaj cuabkaav muab noj le, rua qhov puab ntshai Xa-ules tej lug foom tsi zoo.

²⁷Tabsis Yaunathaas tsi nov qhov kws nwg txiv yuav foom tsi zoo rua tug kws tsi noog lug, nwg txhaj muab nwg tug paas nreg tshaum lub qa tsev ntaab lug noj. Thaus Yaunathaas noj taag, nwg txhaj muaj zug mivntsiv tuaj.

²⁸Tabsis muaj ib tug tubrog has rua Yaunathaas has tas, “Peb suavdlawg tshaib plaab hab qaug zug heev, tabsis koj txiv yuam kuas peb coglug has tas, ‘Tug kws noj mov nub nua, tug ntawd yuav raug foom tsi zoo.’ ”

²⁹Yaunathaas teb has tas, “Ua caag kuv txiv yuav ua nruj ua luaj rua peb cov tuabneeg! Mej saib kuv muaj zug mivntsiv tuaj, rua qhov kuv noj cov zib ntaab ntawd!

³⁰Yog nub nua cov tubrog tseem tau noj tej mov kws txeeb tau ntawm cov yeebncuab lug, mas suavdlawg hajyam yuav muaj zug tua cov Filitees tuag coob dlua hab.”

³¹Nub ntawd cov Yixalayees tua yeej cov Filitees ntawm lub nroog Mikemas moog ti nkaus lub nroog Aiyaloos. Thaus ntawd cov Yixalayees tshaib plaab hab qaug zug heev.

³²Puab txhaj dlha moog muab tej yaaj hab tej nyuj kws puab txeeb tau ntawm cov yeebncuab lug tua hab muab hlais noj nyoog ua ntshaav lab vog.

³³Muaj tuabneeg moog qha rua Xa-ules has tas, “Koj saib, muaj tuabneeg noj tej nqaj nyoog kws tseem muaj ntshaav. Puab ua le ntawd, yog puab ua txhum rua tug TSWV lawm!” Xa-ules nthe tawg ntho has tas, “Cov nyuas tuabneeg ntxeev sab ko, ca le moog dlov ib lub pobzeb luj lug rua kuv ntawm nuav!”

³⁴Tom qaab ntawd, Xa-ules has rua puab has tas, “Mej ca le moog has kuas puab caab puab tej nyuj hab tej yaaj tuaj tua noj rua ntawm nuav. Puab tsi xob noj tej nqaj nyoog kws muaj ntshaav, yuav ua txhum rua tug TSWV.” Yog le mo ntawd, puab txhaj caab puab tej nyuj lug tua qhov ntawd.

³⁵Xa-ules teeb tau ib lub thaaj fij khoom rua tug TSWV. Lub thaaj ntawd yog thawj lub kws Xa-ules teeb.

³⁶Xa-ules has rua nwg cov tubrog has tas, “Mo nuav peb yuav moog tua cov Filitees ib mos kaaj ntug kuas puab tuag taag hab fuab puab tej khoom huv tuabsi.” Cov tubrog teb has tas, “Ca le ua lawv le koj pum zoo.” Tabsis tug povthawj teb has tas, “Ca peb nug Vaajtswv tsaiv.”

³⁷Yog le ntawd, Xa-ules nug tug TSWV has tas, “Kuv yuav moog tua cov Filitees los tsi moog? Koj puas pub kuas peb tua yeej puab?” Tabsis nub ntawd Vaajtswv tsi teb le.

³⁸Xa-ules has rua cov Yixalayees cov thawjcoj has tas, “Mej lug ntawm nuav, peb ua tuab zoo xaav saib, nub nua peb tau ua txhum dlaabtsi lawm.

³⁹Kuv coglug rua tug TSWV kws muaj sa nyob hab yog tug kws pub rua cov Yixalayees muaj yeej has tas, txawm yog kuv tug tub Yaunathaas ua txhum los yuavtsum muab nwg tua povtseg”, tabsis tsi muaj leejtwg has ib lus le.

