Read Hmong Njua 1 Xamuyees 22 Bible Online

1 Xamuyees 22 - Hmong Njua bible

1 Xamuyees 22

¹Daviv tsiv huv lub nroog Nkas moog rua huv ib lub qhov tsua kws nyob ze ntawm lub nroog Adulas. Thaus nwg cov tijlaug hab nwg tsev tuabneeg nov has tas nwg nyob qhov ntawd, puab txawm tuaj nrug nwg nyob.

²Cov tuabneeg kws raug luas tsimtxom, cov kws tshuav luas nqe, hab cov kws tsi txaus sab puavleej tuaj cuag nwg, taagnrho cov tuabneeg kws tuaj ntawd muaj plaub puas leej hab Daviv ua puab tug thawj.

³Daviv tawm qhov ntawd moog rua huv lub nroog Mixepas nraag tebchaws Mau-am hab nwg has rua tug vaajntxwv kws kaav tebchaws Mau-am has tas, “Thov ca kuv nam kuv txiv lug nyob huv koj lub tebchaws moog txug nub kws kuv paub has tas Vaajtswv yuav ua dlaabtsi rua kuv tsaiv.”

⁴Yog le ntawd, Daviv txhaj tso nwg nam nwg txiv rua tug vaajntxwv kws kaav tebchaws Mau-am. Hab obtug nrug vaajntxwv nyob moog txug nub kws Daviv tawm huv qhov tsua lug.

⁵Nkas kws yog tug cev Vaajtswv lug, tuaj cuag Daviv hab has tas, “Koj tsi xob nyob ntawm nuav lawm; taamsim nuav koj ca le tawm rov moog rua peg tebchaws Yudas.” Yog le ntawd, Daviv txhaj tawm hab moog rua huv thaaj Haav Zoov Heles lawm.

⁶Thaus Xa-ules nyob huv lub nroog Nkinpe-as, muaj ib nub nwg moog nyob huv qaab tsob ntoo tamalis sau ib lub ncov roob, nwg tuav rawv nwg raab muv ntawm teg hab taagnrho nwg cov numtswv sawv puagncig nwg. Txawm muaj tuabneeg lug qha rua Xa-ules has tas, puab pum Daviv hab Daviv cov tuabneeg.

⁷Xa-ules txawm has rua nwg cov numtswv has tas, “Cov tuabneeg Npeenyamees, mej ca le noog kuv has! Mej xaav has tas Daviv yuav faib tej laj teb hab tej vaaj txiv maab rua mej hab tsaa mej ua nwg cov thawj tubrog nua los?

⁸Tub yog vim le ntawd, mej txhaj ntxeev sab rua kuv los! Mej cov ko tsi muaj ib tug qha rua kuv paub has tas, kuv tug tub moog koom nrug Daviv lawm. Mej cov ko tsi muaj ib tug txhawj txug kuv lossis qha rua kuv has tas, Daviv kws yog kuv ib tug tubrog, nrhav kev tua kuv, hab kuv tug tub los tseem cuab nwg zug kawg le.”

⁹Dau-es kws yog tug thawj saib Xa-ules cov tubkhai kws yog tuabneeg Edoos teb has tas, “Kuv pum Daviv thaus nwg moog cuag Ahitus tug tub Ahimelej huv lub nroog Naus.

¹⁰Ahimelej nug tug TSWV saib Daviv yuav ua le caag, nwg tseem ntim zaub mov hab muab Nkauli-am kws yog tuabneeg Filitees raab ntaaj rua Daviv lawm.”

¹¹Yog le ntawd, Vaajntxwv Xa-ules txhaj tso tuabneeg moog hu tug povthawj Ahimelej hab nwg cov kwvtij kws ua povthawj huv lub nroog Naus, puab txhaj tuaj cuag Xa-ules.

¹²Xa-ules has rua Ahimelej has tas, “Ahimelej, koj ca le noog kuv has!” Ahimelej teb has tas, “Vaajntxwv, kuv nyob ntawm nuav!”

¹³Xa-ules nug Ahimelej has tas, “Vim le caag koj hab Daviv tuavhuv ntxeev sab rua kuv? Vim le caag koj muab zaub mov, muab ntaaj hab nug Vaajtswv rua nwg? Nwgnuav nwg tig tawmtsaam kuv hab nrhav kev yuav muab kuv tua!”

¹⁴Ahimelej teb has tas, “Daviv yog koj ib tug thawj tubrog kws sab ncaaj tshaaj le! Nwg yog koj tug vauv, hab yog tug thawj tubrog kws nrug nraim koj, hab txhua tug huv koj lub loog fwm nwg heev.

¹⁵Yog tag, kuv yeej tau nug Vaajtswv rua nwg, tabsis zag nuav tsi yog thawj zag. Vaajntxwv, qhov kws koj has tas, kuv tuavhuv nrug Daviv ntxeev sab rua koj ntawd, koj tsi xob lam rua kuv lossis kuv tsev tuabneeg ib tug twg. Kuv yeej tsi paub txug tej xwm nuav le!”

¹⁶Vaajntxwv has tas, “Ahimelej, koj hab koj cov kwvtij yeej yuav raug tua tuag taag le!”

¹⁷Ces Xa-ules has rua cov tubrog kws sawv ze ntawd nwg has tas, “Ca le tua tug TSWV cov povthawj nuav! Puab tau koom sab nrug Daviv, hab tsi qha rua kuv paub has tas, Daviv tsiv lawm, txawm yog puab tub paub los puab tseem tsi qha.” Tabsis cov tubrog tsi kaam tua tug TSWV cov povthawj le.

¹⁸Yog le ntawd, Xa-ules txhaj has rua Dau-es has tas, “Koj ca le muab cov povthawj ntawd tua!” Dau-es txhaj muab cov povthawj tua tuag taag. Nub ntawd, nwg tua cov povthawj kws naav lub efaus tuag yim caum tsib leeg.

¹⁹Xa-ules tseem muab cov tuabneeg huv lub nroog Naus kws yog cov povthawj lub nroog tua tuag taag, tsi has quaspuj txivneej, tej mivyuas tug hlub tug yau, tej nyuj, tej neeg luav hab tej yaaj huv tuabsi.

²⁰Tabsis Ahimelej cov tub ib tug kws hu ua Anpiyathas tsiv dlim hab moog koom nrug Daviv lawm.

²¹Anpiyathas moog qha txhua yaam kws Xa-ules tua tug TSWV cov povthawj rua Daviv paub.

²²Daviv has rua Anpiyathas has tas, “Nub kws kuv pum Dau-es, kuv yeej paub lawm has tas, nwg yuav moog qha rua Xa-ules. Yog vim kuv koj txiv tsev tuabneeg txhaj raug tua tuag taag.

²³Koj nrug kuv nyob hab tsi xob ntshai. Xa-ules yeej xaav muab koj hab kuv tua povtseg, tabsis koj ca le tso sab hab nrug kuv nyob ntawm nuav.”