Read Hmong Njua 1 Xamuyees 25 Bible Online

1 Xamuyees 25 - Hmong Njua bible

1 Xamuyees 25

¹Xamuyees tuag, cov Yixalayees tuaj paam nwg hab muab nwg log rua huv nwg lub tsev huv lub nroog Lamas. Tom qaab ntawd, Daviv txawm moog rua nraag taj mojsaab qhua Palaas.

²Muaj ib tug txivneej hu ua Nanpaas, nwg yog Kalej cuab kwvtij kws nyob huv lub nroog Ma-oos, hab nwg muaj ib thaaj teb nyob ze ntawm lub nroog Kalemees. Nwg yog tuabneeg npluanuj, nwg muaj peb txheeb tug yaaj, hab ib txheeb tug tshis. Anpinkayis kws yog Nanpaas tug quaspuj ntse hab zoo nkauj heev, tabsis Nanpaas yog ib tug tuabneeg tsiv ncauj tsiv lug heev. Nanpaas taabtom txav plaub yaaj huv lub nroog Kalemees,

⁴Daviv nyob nraag taj mojsaab qhua, nwg nov has tas Nanpaas taabtom txav plaub yaaj,

⁵Yog le ntawd, Daviv txhaj khaiv kaum leej tub hluas moog rua huv lub nroog Kalemees, kuas moog nrhav Nanpaas hab has lug noj qaab nyob zoo rua nwg.

⁶Daviv kuas puab moog has rua Nanpaas has tas, “Kuv tug phoojywg, thov kuas koj ntsib kev kaaj sab lug! Thov kuas koj hab koj tsev tuabneeg tau txais kev noj qaab nyob zoo, hab txhua yaam kws koj ua kuas vaammeej!

⁷Kuv nov has tas, koj taabtom txav plaub yaaj. Kuv qha rua koj has tas, thaus koj cov tub yug yaaj tuaj nrug peb nyob, peb tsi tau ua phem le caag rua puab. Thaus puab nyob huv lub nroog Kalemees los tsi muaj leejtwg nyag puab ib yaam dlaabtsi le.

⁸Koj ca le nug koj cov tuabneeg, puab yeej yuav qha rua koj paub. Kuv thov koj ua zoo rua kuv cov tuabneeg, rua qhov peb tuaj rua nub kws suavdlawg taabtom ua rooj noj haus. Thov koj muab tej yaam kws koj yuav muab tau rua peb cov kws yog koj tubkhai hab Daviv kws yog koj tug phoojywg zoo.”

⁹Thaus Daviv cov tuabneeg coj Daviv cov lug tuaj has rua Nanpaas taag, puab txawm nyob tog,

¹⁰Nanpaas teb has tas, “Daviv yog leejtwg? Yexais tug tub yog leejtwg? Kuv tsi paub nwg. Ntu nuav cov tubkhai coob leej tau tsiv tawm ntawm puab tug tswv moog lawm.

¹¹Puas tsimnyog kuv muab kuv tej ncuav, tej dlej hab tej nqaj kws kuv npaaj rua kuv cov tuabneeg txav plaub yaaj noj pub rua cov tuabneeg kws kuv tsi paub has tas yog leejtwg hab nyob qhov twg tuaj?”

¹²Daviv cov tuabneeg txawm rov lug hab pav txhua yaam kws Nanpaas has ntawd rua Daviv noog.

¹³Daviv txawm has rua nwg cov tuabneeg has tas, “Mej txhua tug ca le muab ntaaj lug ris ntawm dluav.” Puab txhua tug txawm ua le Daviv has. Daviv los kuj muab ntaaj lug ris rua ntawm dluav hab. Nwg coj kwvlaam le plaub puas leej nrug nwg moog, tseg ob puas leej nyob zuv puab tej khoom xwb.

¹⁴Nanpaas cov tubkhai ib tug moog qha rua Anpinkayis kws yog Nanpaas tug quaspuj has tas, “Daviv tso tuabneeg nraag taj mojsaab qhua tuaj cuag Nanpaas kws yog peb tug tswv, tabsis nwg has lug saib tsi taug puab le.

