Read Hmong Njua 1 Xamuyees 24 Bible Online

1 Xamuyees 24 - Hmong Njua bible

1 Xamuyees 24

¹Thaus Xa-ules moog tua cov Filitees rov qaab lug, muaj tuabneeg qha rua nwg has tas, Daviv nyob tom roob mojsaab qhua kws ze ntawm Enkedis.

²Xa-ules txawm xaiv cov tubrog Yixalayees kws txawj tua rog peb txheeb leej moog nrhav Daviv hab Daviv cov tuabneeg ntawm lub roob tsuas sai saab nubtuaj.

³Xa-ules tuaj txug ntawm lub qhov tsua kws nyob ze cov nkuaj yaaj ntawm ntug kev, nwg txawm moog tawm rooj huv lub qhov tsua ntawd. Lub qhov tsua ntawd tub yog lub kws Daviv hab nwg cov tuabneeg nkaum huv ntaag.

⁴Daviv cov tuabneeg has rua Daviv has tas, “Zag nuav yog sijhawm zoo rua koj lawm, lawv le tug TSWV has rua koj tas, nwg yuav muab koj tug yeebncuab cob rua koj teg, koj xaav ua le caag rua nwg los tau!” Daviv txawm nyaag moog txav Xa-ules lub tw tsho ntev ib qho nqaa moog lawm los Xa-ules tub tsi nov le.

⁵Tom qaab ntawd, Daviv nyuaj sab heev, rua qhov kws nwg txav Xa-ules lub tw tsho,

⁶Daviv has rua nwg cov tuabneeg has tas, “Thov tug TSWV tsi xob pub kuv ua tej yaam tsi zoo rua kuv tug vaajntxwv kws tug TSWV xaiv. Tsi tsimnyog kuv ua ib qho phem rua nwg le, rua qhov yog tug TSWV tsaa nwg ua vaajntxwv.”

⁷Yog le ntawd, Daviv txhaj tsi pub nwg cov tuabneeg muab Xa-ules tua povtseg. Xa-ules txawm sawv tseeg tawm huv qhov tsua moog lawm.

⁸Daviv lawv lag qaab moog hu Xa-ules has tas, “Vaajntxwv!” Xa-ules tig hlo saib tuaj, Daviv txhus caug ndlua nyo ntshis ua ntsejmuag ti nkaus huv aav hawm

⁹hab has tas, “Ua caag koj noog luas tej lug kws has tas, kuv soj nraim yuav tua koj?

¹⁰Kuv qha rua koj paub has tas, nub nua tug TSWV tub muab koj cob rua kuv huv lub qhov tsua nuav lawm. Kuv cov tuabneeg kuas kuv muab koj tua povtseg, tabsis vim kuv fwm koj, kuv txhaj tsi ua phem rua koj, rua qhov koj yog tug kws tug TSWV tsaa ua vaajntxwv.

¹¹Txiv, koj saib, kuv tub txav tau koj lub tw tsho nyob ntawm kuv teg nuav! Yog kuv xaav tua koj, ces kuv tub tua tau koj lawm, tabsis kuv tsuas txav koj lub tw tsho xwb. Qhov nuav qha rua koj paub has tas, kuv tsi tau ntxeev sab lossis ua phem rua koj le. Txawm yog kuv tsi tau ua txhum rua koj los koj pheej caum kuv tua.

¹²Thov tug TSWV txav txim rua wb saib leejtwg yog tug ua txhum! Thov tug TSWV rau txim rua koj, vim koj ua phem rua kuv, rua qhov kuv tsi tau ua phem rua koj le.

¹³Nyaj koj yeej paub tej lug kws cov laug ibtxwm has tas, ‘Tsuas yog tug tuabneeg sab phem txhaj ua phem xwb.’ Yog le ntawd, kuv yuav tsi ua phem rua koj.

¹⁴Cov Yixalayees tug vaajntxwv, koj moog tawmtsaam leejtwg? Koj moog caum leejtwg? Koj caum tug dlev kws tuag lawm los? Koj caum dlev mub los?

¹⁵Thov tug TSWV tshuaj saib yog koj lossis yog kuv ua txhum. Thov tug TSWV tsaa muag saib zaaj nuav, hab tuaj kuv tog paab kuas kuv dlim ntawm koj txhais teg.”

¹⁶Thaus kws Daviv has le ntawd taag, Xa-ules teb has tas, “Kuv tug tub, koj yog Daviv ntaag los?” Ces Xa-ules txawm quaj.

¹⁷Xa-ules has rua Daviv has tas, “Koj has yog lawm! Kuv tau ua txhum tag. Txawm yog kuv tau ua phem rua koj los koj tseem ua zoo rua kuv.

¹⁸Nub nua koj ua rua suavdlawg pum has tas, koj ua zoo kawg nkaus rua kuv. Txawm yog tug TSWV muab kuv cob rua koj teg lawm los koj tseem tsi tua kuv povtseg.

¹⁹Puas muaj leejtwg nteg tau nwg tug yeebncuab, hab ca le muab tso moog tsi muab tua povtseg? Thov tug TSWV foom koob moov rua koj, pauj tej kws koj tau ua zoo rua kuv nub nua.

²⁰Nwgnuav kuv paub has tas, koj yuav tau ua cov Yixalayees tug vaajntxwv hab kaav lub tebchaws kuas vaammeej moog lawm yaav tom ntej.

²¹Thov koj tuav tug TSWV lub npe coglug rua kuv has tas, koj yuav tsi tua kuv cov xeebntxwv povtseg, kuas kuv lub npe hab kuv tsev tuabneeg lub npe txhaj yuav tsi pluj moog.”

²²Daviv coglug has tas, nwg yuav ua le ntawd. Xa-ules txawm rov qaab moog tsev, Daviv hab nwg cov tuabneeg txhaj rov lug rua ntawm qhov chaw kws puab nkaum lawm.