Read Hmong Njua 1 Xamuyees 26 Bible Online

1 Xamuyees 26 - Hmong Njua bible

1 Xamuyees 26

¹Muaj tuabneeg huv lub nroog Xifes tuaj cuag Xa-ules huv lub nroog Nkinpe-as hab qha rua Xa-ules has tas, “Daviv nkaum sau lub Roob Hakhilas ntawm ntug taj mojsaab qhua huv tebchaws Yudas.”

²Taamsim ntawd, Xa-ules txawm coj peb txheeb leej tubrog Yixalayees kws nwg xaiv tseg lawm, moog nrhav Daviv ntawm taj mojsaab qhua Xifes,

³Xa-ules moog tsuam chaw su rua ntawm ntug kev sau lub Roob Hakhilas. Thaus Daviv tseem nyob huv taj mojsaab qhua, nwg tub paub lawm has tas, Xa-ules tuaj nrhav nwg.

⁴Daviv txhaj tso tuabneeg moog soj hab pum Xa-ules tuaj nyob sau lawm tag,

⁵Taamsim ntawd, Daviv txawm moog pum Xa-ules hab Neles tug tub Aneles kws yog Xa-ules tug thawj tubrog lub chaw pw ntawm qhov ntawd tag. Xa-ules lub chaw pw nyob huv plawv, hab Xa-ules cov tubrog tej chaw pw nyob puagncig nwg.

⁶Daviv nug Ahimelej kws yog tuabneeg Hitis, hab Anpisais kws yog Yau-as tug kwv has tas, “Meb leejtwg kaam nrug kuv moog rua huv Xa-ules lub chaw?” Anpisais teb has tas, “Kuv nrug koj moog.” (Yau-as hab Anpisais obtug nam hu ua Xeluyas.)

⁷Yog le mo ntawd, Daviv hab Anpisais txawm moog rua huv Xa-ules lub chaw, hab pum Xa-ules pw tsaug zug huv plawv, nwg muab nwg raab muv txhus rua huv aav ze ntawm nwg taubhau. Aneles hab cov tubrog pw tsaug zug pawg lug puagncig Xa-ules.

⁸Anpisais has rua Daviv has tas, “Mo nuav Vaajtswv tub muab koj tug yeebncuab cob rua koj teg lawm, thov ca kuv muab nwg raab muv rov nkaug nwg kuas tshaab plawg rua huv aav, tsi taag yuav loos ntxiv le lawm.”

⁹Tabsis Daviv has tas, “Koj tsi xob tua nwg! Tug TSWV yuav rau txim rua tug tuabneeg kws tua tug vaajntxwv kws tug TSWV tsaa.”

¹⁰Daviv has ntxiv tas, “Kuv paub has tas, tug TSWV kws muaj sa nyob, nwg yeej yuav muab Xa-ules tua povtseg, tsi has nwg yuav tuag rua huv tshaav rog lossis tuag le caag los yeej yog tug TSWV tua.

¹¹Thov tug TSWV paab kuas kuv tsi xob ua phem rua tug kws tug TSWV tsaa ua vaajntxwv lawm! Ca le muab nwg raab muv hab nwg lub taub dlej nqaa moog xwb.”

¹²Yog le ntawd, Daviv txawm muab raab muv hab lub taub dlej kws nyob ze ntawm Xa-ules taubhau ib saab, ces Daviv hab Anpisais txawm coj tsiv moog lawm. Tsi muaj leejtwg pum lossis paub tej xwm nuav lossis tsi muaj leejtwg tsim le, puab puavleej tsaug zug ntsag tu, rua qhov tug TSWV ua rua puab tsaug zug heev.

¹³Daviv hlaa haav moog rua saab tim u, moog sawv sau lub pov roob kws nyob nrug dleb tsawv,

¹⁴hab qw rua Xa-ules cov tubrog hab Aneles has tas, “Aneles, koj Puas nov?” Aneles teb has tas, “Koj yog leejtwg? Koj tsaa vaajntxwv ua dlaabtsi?”

¹⁵Daviv teb has tas, “Aneles, koj tsi yog ib tug tuabneeg tseemceeb huv cov Yixalayees los? Ua caag koj tsi zuv koj tug vaajntxwv zoo? Nyavnyuas muaj ob tug tuabneeg nkaag lug rua huv mej lub chaw pw yuav tua mej tug vaajntxwv.

¹⁶Aneles, yog ua num le ko xwb, tsi taag ua los tau! Kuv coglug rua tug TSWV kws muaj sa nyob has tas, tsimnyog muab koj hab koj cov tuabneeg tua povtseg huv tuabsi, rua qhov mej tsi zuv mej tug vaajntxwv kws tug TSWV tsaa. Mej saib! Vaajntxwv raab muv hab lub taub dlej kws nyob ntawm nwg taubhau ib saab dlua qhov twg lawm?”

¹⁷Xa-ules paub Daviv lub suab, nwg txhaj nug has tas, “Tub Daviv, yog koj los?” Daviv teb has tas, “Vaajntxwv, yog kuv los mas.”

¹⁸Daviv has ntxiv tas, “Kuv tug tswv, ua le caag koj pheej caum koj tug tubkhai tua? Kuv tau ua le caag? Kuv tau ua txhum dlaabtsi?

¹⁹Vaajntxwv, thov koj noog kuv has. Yog tug TSWV kuas koj tawmtsaam kuv, thov tug TSWV hloov sab txais yuav tej kws kuv muab fij rua nwg; tabsis yog tuabneeg kuas koj ua yeebncuab rua kuv, thov tug TSWV foom tsi zoo rua puab. Rua qhov puab tau ntab kuv tawm huv tug TSWV tsaav tuabneeg lub tebchaws moog nyob rua lwm lub tebchaws kws kuv yuav tau pe luas tej vaajtswv.

²⁰Thov tsi xob ca luas tua kuv rua huv lwm tsaav tuabneeg lub tebchaws kws nyob dleb ntawm tug TSWV. Vim le caag cov Yixalayees tug vaajntxwv tuaj caum tua kuv kws zoo le tug dlev mub xwb? Ua caag nwg caum kuv tua ib yaam le caum noog tua?”

²¹Xa-ules teb has tas, “Tub Daviv, kuv tau ua txhum lawm! Koj ca le rov qaab lug, kuv yuav tsi ua phem rua koj lawm, rua qhov mo nuav koj tau tseg kuv txujsa. Kuv ruag heev hab ua phem kawg le!”

²²Daviv teb has tas, “Vaajntxwv, koj raab muv nyob ntawm nuav, kuas koj cov tuabneeg ib tug tuaj nqaa moog.

²³Tug TSWV yeej muab nqe zug rua tug kws muab sab npuab nwg hab ua ncaaj nceeg. Nub nua tug TSWV tub muab koj cob rua kuv teg lawm, tabsis kuv tsi ua phem rua koj, tug kws yog tug TSWV tsaa ua vaajntxwv.

²⁴Nub nua kuv tseg koj txujsa le caag, thov tug TSWV ua ib yaam le ntawd rua kuv, hab paab kuas kuv dlim ntawm tej kev txomnyem ntxhuv sab nuav.”

²⁵Xa-ules has rua Daviv has tas, “Mivtub, thov Vaajtswv foom koob moov rua koj, kuas txhua yaam kws koj ua yuav vaammeej!” Yog le ntawd, Daviv txawm ncaim moog hab Xa-ules rov qaab lug tsev lawm.