⁴⁰Ces Xa-ules has rua puab has tas, “Mej ca le moog sawv lawm tod, kuv hab Yaunathaas yuav sawv ntawm nuav.” Puab teb has tas, “Ua lawv le kws koj pum zoo.”

⁴¹Xa-ules thov tug TSWV kws yog cov Yixalayees tug Vaajtswv has tas, “Tug TSWV, ua caag nub nua koj tsi teb kuv?” Tug TSWV kws yog cov Yixalayees tug Vaajtswv, yog kuv tug tub Yaunathaas lossis kuv ua txhum, thov koj qha rua kuv ntawm lub Ulees, tabsis yog koj tsaav tuabneeg Yixalayees ua txhum, thov koj qha rua kuv ntawm lub Thumees. Thaus nwg saib ua cav yog Yaunathaas hab Xa-ules ua txhum; tsi yog cov pejxeem ua txhum. l

⁴²Xa-ules has tas, “Tug TSWV, thov koj qha saib, yog kuv tug tub Yaunathaas lossis yog kuv ua txhum.” Thaus nwg saib ua cav yog Yaunathaas ua txhum.

⁴³Xa-ules nug Yaunathaas has tas, “Koj ua txhum dlaabtsi?” Yaunathaas teb has tas, “Kuv noj mivntsiv zib ntaab xwb. Kuv nyob ntawm nuav, kuv yeej zoo sab tuag.”

⁴⁴Xa-ules has tas, “Yog kuv tsi tua koj, thov kuas Vaajtswv tua kuv povtseg!”

⁴⁵Tabsis cov tuabneeg has rua Xa-ules has tas, “Koj yuav muab Yaunathaas tug kws paab tau cov Yixalayees kovyeej luj npaum le nuav tua povtseg los? Yog koj tua nwg peb yeej tsi zoo sab rua koj le! Peb thov coglug rua tug TSWV kws muaj sa nyob has tas, txawm yog Yaunathaas ib txuj nyuas plaubhau los tsi pub kuas poob le, tej kws nub nua nwg ua yeej yog Vaajtswv paab xwb.” Yog le ntawd, suavdlawg txhaj paab tau Yaunathaas dlim tsi raug tua tuag.

⁴⁶Ces Xa-ules txawm tso tseg tsi caum cov Filitees tua hab cov Filitees rov qaab moog rua puab lub tebchaws lawm.

⁴⁷Lub sijhawm kws Xa-ules ua vaajntxwv kaav tebchaws Yixalayees, nwg ntaus tsuv ntaus rog tawmtsaam nwg cov yeebncuab rua txhua qhov. Nwg tua cov Mau-am, cov Amoos hab cov Edoos, cov vaajntxwv kws kaav tebchaws Xaunpas hab cov Filitees. Txhua qhov kws nwg tua, nwg puavleej tua yeej.

⁴⁸Nwg sab tawv hab tua rog ua tau heev tsi ntshai leejtwg le. Txawm yog cov Amalej los nwg tua yeej huv tuabsi. Txhua zag kws yeebncuab tuaj tua cov Yixalayees los nwg cawm tau puab dlim.

⁴⁹Xa-ules cov tub yog: Yaunathaas, Isevis hab Makhisesuas. Xa-ules tug ntxhais hlub hu ua Melas hab tug ntxhais yau hu ua Mikhas.

⁵⁰Xa-ules tug quaspuj hu ua Ahinaus kws yog Ahimas tug ntxhais; Xa-ules tug thawj tubrog hu ua Aneles kws yog Xa-ules tug yawm laug Neles tug tub.

⁵¹Kises kws yog Xa-ules txiv hab Neles kws yog Aneles txiv, yog Anpiyees tub.

⁵²Thaus Xa-ules ua neej nyob, nwg nrug cov Filitees sis tua nyaav heev. Yog nwg pum ib tug txivneej kws khov kho hab sab tawv, ces nwg txawm coj tug ntawd moog ua nwg tubrog.