Read Hmong Njua 1 Xamuyees 2 Bible Online

1 Xamuyees 2 - Hmong Njua bible

1 Xamuyees 2

¹Hanas hu nkauj has tas: “Tug TSWV ua rua kuv zoo sab kawg nkaus le; kuv zoo sab kawg kws tug TSWV pub rua kuv tau ntsejmuag! kuv khaav tau rua kuv tej yeebncuab; kuv zoo sab heev, rua qhov Vaajtswv paab kuv.

²“Tsi muaj leejtwg dlawbhuv le tug TSWV; tsi muaj leejtwg sab zoo npaum le nwg, tsi muaj leejtwg tsomkwm peb le peb tug Vaajtswv.

³Ca le tseg mej tej lug khaavtheeb, hab tseg mej tej lug khaav txiv, rua qhov tug TSWV yog tug Vaajtswv kws paub hab tshuaj txhua yaam kws tuabneeg ua.

⁴Cov tubrog kws muaj zug heev tej neevnti tub luv taag lawm. Tabsis cov tuabneeg kws qaug zug rov muaj zug tuaj.

⁵Tug tuabneeg kws txeev muaj noj muaj haus, nwgnuav nwg yuav tau moog ua zug noj, tabsis tug kws ibtxwm tsi muaj noj, muaj noj lawm. Tug quaspuj kws ibtxwm tsi muaj tub, yug tau xyaa leej tub; tabsis tug quaspuj kws muaj mivnyuas coob, tsi tshuav ib tug le lawm.

⁶Tug TSWV ua kuas tuag hab ua kuas rov caj sa; nwg xaa tuabneeg moog rua huv tub tuag teb hab coj puab rov qaab lug.

⁷Nwg ua rua ibtxha pluag hab ua rua ibtxha npluanuj; nwg muab ibtxha txu ua cov yau hab tsaa ibtxha ua cov luj.

⁸Nwg tsaa cov tuabneeg pluag sawv huv tej moov aav lug, hab nwg tsaa cov tuabneeg txomnyem sawv huv qhov tshauv lug; nwg tsaa puab nrug tej numtswv nyob sis txig, hab pub puab tau koob meej. Tej ncej kws txheem lub nplajteb yog nwg le; nwg tsim lub nplajteb rua sau tej hauv ncej.

⁹“Nwg tsomkwm nwg tsaav tuabneeg kws ncaaj nceeg, tabsis cov tuabneeg sab phem yuav pluj moog rua huv qhov tsaus ntuj nti; tuabneeg tug zug yeej paab tsi tau kuas tuabneeg dlim.

¹⁰Tug TSWV cov yeebncuab yuav raug puamtsuaj; nwg ua rua xub nroo nrov nroo ntwg sau ntuj tuaj tawmtsaam puab. Tug TSWV yuav txav txim rua txhua tsaav tuabneeg huv nplajteb nuav. Nwg yuav pub fwjchim rua tug vaajntxwv kws nwg tsaa, nwg yuav pub kuas tug vaajntxwv kws nwg tsaa kovyeej tej yeebncuab.”

¹¹Ces Ekanas txawm rov qaab moog tsev rua nraag lub nroog Lamas lawm, tabsis tseg tug mivtub Xamuyees nrug tug povthawj Elis nyob peg lub nroog Silaus ua tug TSWV teg num.

¹²Elis ob tug tub tsi xyum ua tuabneeg tsimtxaj. Obtug tsi noog tug TSWV tej lug

¹³lossis tsi coj lawv le tej kevcai kws cov povthawj suavdlawg coj. Thaus cov pejxeem ib tug twg coj tsaj tuaj tua fij, tug povthawj ib tug tubkhai nqaa ib raab muv ncau peb ceg tuaj. Thaus tseem hau cov nqaj rua huv yag,

¹⁴nwg txawm muab raab muv no cov nqaj huv yag, yog raab muv chob tau npaum le caag, ces cov nqaj ntawd yog tug povthawj tug. Puab ua le ntawd rua cov Yixalayees txhua tug kws caab tsaj tuaj tua fij rua huv lub nroog Silaus.

¹⁵Tsi taag le ntawd xwb, thaus tseem tsi tau muab tej roj laws coj moog hlawv fij, tug povthawj tug tubkhai tuaj has rua tug kws muab tej tsaj fij has tas, “Kuv tuaj nqaa ib thooj nqaj moog rua tug povthawj ci noj; nwg tsi yuav cov nqaj kws koj tub hau sav lawm, nwg yuav nqaj nyoog xwb.”

¹⁶Yog tug kws muab cov nqaj ntawd moog fij teb has tas, “Ca peb muab tej roj coj moog hlawv fij lawv le kevcai taag tsaiv, koj maam le nqaa tej nqaj kws koj xaav yuav moog.” Ces tug povthawj tug tubkhai teb has tas, “Tsi tau! Koj ca le muab rua kuv taamsim nuav, txawm yog koj tsi kaam los kuv yeej yuav nqaa moog.”

¹⁷Tug TSWV pum has tas, Elis ob tug tub ua txhum luj kawg le, rua qhov obtug ua saib tsi taug tej khoom kws puab coj moog fij rua tug TSWV.

¹⁸Thaus tug mivtub Xamuyees ua tug TSWV teg num, nwg naav lub tsho ntaub maag efaus.

