Read Hmong Njua 1 Xamuyees 9 Bible Online

1 Xamuyees 9 - Hmong Njua bible

1 Xamuyees 9

¹Muaj ib tug txivneej kws yog xeem Npeenyamees hu ua Kises; nwg yog Anpiyees tug tub hab yog Xelaus tug xeebntxwv. Kises yog Npekaulas tsev tuabneeg hab yog Afiyas cuab. Kises yog ib tug tuabneeg npluanuj hab muaj koob meej nto moo lug.

²Nwg muaj ib tug tub hu ua Xa-ules kws zoo nraug ntxag hab muaj zug khov kho. Xa-ules sab hab zoo nraug tshaaj cov Yixalayees txhua tug huv tuabsi.

³Muaj ib nub Kises cov neeg luav ibtxha pluj lawm, nwg txawm has rua Xa-ules has tas, “Koj coj ib tug tubkhai nrug koj moog nrhav cov neeg luav.”

⁴Obtug moog nrhav thoob plawg sau lub laaj roob Efalayees hab huv cheebtsaam Salisas, tabsis tsi pum cov neeg luav le. Yog le ntawd, obtug txhaj moog nrhav huv cheebtsaam Sa-alees los tsi pum cov neeg luav le. Ces obtug txhaj moog nrhav thoob plawg huv cheebtsaam Npeenyamees, tabsis tsi pum le hab.

⁵Thaus obtug lug txug huv cheebtsaam Xufes, Xa-ules has rua nwg tug tubkhai has tas, “Wb ca le rov moog tsev; tej zag kuv txiv yuav txhawj wb tshaaj txhawj cov neeg luav lawm.”

⁶Tug tubkhai teb has tas, “Tog mivntsiv tsaiv! Nyob huv lub nroog nuav muaj ib tug txivneej yog Vaajtswv tug tuabneeg kws suavdlawg fwm heev, nwg has le caag txawm muaj lawv le ntawd. Wb ca le moog cuag nwg, tej zag nwg yuav qha kev rua wb moog nrhav tau cov neeg luav.”

⁷Xa-ules nug has tas, “Yog wb moog cuag nwg, wb yuav coj dlaabtsi moog rua nwg? Wb cov ncuav huv naab los taag lawm, wb tub tsi muaj dlaabtsi coj moog rua nwg le ne?”

⁸Tug tubkhai teb has tas, “Kuv muaj ib lub nyaj, kuv maam le muab lub nyaj nuav rua nwg, ces nwg yuav qha kev rua wb moog nrhav tau cov neeg luav ntawd.”

⁹Xa-ules teb has tas, “Koj cov lug ko yog ib zaaj tswvyim zoo, wb ca le moog cuag nwg.” Yog le ntawd, obtug txhaj moog rua huv lub nroog kws Vaajtswv tug tuabneeg nyob. Thaus obtug taabtom taug kev sau lub laaj roob yuav moog rua huv lub nroog, obtug ntsib ib paab ntxhais tuaj nqaa dlej, obtug nug cov ntxhais ntawd has tas, “Tug kws paub saib yaav tom ntej puas nyob huv tsev lawm?” (Tam ntawd luas hu tug cev Vaajtswv lug has tas, tug kws paub saib yaav tom ntej, yog leejtwg xaav nug Vaajtswv ib yaam dlaabtsi, nwg has tas, “Peb moog cuag tug kws paub yaav tom ntej.”)

¹²Cov ntxhais ntawd teb has tas, “Nwg nyob los mas, nwg nyavnyuas dlhau plawg moog lawm, yog meb moog ceev nrooj meb yuav caum cuag nwg. Nwg taabtom moog rua huv lub nroog, rua qhov nub nua suavdlawg coj tsaj tuaj tua hlawv rua sau lub thaaj kws nyob peg laaj roob fij rua tug TSWV. Cov tuabneeg kws luas caw tuaj yuav tog nwg moog txug maam le noj mov. Rua qhov nwg yuavtsum thov Vaajtswv foom koob moov rua tej khoom fij ntawd tsaiv, suavdlawg maam le noj. Yog meb moog taamsim nuav meb txhaj yuav ntsib nwg, tsheem nwg tsi tau moog rua peg roob.”

¹⁴Yog le ntawd, Xa-ules hab tug tubkhai txhaj moog rua huv lub nroog, thaus obtug taabtom moog, obtug pum Xamuyees taug kev ncaaj nraim tuaj rua ntawm obtug, yuav moog rua ntawm qhov chaw kws pehawm tug TSWV.

