Read Hmong Njua 1 Xamuyees 17 Bible Online

1 Xamuyees 17 - Hmong Njua bible

1 Xamuyees 17

¹Cov Filitees txhij tubrog tuaj tua lub nroog Xukaus huv tebchaws Yudas; puab tuaj tsuam yeej rua ntawm qhov chaw kws hu ua Efes Damees, ntu nruab nraab ntawm lub nroog Xukaus hab Axekas.

²Xa-ules hab cov tubrog Yixalayees moog tsuam yeej rua ntawm lub Haav Elas, puab npaaj tog yuav nrug cov Filitees sis tua.

³Cov Filitees tuaj sawv sau ib lub laaj roob, cov Yixalayees los moog sawv sau ib lub laaj roob hab muaj ib lub haav quas.

⁴Muaj ib tug txivneej hu ua Nkauli-am, nwg nyob huv lub nroog Nkas tuaj. Nwg tawm huv cov Filitees lub yeej tuaj twv cov Yixalayees. Nwg sab rau tshim,

⁵nwg ntoo ib lub mom tooj hab naav ib lub tsho tooj nyaav ib puas neeg nkaum tsib choj,

⁶hab muab tooj looj nwg ob txhais ceg huv tuabsi, nwg kwv rawv ib raab muv tooj sau xubpwg.

⁷Nwg raab muv tuab ib yaam le lub nqog ntus ntaub, hab lub vug hlau nyaav kwvlaam le kaum tsib choj. Muaj ib tug tubrog nqaa Nkauli-am dlaim thaiv nav ntaaj moog ua Nkauli-am ntej.

⁸Nkauli-am sawv nreg nroog hu nrov nrov rua cov Yixalayees has tas, “Mej tuaj ua dlaabtsi ntawm ko? Tuaj tua rog los? Xa-ules cov nyuas qhev, kuv yog tuabneeg Filitees, ca le xaiv mej cov tuabneeg ib tug tuaj tua kuv.

⁹Yog nwg tua yeej kuv, peb yuav ua mej qhev; tabsis yog kuv tua yeej nwg, mej yuavtsum ua peb qhev.

¹⁰Kuv sawv ntawm nuav twv ntxhas cov tubrog Yixalayees ntaag. Ca le xaiv mej cov ib tug tuaj tua kuv.”

¹¹Thaus Xa-ules hab nwg cov tubrog nov le ntawd, puab ntshai kawg le.

¹²Daviv yog Yexais tug tub. Yexais yog xeem Efathas kws nyob huv lub nroog Npelehees, huv tebchaws Yudas, Yexais muaj yim leej tub, lub sijhawm kws Xa-ules ua vaajntxwv, Yexais laug heev lawm.

¹³Nwg peb tug tub hlub nrug Xa-ules moog ua tubrog. Tug hlub hu ua Eli-as, tug ob hu ua Anpinadas hab tug peb hu ua Samas.

¹⁴Daviv yog tug tub ntxawg, thaus Daviv peb tug tijlaug nrug Xa-ules moog ua rog ntawd,

¹⁵Daviv pheej ib sij rov qaab moog paab nwg txiv yug tsaj huv lub nroog Npelehees.

¹⁶Nkauli-am naj taagkig hab naj mo tuaj twv cov Yixalayees tau plaub caug nub.

¹⁷Muaj ib nub Yexais has rua Daviv has tas, “Koj ca le xaa ib ntaa tawb mov kib hab kaum lub ncuav moog rua koj cov tijlaug kws nyob tom tshaav rog.

¹⁸Koj coj kaum thooj mig nyuj qhuav nuav moog rua tug thawj tubrog. Moog nug saib koj peb tug tijlaug nyob le caag lawm. Koj kuas puab muab ib yaam dlaabtsi rua koj nqaa lug rua kuv saib, kuv txhaj paub has tas, koj moog pum puab tag, hab puab puavleej noj qaab nyob zoo.

¹⁹Vaajntxwv Xa-ules, koj cov tijlaug hab cov tubrog Yixalayees puavleej nyob nraag lub Haav Elas tawmtsaam cov Filitees.”

²⁰Thaus kaaj ntug txoog Daviv txawm muab nwg paab yaaj tso rua lwm tug saib, ces nwg xaa mov moog rua nwg cov tijlaug lawv le nwg txiv has rua nwg. Daviv moog txug huv lub yeej tubrog, thaus cov Yixalayees taabtom tawm moog rua tom tshaav rog hab qw ntshu nrooj.

²¹Cov Filitees hab cov Yixalayees nyag txhij nyag cov tubrog tuaj sawv ua phaj yav, hab saib ntsoov tog yuav sis tua.

²²Daviv muab tej zaub mov tso plhuav rua tug kws saib kev noj haus, Daviv dlha ceev nrooj moog cuag nwg cov tijlaug kws nyob tom tshaav rog, hab nug saib nwg cov tijlaug noj nyob le caag.

