Read Hmong Njua 1 Xamuyees 15 Bible Online

1 Xamuyees 15 - Hmong Njua bible

1 Xamuyees 15

¹Xamuyees has rua Xa-ules has tas, “Kuv yog tug kws tug TSWV kuas muab roj laub rua koj taubhau, tsaa koj ua vaajntxwv kaav nwg tsaav tuabneeg Yixalayees. Nwgnuav koj ca le noog tug TSWV kws muaj fwjchim luj kawg nkaus tej lug saib has le caag.

²Nwg yuav rau txim rua cov Amalej, rua qhov puab cov yawmkoob tawmtsaam cov Yixalayees thaus puab tsiv nraag tebchaws Iziv lug,

³Koj ca le moog tua cov Amalej hab rhuav txhua yaam kws puab muaj kuas puamtsuaj taag, tsi xob tseg ib yaam le. Koj lojxov tua tej quaspuj txivneej, tej mivnyuas hab tej nyuj, tej yaaj, tej ntxhuav hab tej neeg luav huv tuabsi povtseg.”

⁴Xa-ules txhij taagnrho nwg cov tubrog tuaj sis sau rua huv lub nroog Telees rua nwg txheeb, cov tubrog Yixalayees muaj ob puas txheeb leej hab cov tubrog Yudas muaj kaum txheeb leej.

⁵Xa-ules hab nwg cov tubrog txawm moog rua nraag cov Amalej lub nroog hab zuv kev tua huv lub haav qhuav.

⁶Xa-ules xaa xuv moog rua cov Kenais kws puab cov yawmkoob tau ua zoo rua cov Yixalayees, thaus puab tsiv nraag tebchaws Iziv lug has tas, “Mej ca le tsiv tawm tsi xob nrug cov Amalej nyob, mej txhaj yuav tsi raug tua tuag.” Yog le ntawd, cov Kenais txhaj tsiv lawm.

⁷Xa-ules tua yeej cov Amalej txij ndlua ntawm lub nroog Havilas moog ti nkaus rua Sus kws nyob ntawm tebchaws Iziv saab nubtuaj;

⁸Xa-ules nteg tau cov Amalej tug Vaajntxwv Ankas, hab muab cov pejxeem tua tuag taag huv tuabsi.

⁹Tabsis Xa-ules hab nwg cov tubrog tsi tua Ankas, hab tsi tua tej yaaj, tej nyuj hab tej mivnyuas nyuj, hab tej mivnyuas yaaj kws zoo nkauj tshaaj plawg lossis tseg txhua yaam kws zoo ca; puab tsuas tua hab rhuav tej kws tsi zoo siv lossis tsi muaj nqes xwb.

¹⁰Tug TSWV has rua Xamuyees has tas,

¹¹“Kuv tu sab kws kuv tsaa Xa-ules ua vaajntxwv, rua qhov nwg tso kuv tseg hab tsi noog kuv lug.” Xamuyees npautawg heev, nwg txhaj thov tug TSWV ib mos kaaj ntug.

¹²Thaus kaaj ntug txoog, nwg txawm moog cuag Xa-ules, tabsis nwg nov has tas, Xa-ules tub moog rua peg lub nroog Kalemees lawm. Xa-ules moog puab ib tug pemthuam ua chaw ncu txug nwg, hab tom qaab ntawd, nwg moog rua huv lub nroog Nkilenkas lawm.

¹³Xamuyees moog cuag Xa-ules, Xa-ules has rua Xamuyees has tas, “Thov tug TSWV foom koob moov rua koj! Kuv tub moog ua lawv le tug TSWV has taag lawm.”

¹⁴Xamuyees nug Xa-ules has tas, “Ua caag kuv tseem nov suab nyuj nqov hab suab yaaj quaj?”

¹⁵Xa-ules teb has tas, “Kuv cov tubrog caab cov Amalej tej yaaj tej nyuj lug. Puab tseg tej yaaj tej nyuj kws zoo nkauj lug tua fij rua tug TSWV kws yog koj tug Vaajtswv, dlua le cov kws tsi zoo, peb tub muab tua povtseg taag lawm.”

¹⁶Xamuyees has tas, “Tog mivntsiv tsaiv, kuv yuav qha rua koj paub tej kws naag mo tug TSWV lug has rua kuv lawm.” Xa-ules teb has tas, “Qha rua kuv.”

¹⁷Xamuyees teb has tas, “Txawm yog koj xaav has tas koj tsi tseemceeb dlaabtsi los koj yog cov Yixalayees tug thawjcoj. Tug TSWV tub muab roj laub rua koj taubhau hab tsaa koj ua vaajntxwv kaav cov Yixalayees,

¹⁸hab nwg kuas koj moog tua cov Amalej kws ua phem ua qas povtseg. Nwg kuas koj tua puab moog txug thaus puab tuag tu noob taag.