¹⁵Puab cov ntawd ibtxwm nrug peb sis raug zoo; puab yeej tsi tau ua phem rua peb, hab thaus peb nrug puab nyob tom tshaav yug tsaj los peb tej khoom yeej tsi pluj ib yaam le.

¹⁶Puab tiv thaiv peb taag nub taag mo, lub sijhawm kws peb saib peb tej tsaj ntawd.

¹⁷Koj sim xaav saib yuav ua le caag; rua qhov tej nuav yuav ua kev puamtsuaj rua peb tug tswv hab nwg tsev tuabneeg. Peb tug tswv yog ib tug tuabneeg kws tsi zoo has lug, nwg tsi noog leejtwg has le.”

¹⁸Anpinkayis txawm ua kawgkag tau ob puas lub ncuav, Ntim tau ob naab cawv txiv maab, muab tsib tug yaaj tua ci, muab ob thoob ntsab kib, ib puas pob txiv maab qhuav hab ob puas lub txiv ncuav pas qhuav nog rua neeg luav thauj.

¹⁹Anpinkayis has rua cov tubkhai has tas, “Mej ca le ua ntej moog, kuv yuav lawv mej qaab tuaj.” Tabsis nwg tsi qha rua nwg tug quasyawg le.

²⁰Thaus Anpinkayis taabtom caij neeg luav moog lawv zaaj ntaav zaag kws puag lub laaj roob, nwg txawm ntsib Daviv hab Daviv cov tuabneeg tuaj txug ntawd.

²¹Daviv taabtom xaav has tas, “Kuv tub paab tiv thaiv tej kws yog tug tuabneeg nuav tug tom taj mojsaab qhua, nwg txhaj tsi muaj ib yaam dlaabtsi pluj le, ua caag nwg tseem tsi ncu kuv txaj ntsig le? Nwg txawm muab kev phem pauj kuv txujkev ua zoo xwb!

²²Yog kuv tseem tseg cov tuabneeg ntawd ib tug ca txug pigkig kaaj ntug, thov tug TSWV tua kuv povtseg.”

²³Thaus Anpinkayis pum dlheev Daviv, nwg txawm nqeg kag sau tug neeg luav lug txhus caug ndlua pe Daviv ua ntsejmuag ti nkaus huv aav

²⁴rua ntawm Daviv kutaw thov has tas, “Kuv tug tswv, thov koj noog kuv has, hab thov ca kuv tuab leeg ris qhov kev txhum ntawd xwb!

²⁵Tug tswv, thov koj tsi xob quavntsej Nanpaas kws yog tug tuabneeg tsi zoo has lug ntawd. Nwg lub npe Nanpaas txhais has tas, ruag! Mas nwg yeej ruag le ntawd tag; tabsis tug tswv, thaus koj khaiv koj cov tubkhai tuaj, kuv tsi nyob ntawd.

²⁶Tug TSWV tub tsi pub koj ua pauj hab tua koj cov yeebncuab, kuv txhaj tuav tug TSWV kws muaj sa nyob lub npe coglug rua koj has tas, koj cov yeebncuab hab txhua tug kws xaav ua phem rua koj, yuav raug txim ib yaam le Nanpaas.

²⁷Tug tswv, thov koj txais tej kws kuv coj tuaj rua koj hab muab rua koj cov tuabneeg.

²⁸Tug tswv, thov zaam txim rua tej kws kuv tau ua txhum lawm! Tug TSWV yuav tsaa koj ua vaajntxwv, hab koj cov xeebntxwv los yuav tau ua vaajntxwv. Qhov kws koj ua rog, yog koj ua tug TSWV teg num. Thaus koj tseem ua neej nyob nuav, koj yuav tsi ua ib qho phem le.

²⁹Txawm yog muaj tuabneeg pheej caum koj tua povtseg los tug TSWV kws yog koj tug Vaajtswv yuav tsomkwm koj ib yaam le tug tuabneeg kws zuv nwg cov nyaj. Tabsis tug TSWV yuav muab koj cov yeebncuab laim povtseg ib yaam le luas muab lub pobzeb tso rua ntawm txuj zeg hlua laim ntaag.