¹⁹Txhua xyoo kws nwg nam hab nwg txiv coj tsaj tuaj tua fij rua tug TSWV, nwg nam yeej xaws ib lub tsho ntev nqaa tuaj rua nwg.

²⁰Elis foom koob moov rua Ekanas hab Ekanas tug quaspuj has tas, “Thov tug TSWV pub kuas koj tug quaspuj nuav rov muaj dlua mivnyuas lug hloov tug tub kws koj muab fij rua tug TSWV lawm chaw.” Ces puab txawm rov qaab moog tsev lawm.

²¹Tug TSWV foom koob moov rua Hanas muaj peb tug tub hab ob tug ntxhais ntxiv. Tug mivtub Xamuyees luj hlub quas zug hab ua tug TSWV teg num.

²²Elis laug heev lawm, nwg nov tej kws nwg ob tug tub ua txhum rua cov Yixalayees, hab paub tej kws nwg ob tug tub moog ntxag cov quaspuj kws ua num ntawm tug TSWV lub Tsevntaub sis ntsib tej roojvaag.

²³Yog le ntawd, nwg txhaj has rua obtug tas, “Vim le caag meb ua tej nuav? Txhua tug qha tej kev phem kws meb tau ua rua kuv noog.

²⁴Kuv ob tug tub, meb tseg tsi xob ua tej kev phem nuav lawm. Tej kev phem kws meb ua ntawd, tug TSWV tsaav tuabneeg has ntshu nrooj rua luas nplajtog qaumpeg nov taag le.

²⁵Yog tuabneeg ua txhum rua tuabneeg, ces Vaajtswv phua tau plaub ntug rua obtug, tabsis yog tuabneeg ua txhum rua tug TSWV, leejtwg yuav ua tug phua plaub ntug?” Tabsis obtug tsi noog obtug txiv tej lug le, rua qhov tug TSWV tub npaaj sab lawm has tas yuav muab obtug tua povtseg.

²⁶Tug mivtub Xamuyees luj hlub ua lub neej hum tug TSWV sab hab hum tej tuabneeg suavdlawg sab.

²⁷Muaj ib tug cevlug coj tug TSWV tej lug tuaj has rua Elis has tas, “Thaus koj yawmkoob Aloos hab nwg tsev tuabneeg tseem ua Falaus kws kaav tebchaws Iziv qhev, kuv tau lug tshwm rua Aloos pum.

²⁸Kuv tau xaiv nwg tsev tuabneeg ntawm txhua xeem Yixalayees lug ua kuv cov povthawj ua num ntawm lub thaaj fij, hlawv tej moov tshuaj tsw qaab, hab naav lub tsho efaus tuaj cuag kuv. Kuv pub puab muaj feem yuav tau tej kws luas coj tuaj hlawv fij rua kuv sau lub thaaj ibtxha.

²⁹Yog le caag koj ua tuabneeg sab hlub hab xaav tau tej kws kuv kuas kuv tsaav tuabneeg coj tuaj fij? Elis, vim le caag koj muab koj ob tug tub saib hlub dlua saib kuv? Koj ca obtug muab tej nqaj zoo heev kws kuv tsaav tuabneeg coj tuaj fij rua kuv txaav kuas koj ob tug tub rog?

³⁰Kuv yog tug TSWV kws yog cov Yixalayees tug Vaajtswv. Yaav taag lug kuv coglug has tas, koj tsev tuabneeg hab koj cov xeebntxwv yuav tau ua povthawj ua kuv teg num moog ibtxhis le. Tabsis nwgnuav kuv has rua koj tas, kuv tsi pub mej ua ntxiv lawm! Tug kws fwm kuv, kuv yuav pub rua nwg tau ntsejmuag, tug kws saib tsi taug kuv, kuv yuav ca nwg poob ntsejmuag.

³¹Tub txug lub sijhawm lawm, kuv yuav tua cov tub hluas huv koj tsev tuabneeg hab huv koj cuab kwvtij. Yog le ntawd, koj tsev tuabneeg yuav tsi muaj ib tug txivneej nyob laug quas nkoog le.

³²Koj yuav mob sab hab khib sab rua tej koob moov kws kuv foom rua lwm tug huv tsaav tuabneeg Yixalayees. Tabsis koj tsev tuabneeg yuav tsi muaj ib tug nyob laug le.

³³Kuv yuav ca koj cov xeebntxwv ib tug ua neej nyob, nwg yuav ua ib tug povthawj ua kuv teg num. Tabsis nwg yuav dligmuag hab taag kev ca sab, dlua le koj cov xeebntxwv yuav raug luas tua tuag taag.

³⁴Haufenis hab Finehas kws yog koj ob tug tub los yuav tuag rua tuab nub. Thaus ntawd koj yuav paub has tas tej lug kws kuv has nuav muaj tseeb tag.

³⁵Kuv yuav xaiv ib tug povthawj kws ncaaj nceeg ua kuv teg num hab ua txhua yaam lawv le kuv kuas nwg ua. Kuv yuav pub nwg muaj xeebntxwv lug ua num ntawm tug vaajntxwv kws kuv xaiv lawm lub xubndlag.

³⁶Koj cov xeebntxwv tseem yuav moog thov nyaj hab mov noj ntawm tug povthawj ntawd, hab tsaa ncauj thov kuas nwg pub puab paab cov povthawj ua num, puab txhaj tau noj.”