Read Hmong Njua 1 Xamuyees 16 Bible Online

1 Xamuyees 16 - Hmong Njua bible

1 Xamuyees 16

¹Tug TSWV has rua Xamuyees has tas, “Koj tseem yuav nyuaj sab rua Xa-ules moog txug thaus twg hab? Kuv tub tsi pub nwg ua vaajntxwv kaav cov Yixalayees lawm. Koj ca le nqaa ib fwj roj moog rua nraag lub nroog Npelehees, hab moog cuag ib tug txivneej kws hu ua Yexais, rua qhov kuv tub xaiv nwg cov tub ib tug ua vaajntxwv kaav cov Yixalayees lawm.”

²Xamuyees nug has tas, “Kuv yuav ua le caag moog ua tau le ntawd? Yog Xa-ules paub, ces nwg yeej yuav muab kuv tua xwb.” Tug TSWV has tas, “Koj ca le caab ib tug mivnyuas nyuj moog, hab has tas koj yuav coj moog tua hlawv fij rua tug TSWV.

³Koj caw Yexais nrug koj moog tua tsaj hlawv fij, kuv maam le qha rua koj has tas, koj yuav ua le caag. Koj muab roj laub rua tug kws kuv qha rua koj ntawd taubhau hab tsaa nwg ua vaajntxwv.”

⁴Xamuyees ua lawv le tug TSWV has, nwg moog rua nraag lub nroog Npelehees, cov thawjcoj huv lub nroog ntshai ua ib ce tshee nyo tuaj nug Xamuyees has tas, “Tug kws pum yaav tom ntej, koj tuaj ntawm nuav yog tuaj zoo lossis tuaj phem?”

⁵Xamuyees teb has tas, “Yog kuv coj tsaj tuaj tua hlawv fij rua tug TSWV xwb, mej ca le ua kevcai ntxuav hab tuaj cuag kuv.” Xamuyees has kuas Yexais hab nwg cov tub ua kevcai ntxuav ib yaam nkaus, hab kuas puab nrug nwg moog tua tsaj hlawv fij rua tug TSWV.

⁶Thaus puab tuaj txug, Xamuyees pum Yexais tug tub Eli-as, nwg txawm xaav has tas, “Tug kws tuaj sawv taabmeeg tug TSWV nuav yog tug kws nwg xaiv ntaag.”

⁷Tabsis tug TSWV has rua Xamuyees has tas, “Koj tsi xob saib qhov kws nwg sab hab zoo nraug xwb. Kuv tsi yuav tug ko, rua qhov kuv tsi saib tuabneeg le noobneej. Tuabneeg saib lub cev ntaaj ntsug, tabsis kuv saib tuabneeg lub sab.”

⁸Yexais txawm hu nwg tug tub Anpinadas lug cuag Xamuyees. Tabsis Xamuyees has tas, “Tsi yog, tug TSWV tsi xaiv tug nuav hab.”

⁹Yexais coj Samas lug. Xamuyees has tas, “Tsi yog, tug TSWV tsi xaiv tug nuav hab.”

¹⁰Yexais coj nwg xyaa tug tub lug cuag Xamuyees. Xamuyees has rua Yexais has tas, “Tsi yog, tug TSWV tsi xaiv cov nuav ib tug le.”

¹¹Xamuyees nug Yexais has tas, “Koj cov tub muaj npaum le nuav leej xwb los?” Yexais teb has tas, “Tshuav tug tub ntxawg, tabsis nwg tseem moog yug yaaj lawm.” Xamuyees has tas, “Mej ca le moog hu nwg lug, peb tog nwg lug txug tsaiv, peb maam le tua tsaj hlawv fij rua tug TSWV.”

¹²Yog le ntawd, Yexais txhaj khaiv tuabneeg moog hu Daviv. Daviv zoo nraug ntxag, cev khov kho hab muaj sais muag zeeg. Tug TSWV has rua Xamuyees has tas, “Yog tug nuav ntaag, koj ca le muab roj laub rua nwg taubhau.”

¹³Xamuyees txawm muab roj laub rua Daviv taubhau taabmeeg nwg cov tijlaug. Taamsim ntawd tug TSWV tug ntsujplig txawm kaav hlo Daviv lub sab hab nrug nwg nyob txij nub ntawd lug. Xamuyees txhaj rov lug rua huv lub nroog Lamas lawm.

¹⁴Tug TSWV tug ntsujplig tsi nrug Xa-ules lawm, tabsis tug TSWV ca ib tug ntsujplig phem lug tsimtxom Xa-ules.

¹⁵Xa-ules cov tubkhai has rua nwg has tas, “Peb paub has tas, Vaajtswv ca ib tug ntsujplig phem lug tsimtxom koj lawm.

¹⁶Thov koj tso ncauj rua peb, peb yuav moog nrhav ib tug txivneej kws txawj ntaus nkauj nogncaas lug nrug koj nyob, thaus twg tug ntsujplig phem ntawd lug tshoov koj sab, nwg yuav ntaus nkauj nogncaas rua koj noog kuas koj lub sab tug.”

¹⁷Xa-ules has rua puab tas, “Mej ca le moog nrhav ib tug txivneej kws txawj ntaus nkauj nogncaas zoo heev coj tuaj cuag kuv.”

¹⁸Xa-ules cov tubkhai ib tug has rua Xa-ules has tas, “Yexais kws nyob huv lub nroog Npelehees muaj ib tug tub txawj ntaus nkauj nogncaas heev, nwg yog ib tug tuabneeg sab tawv hab zoo nraug ntxag. Nwg yog ib tug tubrog zoo, zoo ncauj zoo lug, hab tug TSWV nrug nraim nwg.”

¹⁹Yog le ntawd, Xa-ules txawm tso tuabneeg moog has rua Yexais has tas, “Ca le tso koj tug tub Daviv kws yog ib tug tub yug yaaj tuaj nrug kuv nyob.”

²⁰Yexais coj Daviv moog cuag Xa-ules, caab ib tug neeg luav thauj ib nraas ncuav, ib naab tawv cawv txiv maab hab caab ib tug thaav tshis moog rua Xa-ules.

²¹Daviv nrug Xa-ules nyob hab ua num rua nwg. Xa-ules nyam Daviv heev, hab tsaa Daviv ua tug nqaa nwg raab ntaaj hab raab muv.

²²Xa-ules has moog rua Yexais has tas, “Kuv nyam Daviv heev. Thov ca nwg nrug kuv nyob hab ua num rua kuv.”

²³Txij nub ntawd lug, thaus twg Vaajtswv ca tug ntsujplig phem ntawd lug tshoov Xa-ules sab, Daviv txawm muab nwg lub nkauj nogncaas lug ntaus. Ces tug ntsujplig phem ntawd txawm tawm ntawm Xa-ules moog, hab Xa-ules lub sab rov tug hab nyob le qub.