Read Hmong Njua 1 Xamuyees 18 Bible Online

1 Xamuyees 18 - Hmong Njua bible

1 Xamuyees 18

¹Thaus Xa-ules nrug Daviv thaam taag, Xa-ules tug tub Yaunathaas txaus sab rua Daviv hab hlub Daviv ib yaam le nwg hlub nwg lub cev.

²Txij nub ntawd lug Xa-ules txawm kuas Daviv nrug nwg nyob hab tsi pub Daviv rov moog tsev le lawm.

³Yaunathaas coglug rua Daviv ua phoojywg ruaj khov moog taag simneej, rua qhov nwg hlub Daviv ib yaam le nwg hlub nwg lub cev.

⁴Yaunathaas hle nwg lub tsho ntev rua Daviv, muab nwg lub tsho tooj, raab ntaaj, raab neevnti hab txuj hlaab tawv rua Daviv.

⁵Xa-ules khaiv kuas Daviv ua dlaabtsi los Daviv ua tau tav taag huv tuabsi. Xa-ules txhaj tsaa Daviv ua nwg ib tug thawj tubrog. Xa-ules cov thawj tubrog hab cov tubrog puavleej pum zoo.

⁶Tom qaab kws Daviv moog tua tau Nkauli-am hab cov tubrog Yixalayees taabtom rov lug tsev, cov quaspuj huv tej nroog huv tebchaws Yixalayees tuaj tog Vaajntxwv Xa-ules. Puab seev cev hu nkauj zoo sab, npuaj nruag hab ntaus nkauj nogncaas.

⁷Thaus cov quaspuj seev cev, puab hu nkauj has tas, “Xa-ules tua tuag quas txheeb leej, tabsis Daviv tua tuag quas vaam leej.”

⁸Xa-ules nov tej lug ntawd, nwg tsi txaus sab hab chim heev. Nwg txhaj has tas, “Puab hu nkauj qhuas Daviv has tas, ‘Daviv tua tuag quas vaam leej, tabsis kuv tua tuag quas txheeb leej xwb. Nwgnuav tsuas yog tshuav qhov kws puab tsi tau tsaa Daviv ua vaajntxwv xwb!’ ”

⁹Txij nub ntawd lug, Xa-ules txawm khib hab dlub muag rua Daviv le lawm.

¹⁰Nub tom qaab Vaajtswv ca tug ntsujplig phem lug tshoov Xa-ules sab, Xa-ules txawm has lug ua dlog ua dlig huv nwg tsev le tug tuabneeg vwm. Daviv txawm lug ntaus nkauj nogncaas rua Xa-ules noog lawv le nwg naj zag ntaus, Xa-ules tuav rawv ib raab muv ntawm teg.

¹¹Xa-ules xaav has tas, “Kuv yuav muab muv nkaug nwg kuas teem nkaus rua tim phaab ntsaa.” Xa-ules txhaj muab muv nkaug Daviv ob zag; tabsis Daviv mam dlhau huv tuabsi lawm.

¹²Xa-ules ntshai Daviv heev, rua qhov tug TSWV nrug nraim Daviv, tabsis tug TSWV tso Xa-ules tseg lawm.

¹³Yog le ntawd, Xa-ules txhaj tsi pub Daviv nrug nwg nyob, hab tsaa Daviv ua ib tug thawj tubrog saib pawg txheeb, Daviv coj nwg cov tubrog moog tua rog

¹⁴hab Daviv ua txhua yaam tav huv tuabsi, rua qhov tug TSWV nrug nraim nwg.

¹⁵Thaus Xa-ules pum Daviv ua tau txhua yaam tav, Xa-ules yimfuab ntshai Daviv heev.

¹⁶Tabsis cov Yixalayees hab cov Yudas nyam Daviv heev, rua qhov Daviv yog ib tug thawjcoj kws ua tau txhua yaam tav.

¹⁷Tom qaab nuav, Xa-ules has rua Daviv has tas, “Tug nuav yog kuv tug ntxhais hlub Melas. Kuv muab rua koj yuav ua quaspuj, tabsis koj yuavtsum ua kuv ib tug tubrog kws sab tawv hab muab sab npuab kuv, hab ntaus tsuv ntaus rog tawmtsaam tug TSWV cov yeebncuab.” (Xa-ules xaav has tas yog ua le nuav cov Filitees yuav tua tau Daviv, tsi yog nwg tua.)

¹⁸Daviv teb has tas, “Kuv yog leejtwg, kuv txiv tsev tuabneeg yog leejtwg kws txhaj tsimnyog ua vaajntxwv vauv?”

¹⁹Tabsis thaus txug nub kws yuav muab Melas txis rua Daviv, Xa-ules txawm hloov sab hab muab Melas txis rua Aliyees kws nyob huv lub nroog Mehaulas yuav lawm.

²⁰Tabsis Xa-ules tug ntxhais Mikhas nyam Daviv heev, thaus Xa-ules paub le ntawd, Xa-ules zoo sab kawg le.

²¹Xa-ules xaav has tas, “Kuv yuav muab Mikhas rua Daviv yuav; txhaj yuav ntxag tau Daviv moog tuag rua cov Filitees teg.” Yog le ntawd, Xa-ules txhaj rov has rua Daviv has tas, “Koj yuav tau ua kuv tug vauv.”

²²Xa-ules kuas nwg cov numtswv moog has tuabywv rua Daviv has tas, “Vaajntxwv nyam koj, hab nwg cov numtswv los puavleej fwm koj; nwgnuav yog sijhawm zoo kws koj yuav tau ua vaajntxwv tug vauv.”

²³Yog le ntawd, puab txhaj moog has rua Daviv, hab Daviv teb has tas, “Tug kws tau ua vaajntxwv vauv, tug ntawd tau ntsejmuag heev, tug tuabneeg pluag hab tsi tseemceeb le kuv nuav tsi tsimnyog ua vaajntxwv vauv.”

²⁴Cov numtswv pav Daviv tej lug rua Xa-ules,

²⁵Xa-ules txhaj kuas puab rov moog has rua Daviv has tas, “Tug nqe tshoob kws vaajntxwv xaav kuas koj them, tsuas yog cov Filitees ib puas dlaim tawv noov xwb, nwg txhaj pauj tau nwg cov yeebncuab.” (Qhov kws Xa-ules ua le nuav, yog nwg xaav ntxag Daviv moog kuas cov Filitees tua tau Daviv.)

²⁶Xa-ules cov numtswv moog has rua Daviv lawv le Xa-ules has rua puab, hab Daviv zoo sab kws yuav tau ua vaajntxwv vauv. Thaus yuav txug nub ua tshoob,

²⁷Daviv hab nwg cov tubrog moog tua cov Filitees tuag ob puas leej. Daviv txhaj hlais cov Filitees ib puas dlaim tawv noov coj lug suav ib dlaig zuj zug rua vaajntxwv saib, kuas Daviv tau ua Xa-ules vauv. Yog le ntawd, Xa-ules txhaj muab Mikhas rua Daviv yuav.

²⁸Xa-ules paub has tas tug TSWV nrug Daviv, hab nwg tug ntxhais Mikhas los nyam Daviv heev.

²⁹Yog le ntawd, Xa-ules yimfuab ntshai Daviv, hab nwg ua yeebncuab rua Daviv moog taag nwg simneej.

³⁰Txhua zag kws cov Filitees tuaj tua cov Yixalayees, Daviv yog tug tua yeej ntau tshaaj Xa-ules cov thawj tubrog. Ces Daviv lub koob meej txhaj nrov nchaa moo lug.