³⁰Thaus tug TSWV ua txhua yaam zoo rua koj lawv le nwg tau coglug tseg rua koj hab tsaa koj ua vaajntxwv kaav tebchaws Yixalayees lawm,

³¹mas kuv tug tswv yuav tsi ntxhuv sab, rua qhov koj tsi tau ua phem pauj phem lossis tsi tau ua rua luas nqaj ndluag ntshaav nrug. Thaus tug TSWV ua zoo rua koj kws yog kuv tug tswv lawm, thov koj ncu txug kuv hab.”

³²Daviv has rua Anpinkayis has tas, “Ua tug TSWV kws yog cov Yixalayees tug Vaajtswv tsaug kws nub nua nwg khaiv koj tuaj ntsib kuv.

³³Ua Vaajtswv tsaug kws koj yog ib tug txawj xaav, hab tej kws koj cheem kuas nub nua kuv tsi xob ua phem pauj phem hab tua tuabneeg.

³⁴Tug TSWV tsi pub kuv ua phem rua koj. Kuv tub tuav cov Yixalayees tug Vaajtswv kws muaj sa nyob lub npe coglug lawm, yog nub nua koj tsi tuaj ntsib kuv, ces pigkig kaaj ntug Nanpaas tsev tuabneeg yuav tsi muaj ib tug seem le!”

³⁵Daviv txais tej kws Anpinkayis coj tuaj rua nwg ntawd hab has rua Anpinkayis has tas, “Koj ca le rov moog tsev hab tsi xob txhawj, kuv yuav ua lawv le koj tej lug thov.”

³⁶Thaus Anpinkayis rov lug rua ntawm Nanpaas, Nanpaas taabtom noj ib rooj mov luj huv tsev cuag le npaaj rua vaajntxwv noj. Nanpaas taabtom qaug cawv hab zoo sab heev, yog le ntawd, Anpinkayis txhaj tsi qha ib yaam dlaabtsi rua nwg moog txug thaus taagkig kaaj ntug.

³⁷Taagkig sawv ntxuv thaus Nanpaas zoo cawv lawm, Anpinkayis txawm pav txhua yaam qha rua Nanpaas noog, ces Nanpaas tej hlaab ntshaav sau taubhau txhaws ua rua nwg lub cev tuag taag.

³⁸Tau kwvlaam le kaum nub tom qaab, tug TSWV muab Nanpaas tua tuag lawm.

³⁹Thaus Daviv nov has tas Nanpaas tuag lawm, nwg has tas, “Ua tug TSWV tsaug kws nwg tau ua pauj qhov kws Nanpaas ua saib tsi taug kuv hab qhov kws tug TSWV tsi pub kuv kws yog nwg tug tubkhai ua phem. Tug TSWV rau txim rua Nanpaas vim tej kev phem kws nwg ua.” Ces Daviv txawm tso tuabneeg moog coj Anpinkayis lug ua Daviv quaspuj.

⁴⁰Thaus Daviv cov tubkhai moog txug ntawm Anpinkayis tsev huv lub nroog Kalemees, puab has rua Anpinkayis has tas, “Daviv kuas peb tuaj coj koj moog ua nwg quaspuj.”

⁴¹Anpinkayis txhus caug ndlua pe ua ntsejmuag ti nkaus huv aav hab has tas, “Kuv yog nwg tug qhev, kuv yuav ntxuav nwg cov tubkhai tej kutaw.”

⁴²Anpinkayis txawm sawv tseeg moog caij nwg tug neeg luav nrug Daviv cov tubkhai moog ua Daviv quaspuj, hab coj nwg tsib tug ntxhais qhev nrug nwg moog.

⁴³Daviv tub yuav Ahinau-as huv lub nroog Yexelees ua quaspuj lawm, nwgnuav Daviv maam yuav Anpinkayis hab.

⁴⁴Thaus ntawd, Xa-ules muab nwg tug ntxhais Mikhas kws yog Daviv quaspuj rua Laises tug tub Patis kws nyob huv lub nroog Nkalimes yuav lawm.