²³Thaus Daviv taabtom nrug nwg cov tijlaug thaam, Nkauli-am txawm tawm tuaj twv cov Yixalayees lawv le nwg naj nub ua. Hab Daviv kuj nov tej lug kws Nkauli-am khaav.

²⁴Thaus cov Yixalayees pum dlheev Nkauli-am, puab ntshai heev, puab nyag txawm tsiv nyag zum zawg moog lawm.

²⁵Puab sis thaam has tas, “Mej sim saib saib! Mej ca le noog tej lug kws nwg khaav! Vaajntxwv Xa-ules has tas, yog leejtwg moog tua tau nwg, vaajntxwv yuav muab nqe zug ntau hab muab nwg tug ntxhais rua tug ntawd yuav, hab nwg txiv tsev tuabneeg yuav tsi tau them se.”

²⁶Daviv nug cov tuabneeg kws nyob ze ntawd has tas, “Tug kws tua tau tug tuabneeg Filitees ntawd hab paab tau cov Yixalayees tsi poob ntsejmuag yuav tau dlaabtsi nua? Tug tuabneeg Filitees kws tsi ua kevcai txav ntawd yog leejtwg, ua caag nwg yuav muaj cuabkaav khaav hab has lug saib tsi taug Vaajtswv tug kws muaj sa nyob cov tubrog?”

²⁷Puab qha rua Daviv has tas, tug kws tua tau Nkauli-am tuag yuav tau nqe zug dlaabtsi.

²⁸Eli-as kws yog Daviv tug tijlaug hlub, nov Daviv nrug cov tuabneeg sis thaam. Nwg npautawg rua Daviv hab tshev has tas, “Koj tuaj ua dlaabtsi ntawm nuav? Leejtwg zuv koj paab yaaj tom taj mojsaab qhua? Ua caag koj yuav tawv ua luaj? Kuv paub koj lub nyuas sab ko, koj xaav tuaj xauj luas sis tua xwb los mas!”

²⁹Daviv teb has tas, “Kuv ua txhum dlaabtsi? Kuv txawm nug tsi tau ib lus le los?”

³⁰Daviv txawm tig hlo moog nug dlua lwm tug tuab lu lug qub, hab txhua zag kws nwg nug, luas teb nwg tuab yaam nkaus.

³¹Cov tuabneeg kws nov Daviv has, puab txawm moog pav qha rua Xa-ules. Xa-ules txhaj hu Daviv lug cuag nwg.

³²Daviv has rua Xa-ules has tas, “Vaajntxwv, tsi tsimnyog leejtwg yuav ntshai tug tuabneeg Filitees ntawd le! Kuv yuav moog nrug nwg sis tua ntaag.”

³³Xa-ules teb has tas, “Tsi tau! Koj yuav ua le caag tua tau nwg? Koj tseem yog mivnyuas yau xwb, Nkauli-am yeej ibtxwm ua rog lug laug le ntawd.”

³⁴Daviv teb has tas, “Vaajntxwv, kuv ibtxwm yug kuv txiv paab yaaj, thaus muaj tsuv ntxhuav lossis dlais lug tum ib tug mivnyuas yaaj kwv moog lawm,

³⁵kuv ca le lawv qaab moog ntaus hab cawm tau tug yaaj ntawd rov lug. Yog has tas, tsuv ntxhuav lossis dlais tig lug tum kuv, kuv ca le khawm nkaus cejdlaab qhau hab muab ntaus tuag kag.

³⁶Kuv tub tua tau tsuv ntxhuav hab dlais lawm. Kuv yuav ua ib yaam le ntawd rua tug tuabneeg Filitees kws tsi ua kevcai txav nuav, vim nwg txobthuam Vaajtswv tug kws muaj sa nyob cov tubrog.

³⁷Tug TSWV cawm kuv dlim ntawm tsuv ntxhuav hab dlais le caag, nwg yeej yuav cawm kuv dlim ntawm tug tuabneeg Filitees le ntawd hab.” Xa-ules teb has tas, “Tau lawm, koj ca le moog hab tug TSWV yuav nrug nraim koj.”

³⁸Xa-ules muab nwg cev rig tsho tooj rua Daviv naav hab muab nwg lub mom tooj rua Daviv ntoo,

³⁹Daviv muab Xa-ules raab ntaaj ris rua ntawm dluav hab sim moog kev, tabsis Daviv moog tsi taug kev le, rua qhov nwg naav tsi kaam tej ntawd. Daviv has rua Xa-ules has tas, “Yog kuv naav tej nuav, kuv moog sis tua tsi tau, rua qhov kuv tsi tau naav dlua tej nuav le.” Yog le ntawd, Daviv txawm muab hle tseg.

⁴⁰Daviv nqaa tug paas nreg kws nwg nreg zuv nwg paab yaaj, hab nwg khaws tau tsib lub pobzeb kheej kheej nraag ntug dlej ntim rua huv nwg lub naab. Nwg nqaa ib txuj zeg hlua, ces nwg txawm moog tua Nkauli-am.

