Read Hmong Njua 1 Xamuyees 3 Bible Online

1 Xamuyees 3 - Hmong Njua bible

1 Xamuyees 3

¹Elis qha tug mivtub Xamuyees ua tug TSWV teg num. Ntu ntawd tug TSWV tsi tshua lug has rua tuabneeg hab nwg tsi ua rua tuabneeg ua ywgtoog pum lawm.

²Elis laug heev, nwg qhovmuag tsi tshua pum kev lawm. Muaj ib mos nwg pw huv nwg lub txaaj;

³Xamuyees pw huv tug TSWV lub Tuamtsev ze ntawm lub Phijxaab kws ntim Vaajtswv tej lug cog tseg. Thaus tsi tau kaaj ntug kws lub teeb tseem cig laam lug,

⁴tug TSWV hu Xamuyees. Xamuyees teb has tas “Kuv nyob ntawm nuav.”

⁵Ces nwg txawm dlha moog nug Elis has tas, “Koj hu kuv los, kuv nyob ntawm nuav.” Tabsis Elis teb has tas, “Kuv tsi tau hu koj, ca le rov qaab moog pw.” Yog le ntawd, Xamuyees txawm rov moog pw.

⁶Tug TSWV rov hu Xamuyees dlua. Xamuyees tsi paub has tas yog tug TSWV, rua qhov tug TSWV tsi tau hu nwg dlua ib zag le. Yog le ntawd, Xamuyees txhaj rov sawv moog rua ntawm Elis hab nug has tas, “Koj hu kuv los, kuv nyob ntawm nuav.” Elis teb has tas, “Kuv tug mivtub, kuv tsi tau hu koj, koj ca le rov qaab moog pw.”

⁸Tug TSWV hu Xamuyees zag peb; Xamuyees sawv rov moog cuag Elis hab nug has tas, “Koj hu kuv los, kuv nyob ntawm nuav.” Thaus ntawd Elis paub has tas, yog tug TSWV hu Xamuyees.

⁹Elis txhaj has rua Xamuyees tas, “Ca le rov moog pw; yog koj nov nwg rov hu koj dlua, ces koj teb has tas, ‘Tug TSWV, thov koj ca le has, koj tug tubkhai taabtom noog.’ ” Ces Xamuyees txawm rov moog pw lawm.

¹⁰Tug TSWV lug sawv ntawd hab rov hu dlua ib yaam le nwg hu taag lug has tas, “Xamuyees! Xamuyees!” Xamuyees teb has tas, “Tug TSWV, thov koj ca le has, koj tug tubkhai taabtom noog.”

¹¹Tug TSWV has rua Xamuyees has tas, “Muaj ib nub kuv yuav ua ib yaam rua cov Yixalayees, txhua tug kws nov yuav ntshai heev.

¹²Nub ntawd kuv yuav tso kev puamtsuaj lug rua Elis tsev tuabneeg lawv le tej lug kws kuv has thaus pib moog txug thaus xaus.

¹³Kuv tub has rua Elis lawm has tas, kuv yuav rau txim rua nwg tsev tuabneeg moog ibtxhis, rua qhov nwg ob tug tub has tej lug phem saib tsi taug kuv. Elis paub tej kws nwg ob tug tub ua, tabsis nwg tsi txwv obtug.

¹⁴Yog le ntawd, kuv coglug has tas, tsi muaj ib yaam khoom fij lossis theej txhoj kws yuav theej tau Elis tsev tuabneeg lub txim luj ntawd le.”

¹⁵Xamuyees pw tuabywv moog txug thaus kaaj ntug, nwg maam le sawv moog qheb tug TSWV lub tsev tej qhovrooj. Nwg ntshai qha zaaj ywgtoog ntawd rua Elis paub.

¹⁶Elis hu has tas, “Kuv tug mivtub Xamuyees.” Xamuyees teb has tas, “Kuv nyob ntawm nuav.”

¹⁷Elis nug has tas, “Tug TSWV has le caag rua koj? Koj ca le pav rua kuv noog tsi xob zais ib lus le. Yog koj npog tsi qha rua kuv paub, Vaajtswv yuav rau txim nyaav rua koj.”

¹⁸Yog le ntawd, Xamuyees txhaj pav txhua yaam rua Elis noog, tsi zais ib lus le. Elis has tas, “Nwg yog tug TSWV, nwg yeej yuav ua lawv le nwg pum zoo.”

¹⁹Thaus Xamuyees luj hlub lawm, tug TSWV nrug nraim Xamuyees hab ua kuas txhua yaam tav lawv le Xamuyees has ntawd.

²⁰Ces taagnrho cov Yixalayees thoob tebchaws paub has tas, Xamuyees yog tug TSWV ib tug cevlug tseeb.

²¹Tug TSWV lug tshwm tsi tseg rua Xamuyees pum huv lub nroog Silaus, hab nrug Xamuyees thaam. Thaus Xamuyees has los cov Yixalayees noog nwg has.