Read Hmong Njua 1 Xamuyees 4 Bible Online

1 Xamuyees 4 - Hmong Njua bible

1 Xamuyees 4

¹Lub sijhawm ntawd, cov Filitees txhij tubrog tuaj tua cov Yixalayees, yog le ntawd, cov Yixalayees txhaj moog tua cov Filitees. Cov Yixalayees moog tsuam yeej rua ntawm Enpenexes, hab cov Filitees tsuam yeej rua ntawm Afes.

²Cov Filitees txawm tuaj tua cov Yixalayees, ces ob tog sis tua nyaav heev, cov Filitees tua ua rua cov Yixalayees swb hab tuag plaub txheeb leej rua huv tshaav rog.

³Thaus cov Yixalayees kws seem rov lug txug rua huv puab lub yeej, cov Yixalayees cov thawjcoj has tas, “Vim le caag nub nua tug TSWV ca cov Filitees tua yeej peb. Peb ca le moog kwv lub Phijxaab kws ntim Vaajtswv tej lug cog tseg huv lub nroog Silaus tuaj, kuas nwg txhaj nrug peb moog hab cawm kuas peb dlim ntawm peb cov yeebncuab teg.”

⁴Yog le ntawd, puab txhaj khaiv tuabneeg moog rua huv lub nroog Silaus, hab kwv lub Phijxaab kws ntim Vaajtswv tej lug cog tseg kws yog tug TSWV kws muaj fwjchim luj kawg nkaus lub zwmtxwv kws nyob huv qaab ob tug qhelunpees ob saab qaab tis, Haufenis hab Finehas kws yog Elis ob tug tub txhaj nrug cov kws kwv lub Phijxaab ntawd moog hab.

⁵Thaus puab kwv lub Phijxaab moog txug, cov Yixalayees zoo sab hab qw nrov heev ua rua aav tseeg nkawg.

⁶Thaus cov Filitees nov tej suab qw ntawd, puab has tas, “Peb ca le noog tej suab kws qw huv cov tuabneeg Henplais lub yeej! saib puab qw ua dlaabtsi?” Thaus cov Filitees paub has tas, yog cov Yixalayees kwv lub Phijxaab kws ntim Vaajtswv tej lug cog tseg tuaj rua huv cov Henplais lub yeej lawm,

⁷cov Filitees ntshai heev hab sis thaam has tas, “Vaajtswv tuaj rua huv puab lub yeej lawm! Peb yuav swb puab, peb tsi tau pum muaj dlua le nuav ib zag le.

⁸Leejtwg yuav cawm tau peb dlim ntawm tej vaajtswv kws muaj fwjchim le ntawd? Tej vaajtswv ntawd yog cov kws tua cov Iziv nraag taj suabpuam ntaag!

⁹Cov Filitees, ca le ua sab tawv qhawv! Ca le tiv tua tag tag lossis yuav ca peb ua cov Henplais qhev, ib yaam le puab tau ua peb qhev lawm. Yog le ntawd, ca le tiv tua tag tsi xob thim!”

¹⁰Cov Filitees txhaj tua heev ua rua cov Yixalayees swb kag, hab cov Yixalayees nyag taug nyag tsiv rov qaab moog tsev lawm. Cov tubrog Yixalayees raug luas tua tuag peb caug txheeb leej.

¹¹Cov Filitees txeeb tau lub Phijxaab kws ntim Vaajtswv tej lug cog tseg hab Elis ob tug tub kws yog Haufenis hab Finehas los raug luas tua tuag rua huv tshaav rog lawm.

¹²Tuab nub ntawd, muaj ib tug txivneej kws yog xeem Npeenyamees tsiv huv tshaav rog lug txug huv lub nroog Silaus. Nwg tu sab heev, nwg txhaj dlua rhe nwg lub tsho hab tsuab moov aav rua sau nwg taubhau.

¹³Elis nyob quastsawg sau ib lub rooj ntawm ntug kev saib ntsoov ncauj ke. Nwg txhawj txug lub Phijxaab kws ntim Vaajtswv tej lug cog tseg heev. Tug txivneej ntawd lug qha rua cov tuabneeg kws nyob thoob plawg huv lub nroog paub tej xwm ntawd, ces suavdlawg ntshai heev hab quaj zum zawg.

¹⁴Thaus Elis nov suavdlawg quaj zum zawg, nwg nug has tas, “Tej suab ntawd yog suab dlaabtsi?” Tug txivneej ntawd dlha ceev nrooj lug qha rua Elis.

¹⁵(Thaus ntawd Elis noobnyoog muaj cuaj caum yim xyoo, nwg qhovmuag pum kev tsi tseeb lawm.)

¹⁶Tug txivneej ntawd has rua Elis has tas, “Nub nua kuv tsiv huv tshaav rog lug.” Elis nug has tas, “Mivtub, muaj xwm dlaabtsi?”

¹⁷Nwg teb has tas, “Cov Filitees tua cov Yixalayees swb hab tawg tsiv taag. Koj ob tug tub kws yog Haufenis hab Finehas los raug tua tuag, hab luas tseem txeeb tau lub Phijxaab kws ntim Vaajtswv tej lug cog tseg huv tuabsi lawm.”

¹⁸Thaus tug txivneej ntawd has txug lub Phijxaab, Elis txawm ntxeev hlo sau lub rooj rua saab tom qaab ntawm ib saab roojvaag, nwg cejdlaab luv ntho hab tuag lawm, vim nwg laug hab rog heev. Nwg ua cov Yixalayees tug thawjcoj tau plaub caug xyoo.

¹⁹Elis tug nyaab kws yog Finehas tug quaspuj, taabtom suab mivnyuas hab yuav txug caij yug. Thaus nwg nov has tas, luas txeeb tau lub Phijxaab kws ntim Vaajtswv tej lug cog tseg, nwg txiv yawm hab nwg tug quasyawg los tuag lawm, taamsim ntawd nwg mob plaab heev hab ca le yug kag mivnyuas.

²⁰Thaus nwg yuav tu sav, cov quaspuj kws tuaj paab nwg has rua nwg tas, “Ua tag tswj koj txujsa, koj tub tau ib tug mivtub lawm.” Tabsis nwg tsi noog hab tsi teb le.

²¹Nwg tis tug mivtub ntawd npe hu ua Ikhanpaus, txhais has tas “Vaajtswv tug tshwjchim tso cov Yixalayees tseg lawm.” Nwg has le ntawd, yog has txug qhov kws luas txeeb tau lub Phijxaab kws ntim Vaajtswv tej lug cog tseg lawm, nwg txiv yawm hab nwg tug quasyawg tuag.

²²Nwg has tas, “Vaajtswv tug tshwjchim tso cov Yixalayees tseg, rua qhov luas txeeb tau lub Phijxaab kws ntim Vaajtswv tej lug cog tseg lawm.”