Read Hmong Njua 1 Xamuyees 23 Bible Online

1 Xamuyees 23 - Hmong Njua bible

1 Xamuyees 23

¹Daviv nov has tas, cov Filitees tuaj tua lub nroog Kelas hab fuab cov pejxeem tej nplej tshab coj moog taag.

²Yog le ntawd, Daviv txhaj nug tug TSWV has tas, “Puas tsimnyog kuv moog tua cov Filitees?” Tug TSWV teb has tas, “Koj ca le moog tua cov Filitees hab cawm lub nroog Kelas.”

³Tabsis Daviv cov tuabneeg has rua Daviv has tas, “Peb nyob huv tebchaws Yudas nuav, peb tub ntshai txaus lawm, yog peb moog tua cov Filitees huv lub nroog Kelas, peb hajyam yuav ntshai heev.”

⁴Daviv txhaj rov nug tug TSWV dlua, hab tug TSWV has rua Daviv has tas, “Koj ca le moog tua lub nroog Kelas, kuv yuav pub kuas koj tua yeej cov Filitees.”

⁵Yog le ntawd, Daviv hab nwg cov tuabneeg txhaj moog rua huv lub nroog Kelas hab tua cov Filitees tuag coob heev, hab txeeb tau puab tej tsaj txhu huv tuabsi. Yog le ntawd, Daviv txhaj cawm tau lub nroog Kelas.

⁶Thaus Ahimelej tug tub Anpiyathas tsiv moog cuag Daviv huv lub nroog Kelas ntawd, nwg coj tau ib lub efaus moog hab.

⁷Muaj tuabneeg qha rua Xa-ules has tas, Daviv moog rua huv lub nroog Kelas lawm, Xa-ules txawm has tas, “Vaajtswv tub muab Daviv cob rua kuv teg lawm. Daviv tau kev twg, rua qhov nwg moog rua huv lub nroog kws muaj ntsaa yeej hab muaj cov roojvaag thaiv lawm.”

⁸Yog le ntawd, Xa-ules txawm txhij nwg cov tubrog moog tua lub nroog Kelas, puav Daviv hab nteg nwg cov tuabneeg.

⁹Thaus Daviv nov has tas, Xa-ules npaaj yuav tuaj tua nwg, nwg has rua tug povthawj Anpiyathas has tas, “Coj lub efaus lug ntawm nuav!”

¹⁰Daviv has tas, “Tug TSWV kws yog cov Yixalayees tug Vaajtswv, kuv nov has tas, Xa-ules npaaj yuav tuaj rua huv lub nroog Kelas nuav, hab rhuav kuas lub nroog puamtsuaj taag vim kuv kws yog koj tug tubkhai.

¹¹“Cov pejxeem huv lub nroog Kelas nuav puas yuav muab kuv cob rua Xa-ules teg? Xa-ules puas yuav tuaj lawv le kuv nov ntawd tag? Tug TSWV kws yog cov Yixalayees tug Vaajtswv, thov koj teb kuv.” Tug TSWV teb has tas, “Xa-ules yeej yuav tuaj xwb!”

¹²Daviv rov nug dlua has tas, “Cov pejxeem huv lub nroog Kelas nuav puas yuav muab kuv hab kuv cov tuabneeg cob rua Xa-ules teg?” Tug TSWV teb has tas, “Puab yuav ua le ntawd ntaag.”

¹³Yog le ntawd, Daviv hab nwg cov tuabneeg rau pua leej txhaj tsiv tawm huv lub nroog Kelas taamsim ntawd lawm. Thaus Xa-ules nov has tas, Daviv tsiv tawm huv lub nroog Kelas moog lawm, Xa-ules txawm tsi ua lawv le nwg tau npaaj sab tseg.

¹⁴Daviv tsiv moog nkaum sau lub laaj roob mojsaab qhua kws ze lub taj mojsaab qhua Xifes. Xa-ules naj nub nrhav Daviv, tabsis Vaajtswv tsi muab Daviv cob rua Xa-ules teg.

¹⁵Daviv pum Xa-ules tuaj nrhav Daviv Tua. Thaus Daviv tseem nyob ntawm Haules kws ze lub taj mojsaab qhua Xifes.

¹⁶Yaunathaas tuaj cuag Daviv qhov ntawd hab txhawb Daviv zug has tas Vaajtswv yuav tsomkwm Daviv,

¹⁷hab has rua Daviv has tas, “Koj tsi xob ntshai. Kuv txiv Xa-ules yeej tsi muaj cuabkaav ua tau le caag rua koj. Nwg paub has tas, koj yuav tau ua vaajntxwv kaav tebchaws Yixalayees hab kuv yuav tau ua tug yau ntawm koj.”

¹⁸Obtug coglug ua phoojywg taabmeeg tug TSWV; Daviv tseem nyob huv Haules, tabsis Yaunathaas rov qaab moog tsev lawm.

¹⁹Cov tuabneeg huv Xifes qee leej moog qha rua Xa-ules huv lub nroog Nkinpe-as has tas, “Daviv tsiv moog nkaum huv Haules kws nyob sau lub roob Hakhilas, huv tebchaws Yudas saab qaabteb kws ua suabpuam lawm.

²⁰Vaajntxwv, yog koj xaav nteg nwg, koj ca le tuaj rua huv peb lub tebchaws hab peb yuav muab nwg cob rua koj teg.”

²¹Xa-ules teb has tas, “Thov tug TSWV foom koob moov rua mej qhov kws mej ua zoo rua kuv.

²²Mej rov qaab moog saib ib zag ntxiv kuas paub tseeb has tas, nwg nyob qhov twg tag, hab leejtwg yog tug pum nwg. Kuv nov has tas nwg ntse heev.

²³Mej moog nrhav saib nwg nkaum qhov twg tag, hab maaj ceev nrooj rov tuaj qha rua kuv paub. Yog nwg tseem nyob qhov ntawd, kuv yuav nrug mej moog nrhav kuas tau nwg tua, txawm yog nrhav thoob tebchaws Yudas los kuv yuav moog.”

²⁴Yog le ntawd, puab txhaj ua Xa-ules ntej moog rua huv Xifes lawm. Daviv hab nwg cov tuabneeg nyob sau lub laaj roob mojsaab qhua Ma-oos ntawm lub haav qhuav huv tebchaws Yudas saab qaabteb kws ua suabpuam.

²⁵Xa-ules hab nwg cov tuabneeg txawm moog nrhav Daviv, tabsis Daviv nov le ntawd, nwg txhaj moog rua sau lub roob zeb kws nyob ntawm roob mojsaab qhua Ma-oos hab nyob sau. Thaus Xa-ules nov le ntawd, nwg txawm caum Daviv qaab moog.

²⁶Xa-ules hab nwg cov tuabneeg nyob ib saab roob, Daviv hab nwg cov tuabneeg nyob ib saab roob. Daviv hab nwg cov tuabneeg npaaj tsiv kuas dlim Xa-ules hab nwg cov tuabneeg kws tuaj ze yuav nteg puab.

²⁷Lub sijhawm ntawd, txawm muaj ib tug txivneej tuaj has rua Xa-ules has tas, “Koj ca le rov qaab taamsim nuav, cov Filitees tub tuaj vij peb lub tebchaws taag lawm.”

²⁸Yog le ntawd, Xa-ules txhaj tseg tsi caum Daviv hab tig rov moog tua cov Filitees lawm. Vim le ntawd, txhaj muab qhov chaw ntawd hu ua lub Laaj Roob Sis Quas.

²⁹Daviv txawm tawm qhov ntawd hab moog nkaum rua huv cheebtsaam Enkedis lawm.