Read Hmong Njua 1 Xamuyees 31 Bible Online

1 Xamuyees 31 - Hmong Njua bible

1 Xamuyees 31

¹Cov Filitees hab cov Yixalayees sis tua sau lub Roob Kinpau-as. Cov Yixalayees raug tua tuag coob heev rua sau, cov kws seem tuag nyag tsiv nyag moog lawm, Vaajntxwv Xa-ules hab nwg peb tug tub los tsiv taag lawm hab.

²Tabsis cov Filitees moog caum nteg tau puab hab muab Xa-ules peb tug tub kws yog Yaunathaas, Anpinadas hab Makhisesuas tua tuag taag.

³Suavdlawg sis tua nyaav heev puagncig Xa-ules. Yeebncuab tua xub neevnti tuaj raug Xa-ules saab kawg le.

⁴Xa-ules has rua tug tub hluas kws nqaa nwg raab ntaaj hab raab muv has tas, “Ca le rhu koj raab ntaaj lug tua kuv kuas tuag, cov Filitees kws tsi ua kevcai txav txhaj tsi khaav has tas yog puab tua kuv.” Tabsis tug tub hluas ntawd ntshai heev, nwg tsi muaj cuabkaav ua le Xa-ules has. Xa-ules txhaj rhu Xa-ules raab ntaaj lug cuab hab qhau cev moog npuj raab ntaaj.

⁵Thaus tug tub hluas ntawd pum has tas, Xa-ules tuag lawm, nwg txawm rhu nwg raab ntaaj lug cuab hab qhau cev moog npuj raab ntaaj chob nwg tuag nrug Xa-ules lawm hab.

⁶Yog le ntawd, Xa-ules, nwg peb tug tub, tug tub hluas kws nqaa Xa-ules raab ntaaj hab raab muv hab Xa-ules cov tuabneeg txhaj tuag taag rua nub ntawd.

⁷Thaus cov Yixalayees kws nyob ntawm lub haav Yexelees saab tim, hab cov kws nyob ntawm tug dlej Yauladees saab nubtuaj, nov has tas cov tubrog Yixalayees swb, Xa-ules hab nwg peb tug tub los raug luas tua tuag taag lawm, puab txawm tsiv tso puab tej vaaj tse tseg. Cov Filitees txhaj tuaj nyob huv puab tej nroog.

⁸Nub tom qaab cov Filitees txawm moog dlaws cov tubrog Yixalayees kws tuag tej khoom, puab pum Xa-ules hab nwg peb tug tub tuag rua sau lub Roob Kinpau-as.

⁹Puab txav Xa-ules lub taubhau, hle nwg cev rig tsho tooj, nwg tej cuabyeej ua rog nqaa moog hab xaa xuv moog thoob plawg tebchaws Filitees hab qha txuj xuv zoo rua puab tej mlom hab puab cov tuabneeg.

¹⁰Puab nqaa Xa-ules tej cuabyeej ua rog moog tso rua huv lub tsev kws puab teev tug mlom quaspuj Atates hab puab muab Xa-ules lub cev dlai rua ntawm lub nroog Npes Saas tug ntsaa yeej.

¹¹Thaus cov tuabneeg kws nyob huv lub nroog Yanpes huv tebchaws Nkile-as nov tej kws cov Filitees ua rua Xa-ules ntawd,

¹²cov tuabneeg kws sab tawv txawm maub ib mos moog rua huv lub nroog Npes Saas, puab muab Xa-ules hab nwg peb tug tub lub cev sau tug ntsaa yeej txu lug hab kwv moog hlawv rua huv lub nroog Yanpes.

¹³Puab muab Xa-ules hab nwg peb tug tub cov pobtxhaa coj moog log rua ntawm qaab tsob ntoo tamalis huv lub nroog Yanpes, hab puab ua kevcai yoo mov tau xyaa nub.