Read Hmong Njua 1 Xamuyees 28 Bible Online

1 Xamuyees 28 - Hmong Njua bible

1 Xamuyees 28

¹Tom qaab ntawd, cov Filitees txawm txhij puab cov tubrog tuaj tua cov Yixalayees. Akhises has rua Daviv has tas, “Koj yeej paub has tas, koj hab koj cov tuabneeg yuavtsum moog paab kuv tua rog.”

²Daviv teb has tas, “Kuv yog koj tug tubkhai, kuv yuav moog paab koj, nyaj koj yuav pum has tas kuv moog ua tau num npaum le caag” Akhises teb has tas, “Zoo lawm! Kuv yuav tsaa koj ua tug zuv kuv moog ib simneej le.”

³Xamuyees tub tuag hab cov Yixalayees tub tuaj paam nwg hab muab nwg log rua huv nwg lub nroog Lamas lawm. Xa-ules tub muab cov tuabneeg kws txawj saib yaig, hab txawj txheev dlaab ntab huv tebchaws Yixalayees moog taag lawm.

⁴Cov tubrog Filitees tuaj tsuam yeej ze ntawm lub nroog Sunees; hab Xa-ules txhij cov tubrog Yixalayees moog tsuam yeej rua sau lub Roob Nkinpau-as.

⁵Thaus Xa-ules pum cov tubrog Filitees, nwg ntshai heev,

⁶Yog le ntawd, nwg txhaj nug tug TSWV saib yuav ua le caag. Tabsis tug TSWV tsi teb Xa-ules le, tsi has ua ywgtoog pum lossis saib lub Ulees hab lub Thumees lossis kuas cov cev Vaajtswv lug lug qha le.

⁷Xa-ules has rua nwg cov numtswv has tas, “Mej ca le moog nrhav ib tug quaspuj kws txawj txheev dlaab rua kuv, kuv yuav moog cuag nwg.” Puab teb has tas, “Muaj ib tug nyob huv lub nroog Edaules.”

⁸Yog le ntawd, Xa-ules txawm naav dlua lwm yaam rig tsho ua cuav moog kuas luas tsi paub has tas yog nwg; thaus tsaus ntuj Xa-ules hab ob tug txivneej moog rua huv tug quaspuj ntawd lub tsev. Xa-ules has rua tug quaspuj ntawd tas, “Thov koj txheev dlaab tuaj qha rua kuv saib yuav muaj xwm dlaabtsi tshwm lug rua kuv yaav tom ntej, hab thov koj txheev tug txivneej kws kuv tuav npe nuav tug xyw lug.”

⁹Tug quaspuj ntawd teb has tas, “Koj yeej paub tej kws Vaajntxwv Xa-ules tau ua taag lug lawm, nwg tub muab cov tuabneeg kws txawj saib yaig hab txawj txheev dlaab ntab tawm huv cov Yixalayees lub tebchaws moog taag lawm. Vim le caag koj tseem tuaj ntxag kuas kuv raug luas tua povtseg hab?”

¹⁰Xa-ules has tas, “Kuv tuav tug TSWV kws muaj sa nyob lub npe coglug rua koj has tas, qhov kws kuv kuas koj txheev dlaab nuav, koj yuav tsi raug txim le.”

¹¹Tug quaspuj ntawd nug has tas, “Koj xaav kuas kuv txheev leejtwg?” Xa-ules teb has tas, “Xamuyees.”

¹²Thaus tug quaspuj ntawd pum dlheev Xamuyees, nwg txawm qw nrov nrov, hab has rua Xa-ules has tas, “Koj tub yog Vaajntxwv Xa-ules ntaag, ua caag koj tseem tuaj dlaag kuv hab?”

¹³Vaajntxwv has rua tug quaspuj ntawd tas, “Koj tsi xob ntshai, koj pum dlaabtsi?” Tug quaspuj ntawd teb has tas, “Kuv pum ib tug xyw tawm huv aav lug.”

¹⁴Xa-ules nug has tas, “Nwg zoo le caag?” Tug quaspuj ntawd teb has tas, “Nwg yog ib tug yawm laug kws naav ib lub tsho ntev.” Ces Xa-ules paub has tas, yog Xamuyees ntaag. Xa-ules txhaj txhus caug ndlua rua huv aav hawm.

¹⁵Xamuyees has rua Xa-ules tas, “Koj tuaj txob kuv ua dlaabtsi? Vim le caag koj txhaj hu kuv tawm lug?” Xa-ules teb has tas, “Kuv taabtom muaj kev ntxhuv sab heev! Cov Filitees txhij tubrog tuaj tua kuv, hab Vaajtswv tso kuv tseg lawm, nwg tsi teb kuv, tsi has ua ywgtoog pum lossis tso cov cev Vaajtswv lug lug qha. Yog le ntawd, kuv txhaj tuaj hu koj, saib koj yuav qha kuv ua le caag txhaj zoo.”

¹⁶Xamuyees teb has tas, “Vim le caag koj tuaj hu kuv thaus tug TSWV tub muab koj tso tseg hab ua yeebncuab rua koj lawm?

¹⁷Tug TSWV ua rua koj lawv le tej lug kws nwg kuas kuv has rua koj lawm; nwg tub muab lub tebchaws tshem tawm ntawm koj hab muab rua Daviv kaav lawm.

¹⁸Tug TSWV kuas koj tua cov Amalej hab rhuav txhua yaam kws puab muaj huv tuabsi povtseg, tabsis koj tsi ua lawv le tug TSWV has, nwg txhaj ua le nuav rua koj.

¹⁹Tug TSWV yuav muab koj hab cov Yixalayees cob rua cov Filitees teg. Pigkig koj hab koj cov tub yuav moog nrug kuv nyob, hab tug TSWV yuav muab cov tubrog Yixalayees cob rua cov Filitees teg.”

²⁰Thaus Xa-ules nov Xamuyees has le ntawd, nwg ntshai heev hab qaug ntawg rua huv aav taamsim ntawd. Xa-ules tsaug heev, rua qhov nwg tsi noj ib yaam dlaabtsi le tau ib nub hab ib mos lawm.

²¹Tug quaspuj kws txheev dlaab ntawd moog xauj, nwg pum Xa-ules ntshai kawg nkaus le, tug quaspuj ntawd has rua Xa-ules has tas, “Kuv pheej moo muab kuv txujsa paab koj lawv le koj thov kuas kuv ua.

²²Thov koj ua lawv le kuv has, ca kuv ua mivntsiv mov rua koj noj. Koj yuavtsum noj mov, koj txhaj muaj zug taug kev moog.”

²³Xa-ules tsi kaam noj hab has tas, “Kuv yuav tsi noj ib yaam dlaabtsi le.” Tabsis nwg cov tubkhai txhob kuas nwg yuavtsum noj xwb. Thaus kawg Xa-ules txhaj sawv huv aav lug nyob sau txaaj.

²⁴Tug quaspuj ntawd txawm moog nteg tug mivnyuas nyuj kws nwg muab fwb ca lug tua ua nqaj ua no, nwg muab moov nplej zuaj ua ib cov ncuav tsi xyaw keeb muab ci kag sav.

²⁵Nwg coj cov zaub mov ntawd moog rua Xa-ules hab nwg obtug tubkhai noj. Mo ntawd thaus puab noj mo taag puab txawm rov lug tsev lawm.