Read Hmong Njua 1 Xamuyees 5 Bible Online

1 Xamuyees 5 - Hmong Njua bible

1 Xamuyees 5

¹Thaus cov Filitees txeeb tau lub Phijxaab kws ntim Vaajtswv tej lug cog tseg lawm, puab kwv ntawm Enpenexes moog rua huv lub nroog Asedaus,

²hab coj moog tso rua huv lub tuamtsev kws puab teev puab tug vaajtswv Dankoos hab muab txawb rua ntawm tug mlom Dankoos ib saab.

³Nub tom qaab sawv ntxuv, cov tuabneeg huv lub nroog Asedaus pum tug mlom Dankoos qaug rua huv aav ntawm hauv ntej lub Phijxaab kws ntim Vaajtswv tej lug cog tseg. Yog le ntawd, puab muab tsaa hab txawb rua ntawm qhov qub chaw.

⁴Taagkig tom qaab, puab tuaj pum tug mlom Dankoos rov qaug khwb rwg ntxig rua ntawm hauv ntej lub Phijxaab kws ntim Vaajtswv tej lug cog tseg. Zag nuav tug mlom ntawd lub taubhau hab ob saab npaab tu rua ntawm paws rooj tshuav lub cev xwb.

⁵(Tub yog vim le ntawd, cov povthawj hab cov tuabneeg kws teev tug mlom Dankoos huv lub nroog Asedaus txhaj tsi tsuj hab tsi hlaa lub paws rooj ntawm lug txug naj nub nua.)

⁶Tug TSWV rau txim nyaav heev rua cov tuabneeg kws nyob huv lub nroog Asedaus hab ua rua puab ntshai kawg le. Tug TSWV rau txim rua puab hab ua rua cov tuabneeg kws nyob cheebtsaam ntawd mob faaj taag huv tuabsi.

⁷Thaus cov tuabneeg ntawd, pum tej xwm nuav puab has tas, “Cov Yixalayees tug Vaajtswv rau txim rua peb hab peb tug vaajtswv Dankoos lawm, peb ca le muab lub Phijxaab tshem moog, tsi xob ca nyob ntawm nuav lawm.”

⁸Yog le ntawd, cov Filitees txawm tso tuabneeg moog hu puab tsib tug vaajntxwv tuaj hab has rua puab tas, “Peb yuav ua le caag rua lub Phijxaab kws ntim cov Yixalayees tug Vaajtswv tej lug cog tseg nuav?” Puab teb has tas, “Ca le kwv moog tso rua huv lub nroog Nkas.” Yog le ntawd, puab txhaj kwv lub phijxaab moog tso rua huv lub nroog Nkas kws yog cov Filitees ib lub nroog.

⁹Tabsis thaus puab coj lub phijxaab moog tso rua huv lub nroog ntawd lawm, tug TSWV txawm rau txim rua cov tuabneeg huv lub nroog ntawd, hab ua rua puab ntxhuv sab kawg le. Tug TSWV rau txim nyaav heev rua cov tuabneeg huv lub nroog ntawd, tsi has tug laug tug hluas mob faaj taag huv tuabsi.

¹⁰Ces puab txhaj kwv lub Phijxaab kws ntim Vaajtswv tej lug cog tseg moog tso rua huv Ekiloos kws yog cov Filitees ib lub nroog; thaus coj lub Phijxaab moog txug huv lub nroog Ekiloos, cov tuabneeg kws nyob huv qw zum zawg has tas, “Puab kwv lub Phijxaab kws ntim cov Yixalayees tug Vaajtswv tej lug cog tseg tuaj ua kuas peb tuag taag xwb.”

¹¹Yog le ntawd, puab rov tso tuabneeg moog hu taagnrho cov Filitees cov vaajntxwv tuaj hab has rua puab tas, “Peb ca le xaa lub Phijxaab kws ntim cov Yixalayees tug Vaajtswv tej lug cog tseg rov qaab moog tso rua qhov chaw qub, kuas lub Phijxaab ntawd txhaj tsi tua peb hab peb tej tsev tuabneeg lawm.” Muaj kev ntxhuv sab thoob plawg rua txhua lub nroog, rua qhov Vaajtswv rau txim nyaav heev rua puab.

¹²Cov kws tsi tuag los mob faaj taag huv tuabsi, puab txhaj quaj thov puab tej vaajtswv paab puab.