Read Hmong Njua 1 Xamuyees 30 Bible Online

1 Xamuyees 30 - Hmong Njua bible

1 Xamuyees 30

¹Ua ntej ob nub kws Daviv hab nwg cov tuabneeg rov lug txug huv lub nroog Xikelas. Cov Amalej tub tuaj tua hab fuab tebchaws Yudas saab qaabteb hab lub nroog Xikelas lawm. Puab muab suavtawg hlawv lub nroog,

²hab nteg taagnrho cov quaspuj; puab tsi tua ib tug le, tabsis puab coj txhua tug, tsi has tug laug tug hluas nrug puab moog lawm.

³Thaus Daviv hab nwg cov tuabneeg lug txug, puab pum lub nroog Xikelas kub nyab taag, hab luas coj puab tej quaspuj, tej tub hab tej ntxhais moog taag lawm.

⁴Daviv hab nwg cov tuabneeg tsaa suab hlo quaj tsi ntsag moog txug thaus puab zug ntaug taag.

⁵Txawm yog Daviv ob tug quaspuj kws yog Ahinau-as hab Anpinkayis los luas coj moog huv tuabsi lawm.

⁶Daviv nyuaj sab kawg le, rua qhov nwg cov tuabneeg tej tub tej ntxhais raug luas nteg lawm; puab ntxhuv sab heev, puab has tas puab yuav muab pobzeb ntaus Daviv. Tabsis tug TSWV kws yog Daviv tug Vaajtswv txhawb Daviv tug zug.

⁷Daviv has rua tug povthawj Anpiyathas kws yog Ahimelej tug tub has tas, “Coj lub Efaus lug rua kuv.” Ces Anpiyathas txhaj coj lub efaus lug rua Daviv.

⁸Daviv nug tug TSWV has tas, “Puas tsimnyog kuv moog caum cov tuabneeg tubsaab ntawd? Hab kuv puas yuav caum cuag puab?” Tug TSWV teb has tas, “Koj ca le moog, koj yeej yuav caum cuag puab hab cawm tau cov tuabneeg kws raug luas nteg lawm.”

⁹Yog le ntawd, Daviv hab nwg cov tuabneeg rau pua leej txhaj sawv kev moog. Thaus puab moog txug ntawm tug Dlej Npexaus, puab tseg ibtxha nyob rua ntawd.

¹⁰Daviv hab nwg cov tuabneeg plaub puas leej caum moog ntxiv; ob puas leej kws muab tso tseg ntawd qaug zug heev, hlaa tsi taug dlej moog rua saab tid.

¹¹Daviv cov tuabneeg moog ntsib ib tug tub hluas Iziv tom taj nraag, hab puab coj nwg lug cuag Daviv. Puab muab ncuav rua nwg noj, muab dlej rua nwg haus,

¹²muab ob peb lub txiv ncuav pas qhuav hab ob pob txiv maab qhuav rua nwg. Thaus nwg noj taag nwg txhaj rov muaj zug tuaj, rua qhov nwg tsi muaj dlaabtsi noj lossis haus tau peb nub lawm.

¹³Daviv nug nwg has tas, “Koj tug tswv yog leejtwg, hab koj tuaj qhov twg tuaj?” Nwg teb has tas, “Kuv yog tuabneeg Iziv, hab kuv yog ib tug tuabneeg Amalej tug qhev. Kuv tug tswv muab kuv tso tseg tau peb nub rua ntawm nuav, rua qhov kuv mob.

¹⁴Peb moog fuab cov Kheletis kws nyob rua cheebtsaam huv tebchaws Yudas saab qaabteb, peb fuab cheebtsaam kws Kalej cuab kwvtij nyob hab peb muab suavtawg hlawv lub nroog Xikelas kub nyab taag.”

¹⁵Daviv nug has tas, “Koj puas kaam coj kuv moog caum cov tuabneeg tubsaab ntawd?” Nwg teb has tas, “Tau kawg, yog koj tuav Vaajtswv lub npe coglug has tas, koj yuav tsi muab kuv tua povtseg lossis muab kuv cob rua kuv tug tswv.”