¹⁹Vim le caag koj tsi noog tug TSWV lug? Vim le caag koj tseem moog fuab tej nuav, hab ua tej kws tsi hum tug TSWV sab le?”

²⁰Xa-ules teb has tas, “Kuv yeej noog tug TSWV lug, kuv tub ua lawv le nwg has lawm. Kuv nteg Vaajntxwv Ankas lug, hab muab cov Amalej tua tuag taag huv tuabsi lawm,

²¹tabsis kuv cov tubrog tsi tau tua tej yaaj hab tej nyuj zoo nkauj kws puab nteg tau; puab txhaj caab tej tsaj ntawd lug rua huv lub nroog Nkilenkas hab muab tua fij rua tug TSWV kws yog koj tug Vaajtswv.”

²²Xamuyees has tas, “Koj ua tuab zoo xaav saib, tug TSWV txaus sab rua yaam twg: Tug TSWV xaav kuas tuabneeg noog nwg lug lossis muab tsaj tua fij rua nwg? Noog tug TSWV lug zoo dlua qhov kws muab tej yaaj zoo nkauj tua fij rua nwg.

²³Tug tuabneeg kws ntxeev sab rua tug TSWV, ua txhum luj ib yaam le tug txawj tso dlaab, hab tug tuabneeg kws tawv ncauj, ua txhum luj ib yaam le tug kws pe mlom. Vim koj tsi noog tug TSWV lug, nwg txhaj tsi pub koj ua vaajntxwv lawm.”

²⁴Xa-ules teb has tas, “Kuv tau ua txhum lawm tag, kuv tsi ua lawv le tug TSWV tej lug saamfwm hab koj tej lug ntuag. Kuv ntshai kuv cov tubrog, kuv txhaj ua lawv le puab xaav yuav xaav tau.

²⁵Nwgnuav thov koj zaam txim rua kuv hab nrug kuv rov moog rua huv lub nroog Nkilenkas, kuv txhaj yuav tau pehawm tug TSWV.”

²⁶Xamuyees teb has tas, “Kuv tsi nrug koj moog, koj tsi noog tug TSWV tej lug saamfwm, tug TSWV txhaj tsi pub koj ua cov Yixalayees tug vaajntxwv lawm.”

²⁷Xamuyees tig hlo yuav moog, Xa-ules txawm ntsab nkaus Xamuyees lub tw tsho nqug ndluag rhe.

²⁸Xamuyees has rua Xa-ules has tas, “Nub nua tug TSWV tub muab cov Yixalayees lub tebchaws tshem tawm ntawm koj moog rua tug kws ua zoo dlua koj kaav lawm.

²⁹Cov Yixalayees tug Vaajtswv kws muaj tshwjchim ci ntsaa ab yeej tsi dlaag lossis tsi hloov sab le. Nwg tsi yog noobneej, nwg tsi hloov sab le.”

³⁰Xa-ules has tas, “Kuv yeej ua txhum lawm tag, tabsis thov koj ca kuv tau ntsejmuag taabmeeg kuv cov thawjcoj hab cov pejxeem Yixalayees. Thov koj nrug kuv rov moog, kuv txhaj tau pehawm tug TSWV kws yog koj tug Vaajtswv.”

³¹Yog le ntawd, Xamuyees txhaj nrug Xa-ules rov moog rua huv lub nroog Nkilenkas hab Xa-ules moog pehawm tug TSWV.

³²Xamuyees has tas, “Mej ca le moog coj Vaajntxwv Ankas lug rua kuv ntawm nuav.” Ankas lug cuag Xamuyees, Ankas ntshai ua ib ce tshee nyo hab xaav has tas, “Zag nuav kuv yuav raug txujkev tuag kws ab sab kawg nkaus!”

³³Xamuyees has tas, “Koj raab ntaaj ua rua ntau leej nam tej mivnyuas tuag taag, yog le ntawd, nwgnuav koj nam yuav tsi muaj tub ib yaam le luas hab!” Xamuyees txawm rhu hlo ntaaj lug txav Ankas ua tej thooj rua ntawm hauv ntej lub thaaj fij huv lub nroog Nkilenkas.

³⁴Ces Xamuyees txawm moog rua huv lub nroog Lamas, hab Vaajntxwv Xa-ules rov moog rua huv lub nroog Nkinpe-as lawm.

³⁵Xamuyees tsi pum Xa-ules moog txug nub kws Xamuyees tuag le; tabsis nwg tu sab rua Xa-ules kawg nkaus. Tug TSWV tu sab kws nwg tsaa Xa-ules ua vaajntxwv kaav cov Yixalayees.