Read Hmong Njua 1 Xamuyees 29 Bible Online

1 Xamuyees 29 - Hmong Njua bible

1 Xamuyees 29

¹Cov Filitees sau taagnrho puab cov tubrog tuaj txoos rua ntawm Afes, hab cov tubrog Yixalayees tsuam yeej rua ntawm lub qhovdlej txhawv kws nyob huv lub Haav Yexelees.

²Cov Filitees tsib tug vaajntxwv nrug puab cov tubrog ua ke tuaj tsheej paab, tej paab ib puas leej, hab tej paab ib txheeb leej; Daviv hab nwg cov tuabneeg nrug Vaajntxwv Akhises ua qaab.

³Thaus cov thawj tubrog Filitees pum Daviv hab nwg cov tuabneeg, puab nug has tas, “Cov tuabneeg Henplais tuaj ua dlaabtsi ntawm nuav?” Akhises teb has tas, “Tug nuav yog Daviv kws yog Vaajntxwv Xa-ules kws kaav tebchaws Yixalayees ib tug thawj tubrog. Nwg tub lug nrug kuv nyob tau ib ntus lawm. Txij thaus nwg lug nrug kuv nyob, kuv tsi pum nwg ua txhum dlaabtsi le.”

⁴Tabsis cov thawj tubrog Filitees npautawg heev rua Akhises hab has tas, “Ca le kuas nwg rov moog nyob rua huv lub nroog kws koj muab rua nwg. Tsi pub nwg nrug peb moog ntaus rog; nyob tsaam nwg ntxeev sab rov tawmtsaam peb thaus peb tseem taabtom sis tua. Rua qhov thaus ntawd, yog lub sijhawm zoo rua nwg tua hab txav peb cov tubrog tej taubhau coj moog rua nwg tug tswv kuas nyam nwg.

⁵Tug nuav tub yog tug Daviv kws cov quaspuj seev cev hu nkauj qhuas has tas, ‘Xa-ules tua tuag quas txheeb leej xwb, tabsis Daviv tua tuag quas vaam leej.’ ”

⁶Akhises hu Daviv lug hab has tas, “Kuv tuav cov Yixalayees tug Vaajtswv kws muaj sa nyob lub npe coglug rua koj has tas, koj yeej tau ua zoo rua kuv; kuv yeej txaus sab ca koj nrug kuv moog tua rog. Txij nub kws koj lug nrug kuv nyob kuv tsi pum koj ua ib qhov txhum le. Tabsis lwm tug vaajntxwv tsi pum zoo koj nrug peb moog.

⁷Yog le ntawd, thov koj ca le rov moog tsev zoo sab hlo, hab tsi xob ua tej yaam kws tsiv puab sab le.”

⁸Daviv teb has tas, “Vaajntxwv, kuv tau ua txhum dlaabtsi? Koj tub has tas, txij thaus kuv lug nrug koj nyob ua num rua koj, koj tsi pum kuv ua ib qho txhum le, vim le caag txhaj tsi pub kuv nrug koj kws yog kuv tug tswv hab kuv tug vaajntxwv moog tua koj cov yeebncuab?”

⁹Akhises teb has tas, “Kuv yeej pum zoo. Kuv pum has tas koj yog tuabneeg ncaaj nceeg ib yaam le Vaajtswv ib tug timtswv. Tabsis lwm tug vaajntxwv has tas tsi pub koj nrug peb moog tua rog.

¹⁰Yog le ntawd, pigkig koj hab koj cov tuabneeg kws tsiv Xa-ules tuaj nrug kuv nyob, ca le rov moog thaus pum kev txoog.”

¹¹Yog le ntawd, Daviv hab nwg cov tuabneeg txhaj sawv ntxuv rov lug rua huv tebchaws Filitees, hab cov tubrog Filitees moog rua Yexelees lawm.