Read Hmong Njua 1 Xamuyees 19 Bible Online

1 Xamuyees 19 - Hmong Njua bible

1 Xamuyees 19

¹Xa-ules qha qhov kws nwg yuav tua Daviv rua nwg tug tub Yaunathaas hab nwg cov numtswv. Tabsis Yaunathaas hlub Daviv heev,

²Yaunathaas txhaj moog qha rua Daviv has tas, “Kuv txiv nrhav kev yuav muab koj tua povtseg. Pigkig sawv ntxuv koj yuavtsum ceevfaaj; hab koj tsiv moog nkaum tsi xob tawm moog qhov twg le.

³Kuv yuav moog sawv ntawm kuv txiv ib saab ntawm qhov chaw kws koj nkaum nraag laj. Kuv yuav nug kuv txiv txug koj, yog kuv paub le caag, kuv maam le qha rua koj.”

⁴Yaunathaas qhuas Daviv rua Xa-ules noog has tas, “Txiv, koj tsi xob ua phem rua Daviv kws yog koj tug tubkhai, nwg tsi tau ua txhum rua koj dlaabtsi le; tej kws nwg tau ua lawm, puavleej yog tej kws muaj nqes rua koj xwb.

⁵Nwg phaav sav moog tua Nkauli-am, hab tug TSWV pub cov Yixalayees muaj yeej luj kawg le. Thaus koj pum tej nuav, koj tub zoo sab heev. Nwg tsi tau ua txhum dlaabtsi, vim le caag koj pheej xaav muab nwg tua povtseg? Tsi muaj qaabhau kws koj yuav muab nwg tua povtseg.”

⁶Xa-ules noog Yaunathaas has, hab Xa-ules coglug rua tug TSWV has tas, “Kuv yuav tsi tua Daviv povtseg.”

⁷Yog le ntawd, Yaunathaas txhaj hu Daviv tawm lug. Nwg pav txhua yaam rua Daviv noog hab coj Daviv moog cuag Xa-ules. Daviv txhaj rov moog ua num rua vaajntxwv le qub.

⁸Tom qaab nuav, cov Filitees rov tuaj ua rog rua cov Yixalayees dlua, Daviv txhaj coj tubrog moog tua cov Filitees swb hab tsiv rov moog taag lawm.

⁹Muaj ib nub tug TSWV ca tug ntsujplig phem rov lug tshoov Xa-ules sab dlua. Xa-ules nyob huv tsev, nwg tuav rawv nwg raab muv, hab Daviv taabtom ntaus nkauj nogncaas rua Xa-ules noog.

¹⁰Xa-ules txawm muab muv nkaug Daviv kuas teem nkaus rua tim phaab ntsaa, tabsis Daviv mam dlhau, hab raab muv ntsa nkaus rua tim phaab ntsaa. Daviv tawm plawg tsiv lawm,

¹¹Mo ntawd, Xa-ules tso tuabneeg moog soj Daviv huv Daviv tsev, hab taagkig kaaj ntug yuav muab Daviv tua povtseg. Mikhas kws yog Daviv tug quaspuj has rua Daviv has tas, “Yog mo nuav koj tsi tsiv, pigkig kaaj ntug luas yuav muab koj tua povtseg.”

¹²Yog le ntawd, Mikhas muab hlua khi Daviv tso dlauv ntawm qhovrais rua saab nrau hab Daviv tsiv moog lawm.

¹³Mikhas muab tug mlom tso pw sau txaaj, muab lub tog rau ncoo plaub tshis lug rau tug mlom ncoo, hab muab choj lug vuv rua.

¹⁴Thaus Xa-ules cov tubrog tuaj nteg Daviv, Mikhas has rua puab tas, “Daviv mob lawm.”

¹⁵Tabsis Xa-ules kuas puab rov moog saib Daviv. Nwg has rua puab tas, “Mej ca le kwv nwg hab nwg lub txaaj tuaj rua kuv, kuv yuav muab nwg tua povtseg.”

¹⁶Puab txhaj moog huv tsev hab pum tug mlom zuv tsev pw sau txaaj, hab lub tog rau ncoo plaub tshis tag rawv tug mlom taubhau.

¹⁷Xa-ules nug Mikhas has tas, “Ua caag koj txhaj dlaag kuv le nuav hab tso kuv tug yeebncuab dlim lawm?” Mikhas teb has tas, “Nwg has rua kuv tas, yog kuv tsi paab kuas nwg dlim, nwg yuav muab kuv tua povtseg.”

¹⁸Daviv tsiv moog cuag Xamuyees peg lub nroog Lamas hab Daviv pav txhua yaam kws Xa-ules ua phem rua nwg huv tuabsi rua Xamuyees noog. Ces Daviv hab Xamuyees txawm moog nyob rua huv lub zog Nayaus lawm.

¹⁹Muaj tuabneeg moog qha rua Xa-ules has tas, Daviv nyob huv lub zog Nayaus huv lub nroog Lamas,

²⁰Yog le ntawd, Xa-ules txhaj khaiv tuabneeg moog nteg Daviv. Puab tuaj pum Xamuyees coj ib paab cev Vaajtswv lug taabtom seev cev hab cev Vaajtswv lug. Ces Vaajtswv tug ntsujplig txawm lug kaav hlo Xa-ules cov tuabneeg sab, puab txawm ca le nrug cov cevlug ntawd seev cev hab cev Vaajtswv lug.

²¹Thaus Xa-ules nov le ntawd, nwg tso ib paab tuabneeg coob dlua qub moog los puab ca le moog seev cev hab cev Vaajtswv lug ib yaam le paab ntawd lawm. Xa-ules tso dlua paab peb moog los puab ca le moog ua ib yaam nkaus le ntawd hab.

²²Xa-ules txhaj moog rua peg lub nroog Lamas. Thaus nwg moog txug ntawm lub qhov tshij luj huv Xekus, Xa-ules nug has tas, “Xamuyees hab Daviv nyob qhov twg?” Puab qha has tas, “Obtug nyob huv lub zog Nayaus.”

²³Thaus Xa-ules taabtom moog rua huv, Vaajtswv tug ntsujplig txawm lug kaav hlo Xa-ules sab, nwg txhaj seev cev hab cev Vaajtswv lug taug kev moog txug ndlua huv lub zog Nayaus.

²⁴Xa-ules muab nwg cev rig tsho hle, seev cev hab cev Vaajtswv lug taabmeeg Xamuyees, hab pw labqaab ib nub ib mos. (Vim qhov nuav, txhaj muaj lug has tas, “Xa-ules yog ib tug cev Vaajtswv lug lawm hab los?”)