¹⁵Ua ntej nub kws Xamuyees tsi tau moog rua huv lub nroog, tug TSWV tub xub has rua Xamuyees lawm has tas,

¹⁶“Pigkig thaus taav lub caij nuav, kuv yuav khaiv ib tug tuabneeg kws yog xeem Npeenyamees tuaj cuag koj. Koj ca le muab roj laub rua nwg taubhau, tsaa nwg ua vaajntxwv kaav kuv tsaav tuabneeg Yixalayees, hab nwg yuav cawm kuas puab dlim ntawm cov Filitees txhais teg. Kuv tub pum kuv tsaav tuabneeg tej kev txomnyem hab nov puab tej lug thov lawm.”

¹⁷Thaus Xamuyees pum dlheev Xa-ules, tug TSWV txawm has rua Xamuyees has tas, “Tug txivneej nuav yog tug kws kuv qha rua koj ntaag, nwg yog tug yuav kaav kuv tsaav tuabneeg.”

¹⁸Xa-ules moog rua ntawm Xamuyees thaus nwg nyob ze lub roojvaag hab nug has tas, “Koj puas paub tug kws paub saib yaav tom ntej nyob qhov twg? Thov koj qha rua kuv.”

¹⁹Xamuyees teb has tas, “Tug kws paub saib yaav tom ntej yog kuv ntaag. Meb ca le ua kuv ntej moog rua peg lub chaw pehawm Vaajtswv. Nub nua meb moog nrug kuv noj mov peg. Pigkig sawv ntxuv kuv maam teb meb tej lug nug, hab meb maam rov moog tsev.

²⁰Meb tsi xob txhawj txug cov neeg luav kws tub pluj tau peb nub lawm, rua qhov luas tub nrhav tau lawm. Tabsis tug twg yog tug kws cov Yixalayees xaav yuav heev dlua? Puab xaav yuav koj hab koj txiv tsev tuabneeg ntaag.”

²¹Xa-ules teb has tas, “Kuv yog xeem Npeenyamees, yog xeem kws tsawg tshaaj plawg ntawm tsaav tuabneeg Yixalayees, hab kuv tsev tuabneeg yog tsev kws tsi tseemceeb le luas lwm tsev kws yog peb xeem Npeenyamees, ua caag koj has le ko rua kuv?”

²²Xamuyees coj Xa-ules hab Xa-ules tug tubkhai moog rua huv chaav tsev luj hab kuas obtug moog nyob peg hauv rooj kws yog tshwj rua cov qhua, taagnrho cov tuabneeg kws tuaj ntawd muaj kwvlaam le peb caug leej.

²³Xamuyees has rua tug kws ua zaub ua mov has tas, “Koj moog nqaa cov nqaj kws kuv kuas koj muab khaws tshwj tseg rua ib qho ntawd lug.”

²⁴Yog le ntawd, tug kws ua zaub ua mov txawm moog nqaa cegqaab kws muab tshwj tseg ntawd lug tso rua ntawm Xa-ules xubndlag. Xamuyees has tas, “Cov nqaj nuav yog kuv tseg rua koj. Koj ca le noj. Cov nqaj nuav tseg rua koj noj thaus lub sijhawm nuav, nrug cov qhua kws kuv caw tuaj.” Yog le nub ntawd, Xa-ules txhaj nrug Xamuyees noj mov ua ke.

²⁵Thaus puab rov ntawm qhov chaw pehawm Vaajtswv lug txug rua huv lub nroog, puab khu chaw rua Xa-ules pw txheej tsev sau,

²⁶hab nwg txawm moog pw sau. Thaus kaaj ntug, Xamuyees hu Xa-ules kws pw txheej sau has tas, “Ca le sawv, kuv yuav xaa koj rov moog tsev.” Xa-ules sawv hab nrug Xamuyees tawm moog rua tom kev.

²⁷Thaus puab moog txug ntawm ntug nroog, Xamuyees has rua Xa-ules has tas, “Koj kuas tug tubkhai moog ua wb ntej.” Thaus tug tubkhai moog lawm, Xamuyees has tas, “Wb nyob ntawm nuav ib plag tsaiv, kuv yuav qha rua koj has tas, Vaajtswv has le caag rua kuv.”