⁴¹Tug tuabneeg Filitees ncaaj nraim tuaj rua ntawm Daviv, tug kws nqaa Nkauli-am dlaim thaiv nav ntaaj ua ntej loo tuaj. Nkauli-am tuaj ze quas zug rua ntawm Daviv.

⁴²Thaus nwg pum Daviv tseeb lawm, nwg saib tsi taug Daviv, rua qhov Daviv tseem yog ib tug tub hluas kws zoo nraug ntxag xwb.

⁴³Nkauli-am has rua Daviv has tas, “Koj nqaa tug paas nreg ko tuaj ua dlaabtsi? Koj xaav has tas kuv yog dlev nua los?” Nwg txawm tuav nwg tug vaajtswv lub npe foom phem rua Daviv.

⁴⁴Nwg thuam Daviv has tas, “Tuaj ntawm nuav, kuv yuav muab koj lub cev rua tej noog hab tej tsaj noj.”

⁴⁵Daviv teb has tas, “Koj nqaa ntaaj nqaa muv hab xub vug tuaj tua kuv, tabsis kuv tuav tug TSWV kws muaj fwjchim luj kawg nkaus kws yog cov tubrog Yixalayees tug Vaajtswv kws koj saib tsi taug lub npe tuaj tua koj.

⁴⁶Nub nua tug TSWV yuav muab koj cob rua kuv teg. Kuv yuav tua tau koj hab txav koj lub taubhau povtseg. Kuv yuav muab cov tubrog Filitees lub cev rua tej noog hab tej tsaj noj. Kuas tuabneeg thoob nplajteb txhaj paub has tas, cov Yixalayees muaj Vaajtswv tag,

⁴⁷hab txhua tug kws nyob ntawm nuav yuav pum has tas, tug TSWV tsi siv ntaaj lossis muv cawm nwg tsaav tuabneeg, tug TSWV yuav tua yeej mej hab nwg yuav muab mej txhua tug cob rua peb teg.”

⁴⁸Nkauli-am txawm tuaj ze quas zug rua ntawm Daviv, hab Daviv kuj dlha ceev nrooj moog ti nkaus rua ntawm cov Filitees tug nrim tua Nkauli-am.

⁴⁹Daviv rhu hlo ib lub pobzeb huv naab lug tso rua ntawm txuj zeg hlua hab fav moog ntaub nkaus Nkauli-am hauvplaj tawg rhe, ua rua nwg qaug ntawg khwb nkaus rua huv aav.

⁵⁰Daviv tua Nkauli-am tuag, tsi yog muab ntaaj tua, tabsis yog muab txuj zeg hlua hab ib lub pobzeb xwb.

⁵¹Daviv dlha loo moog sawv sau Nkauli-am, hab rhu hlo Nkauli-am raab ntaaj huv naab lug tua Nkauli-am tuag hab txav kag Nkauli-am cejdlaab tu nrho. Thaus cov Filitees pum has tas, puab tug tubrog kws ua tau heev tuag lawm, ces puab txawm tig loo tsiv.

⁵²Cov tubrog Yixalayees hab cov tubrog Yudas txhaj qw ntshu nrooj caum cov Filitees tua moog ti nkaus lub nroog Nkas hab moog ti nkaus lub nroog Ekiloos tej roojvaag. Cov Filitees raug mob pw pawg lug taug txujkev kws moog rua huv lub nroog Sala-ees moog ti nkaus lub nroog Nkas hab lub nroog Ekiloos.

⁵³Thaus cov Yixalayees kws caum tua cov Filitees rov lug, puab tshawb cov tubrog Filitees tej khoom txhua yaam huv yeej nqaa lug.

⁵⁴Daviv nqaa Nkauli-am lub taubhau lug rua huv lub nroog Yeluxalees, tabsis Daviv nqaa Nkauli-am tej cuabyeej ua rog moog tso rua huv Daviv lub tsevntaub.

⁵⁵Thaus Xa-ules pum Daviv moog tua Nkauli-am lawm, xa-ules nug Aneles kws yog nwg tug thawj tubrog has tas, “Aneles, tug hluas ntawd yog leejtwg tug tub?” Aneles teb has tas, “Vaajntxwv, kuv tsi paub.”

⁵⁶Xa-ules has tas, “Koj ca le moog nug saib.”

⁵⁷Yog le ntawd, thaus Daviv moog tua tau Nkauli-am hab nwg rov lug txug huv lub yeej, Aneles txawm coj Daviv moog cuag Xa-ules. Daviv tseem nqaa rawv Nkauli-am lub taubhau.

⁵⁸Xa-ules nug Daviv has tas, “Tug hluas, koj yog leejtwg tub?” Daviv teb has tas, “Kuv yog koj tug tubkhai Yexais kws nyob huv lub nroog Npelehees tug tub.”