Read Hmong Njua 1 Xamuyees 6 Bible Online

1 Xamuyees 6 - Hmong Njua bible

1 Xamuyees 6

¹Thaus lub Phijxaab kws ntim Vaajtswv tej lug cog tseg, nyob huv tebchaws Filitees tau xyaa lub hlis,

²Cov Filitees txawm hu puab cov povthawj hab cov tuabneeg kws txawj saib yaig tuaj hab nug has tas, “Peb yuav ua le caag rua lub Phijxaab kws ntim Vaajtswv tej lug cog tseg nuav? Yog peb xaa rov qaab, peb yuav muab dlaabtsi xaa nrug moog?”

³Puab teb has tas, “Yog mej yuav xaa lub Phijxaab kws ntim cov Yixalayees tug Vaajtswv tej lug cog tseg rov qaab, mej yuavtsum muab ib cov khoom xaa nrug moog dlaws mej tej kev txhum. Tsi xob xaa lub Phijxaab rov qaab moog dlawb moog dlo. Mej ua le nuav, mej tej mob txhaj yuav zoo, hab mej txhaj yuav paub has tas, vim le caag tug TSWV txhaj rau txim rua mej.”

⁴Cov pejxeem nug has tas, “Peb yuav muab dlaabtsi moog rua nwg?” Puab teb has tas, “Muab tsib thooj kub ua kuas zoo le tsib lub faaj hab tsib tug tsuag, ib tug tsuag kub hab ib lub faaj kub rua cov Filitees ib tug vaajntxwv, rua qhov tuab yaam mob nuav kis rua mej hab mej tsib tug vaajntxwv ntawd.

⁵Mej yuavtsum muab kub nchuav ua kuas zoo le cov faaj hab zoo le cov tsuag kws tsimtxom mej lub tebchaws, hab mej yuavtsum fwm cov Yixalayees tug Vaajtswv, tej zag nwg yuav tsi rau txim rua mej, mej tej vaajtswv hab mej lub tebchaws.

⁶Vim le caag mej lub sab tawv ib yaam le Falaus kws kaav tebchaws Iziv hab cov Iziv? Mej tsi ncu has tas, tom qaab kws Vaajtswv rau txim nyaav rua puab, puab txhaj tso cov Yixalayees tawm huv tebchaws Iziv moog los?

⁷Yog le ntawd, mej txua ib lub tsheb nyuj tshab hab muab ib nkawm maum nyuj kws tsi tau hai dlua tsheb le; muab ob tug maum nyuj ntawd hai lub tsheb hab muab ob tug mivnyuas cais rua huv nkuaj.

⁸Muab lub Phijxaab kws ntim Vaajtswv tej lug cog tseg, tsaws rua sau lub tsheb nyuj, muab cov tsuag kub hab cov faaj kub kws mej npaaj moog dlaws mej tej kev txhum tso rua ntawm lub Phijxaab ib saab, hab tso ob tug maum nyuj hai lub tsheb ntawd moog.

⁹Mej saib, yog ob tug nyuj ntawd hai lub tsheb moog rua huv lub nroog Npethes Semes, ces yog cov Yixalayees tug Vaajtswv tso kev puamtsuaj luj kawg nkaus lug rua peb. Tabsis yog ob tug nyuj tsi hai lub tsheb moog rua huv, ces peb paub has tas tsi yog nwg tso kaab mob lug rua peb; tsuas yog peb mob tawm thawj xwb.”

¹⁰Ces puab txawm ua le ntawd, puab txhaj muab ib nkawm maum nyuj lug hab tis lub tsheb rua, hab muab ob tug mivnyuas kaw rua huv nkuaj.

¹¹Puab muab lub Phijxaab kws ntim Vaajtswv tej lug cog tseg, hab lub thawv kws ntim cov tsuag kub hab cov faaj kub tsaws rua sau lub tsheb nyuj.

¹²Ces ob tug maum nyuj txawm taug txuj nam kev ncaaj nraim moog rua huv lub nroog Npethes Semes, too hauv li tsi lem moog rua saab txhumphem lossis saab xis le. Cov Filitees tsib tug vaajntxwv caum ob tug maum nyuj ntawd qaab moog txug ndlua ntawm lub nroog Npethes Semes tug nrimteb.

¹³Thaus ntawd cov tuabneeg huv lub nroog Npethes Semes taabtom hlais nplej huv lub zeeg taj teb, tog nwm puab pum dlheev lub Phijxaab kws ntim Vaajtswv tej lug cog tseg, puab zoo sab heev.

¹⁴Lub tsheb nyuj lug txug rua ntawm ib tug txivneej kws hu ua Yausuas kws nyob huv lub nroog Npethes Semes thaaj teb, hab nreg ze rua ntawm ib lub pobzeb luj. Ces puab txawm muab lub tsheb nyuj phua ua tawg hab muab ob tug maum nyuj tua hlawv fij rua tug TSWV.

¹⁵Cov Levis tsaws lub Phijxaab kws ntim Vaajtswv tej lug cog tseg hab lub thawv kws ntim cov tsuag kub hab cov faaj kub lug txawb rua sau lub pobzeb luj ntawd. Ces cov tuabneeg huv lub nroog Npethes Semes txhaj tua tsaj hlawv fij hab muab lwm yaam fij rua tug TSWV.

¹⁶Cov Filitees tsib tug vaajntxwv saib ntsoov cov Yixalayees ua le ntawd, ces nub ntawd cov Filitees tsib tug vaajntxwv txawm rov qaab lug rua huv lub nroog Ekiloos lawm.

¹⁷Cov Filitees xaa tau tsib lub faaj kub moog fij rua tug TSWV dlaws puab tej kev txhum, ib lub rua lub nroog Asedaus, ib lub rua lub nroog Nkaxas, ib lub rua lub nroog Asekeloos, ib lub rua lub nroog Nkas hab ib lub rua lub nroog Ekiloos;

¹⁸hab tsib tug tsuag kub rua cov Filitees tsib tug vaajntxwv kws kaav cov nroog kws muaj ntsaa yeej thaiv hab tej zog kws tsi muaj ntsaa yeej thaiv. Lub pobzeb luj kws luas txawb lub Phijxaab kws ntim Vaajtswv tej lug cog tseg rua sau, tseem nyob huv Yausuas kws nyob huv lub nroog Npethes Semes thaaj teb lug txug naj nub nua, ua timkhawv qha has tas, muaj tej xwm nuav tag.

¹⁹Tug TSWV tua cov txivneej kws nyob huv lub nroog Npethes Semes tuag xyaa caum leej, rua qhov puab moog xauj lub Phijxaab kws ntim Vaajtswv tej lug cog tseg. Tej tuabneeg quaj ntsuag, rua qhov tug TSWV tua puab cov tuabneeg tuag ntau leej.

²⁰Yog le ntawd, cov tuabneeg huv lub nroog Npethes Semes has tas, “Leejtwg txhaj muaj cuabkaav sawv taabmeeg tug TSWV kws yog tug Vaajtswv dlawbhuv? Peb yuav muab nwg xaa moog tso rua qhov twg, kuas nwg nyob nrug dleb ntawm peb?”

²¹Puab txhaj tso tuabneeg moog has rua cov tuabneeg huv lub nroog Kili-as Ye-alees has tas, “Cov Filitees tub xaa lub Phijxaab kws ntim Vaajtswv tej lug cog tseg rov tuaj lawm, mej ca le tuaj kwv moog.”