¹⁶Nwg txhaj coj Daviv moog caum puab. Cov tubsaab ntawd moog nyob pawg lug ntawm ib thaaj chaw, puab noj haus hab zoo sab, rua qhov puab moog fuab tau khoom ntau heev huv tebchaws Filitees hab tebchaws Yudas lug.

¹⁷Taagkig sawv ntxuv Daviv txawm tua cov tuabneeg tubsaab ntawd moog txug thaus tsaus ntuj tuag taag, tsuas tshuav plaub puas leej tub hluas kws caij ntxhuav tsiv dlim lawm xwb.

¹⁸Daviv txeeb tau nwg cov tuabneeg txhua tug hab txhua yaam kws cov Amalej fuab moog lawm, hab Daviv ob tug quaspuj rov lug huv tuabsi;

¹⁹tsi muaj ib yaam dlaabtsi pluj le. Daviv coj tau nwg cov tuabneeg tej tub tej ntxhais hab txhua yaam kws cov Amalej fuab moog lawm huv tuabsi rov qaab lug.

²⁰Daviv coj tau taagnrho puab tej nyuj, tej yaaj hab tej tshis rov qaab lug; Daviv cov tuabneeg caab tej tsaj ntawd moog ua puab ntej hab has tas, “Tej tsaj nuav yog Daviv tug.”

²¹Daviv rov lug txug ntawm ob puas leej kws qaug zug hab tsi nrug nwg moog kws nwg muab tso tseg rua ntawm tug Dlej Npexaus. Cov ntawd tuaj tog Daviv hab cov kws nrug nwg moog. Daviv lug rua ntawm puab hab has lug noj qaab nyob zoo rua puab.

²²Tabsis cov tuabneeg kws nrug Daviv moog, muaj qee leej kws tsi txawj xaav hab tsi paub qaabhau has tas, “Puab tsi nrug peb moog, peb yuav tsi faib tej khoom kws peb moog txeeb tau lug rua puab. Puab tsuas coj tau puab tej quaspuj mivnyuas moog xwb.”

²³Tabsis Daviv teb has tas, “Kuv cov kwvtij, mej tsi xob ua le ntawd, tej khoom nuav yog tej kws tug TSWV muab pub rua peb! Tug TSWV yog tug tsomkwm hab pub peb moog tua yeej cov tubsaab ntawd.

²⁴Yeej tsi muaj leejtwg pum zoo tej kws mej has ko le. Yuavtsum faib kuas txhua tug tau sis npaug, tsi has cov kws nyob tom qaab saib peb tej khoom hab cov kws tau moog tua rog.”

²⁵Daviv muab qhov nuav ua ib txuj cai rua tsaav tuabneeg Yixalayees coj, txij thaus ntawd lug txug naj nub nua.

²⁶Thaus Daviv rov lug txug huv lub nroog Xikelas, nwg muab tej khoom kws nwg txeeb tau lug ntawd ibtxha xaa moog rua nwg cov phoojywg kws yog cov Yudas tej thawjcoj hab has tas, “Tej nuav yog tej kws kuv moog txeeb tau ntawm tug TSWV cov yeebncuab lug xaa tuaj pub rua mej.”

²⁷Daviv xaa ib co moog pub rua cov tuabneeg huv lub nroog Npethees, xaa ib co rua cov tuabneeg huv lub nroog Lamas kws nyob huv tebchaws Yudas saab qaabteb hab nwg tseem xaa ib co moog rua cov nroog nuav: Yatis,

²⁸Alu-es, Xifemaus, Ethemaus

²⁹hab Lakas; xaa ib co moog rua cuab Yelamees, cuab Kenais

³⁰hab xaa ib co moog rua cov tuabneeg huv lub nroog Haumas, lub nroog Npaulasas, lub nroog Athas

³¹hab lub nroog Henploos. Daviv xaa tej khoom ntawd moog rua txhua qhov kws nwg hab nwg cov tuabneeg tau moog ntoj moog thuv luas lawm.