Read icen AMatiyu 10 Bible Online

AMatiyu 10 - icen bible

AMatiyu 10

¹AYeso yes bafi imɛɛs wu kusɔk abe afaa, a ka ba nɔɔk ice iturung áduk ábik ni irɔm banet, ni ites banet fɛ́ ba bɔrɔng ni nrɔk zizɛɛt nɛ bafi isɔ izot kyang.

²AYerek batom kusɔk abe afaa me na: Afi imɛsɛng e, aSiman, fɛ́ ba ku yes aBitrus, nɛ arunyining Andarawus; AYakubu arim aZebedi, nɛ aYohana arunyining aYakubu e,

³aFilibus, nɛ aBatalomi; aToma, nɛ aMatiyu anet ishashang itsɔm mben; aYakubu arim Alfayus, nɛ aTadiyus,

⁴aSiman afi iwɔp aKanan, nɛ aJudas aIskariyoti ayɔng fɛ́ a rɛp aYeso.

⁵AYeso tom kusɔk abe afaa me, a ka ba nye igbat ifɛ̀ yɛ: “Da i bi tse yin narɔ bayɔng fɛ́ da ba yet baYahuda awo, ke ni tse yin ni nwɔp bafɛ́ aSamariya awo.

⁶Tit sak ni ítsamang aIsrela fi i mi wɛs kyɛk.

⁷Izen fi i tse yin, shara yin ifɛ̀ deng: ‘Igwɔm azanɛn mi bɛ́ bakat.’

⁸Tes yin bafi nrɔk kyang, ni doro yin nkom banet, ni tes yin bakparong kyang, ni turung yin itseng nɛ banet. Ninang fɛ́ ba ki nɔɔk yin, ninang fi i da nesek yin.

⁹Da i bi bereng yin itsɔm na baya kudun awo, ke ifi itsɔm ata asɛng, ke afi itsɔm ata akan, ke afi itsɔm ata agigɛl awo,

¹⁰i bi bereng yin amala nek kutseet e awo, ke kukpin kukak, ke akpatak, ke agbanding awo. Nek i se kpaf, anet itomong na a sɛ itarang kudaam wu.

¹¹“Kaakyɛ kuwɔp ke kaban wɔp fi i di nɔ yin, tsɛt yin anet atek, sonong yin ari wu, sak izen fi i bi di tseng yin.

¹²Ki i nɔ yin ari me, ni i ka ba te yin ashow.

¹³Ke banet ari me yet batek, won i te ashow kukyang yin di nak ni ba. Kɛ banet ari me yet baduk e, won ite ashow yin ni ibun ni yin.

¹⁴Kɛ akak rawu dang ki shan yin, ke a rawu dang wes ato ni ifɛ̀ yin, ni zuut yin kabung akpatak yin[8] ni izen fi i da wuruk yin ari me, ke kuwɔp e ayi.

¹⁵Won in ki tak yin atsak, in bi dung fok angmishish banet aSodom, nɛ aGomora, aza banet iwɔp yɔng atuk fɛ́ Adakunom bi ra ishɔt.

¹⁶Imi tsin ki tom yin ti ítsamang ayɛt agbayɔrɔ. Nek anɔng, sot yin tsɛngtsɛng ti íhwyen ni bɛ̀ yin nhwyɛ tɛ ábɔp.

¹⁷“Nye yin yɛɛt na banet, nek ba bi ki nabak yin ashon banet ishɔt, ba bi ki tsosok yin narɔ inyis baYahuda.

¹⁸Nek imi, ba bi ki kɔk yin sak ashon bagwɔmna nɛ ashon bágwɔm, nɔng i da sot nanu ifɛ̀ sak na bafi nhwyi.

¹⁹Awɛt izen fɛ́ ba bi ki tekap yin, i bi daam yin naton ikyɛng fi i bi fɛ̀ yin awo, ni kuri irèn fi i bi di fɛrɛng yin awo. Ni izen e yɔng, ba bi ki nɔɔk yin ikyɛng ifɛ̀.

²⁰Nek a bi yet iyin ba i bi cɛɛt yin awo, a yet Kabik Ada yin wu ka bi cɛɛt ayɛt yin.

²¹“Arunyining bi rep arunyining, na ba ku fɛt, ada bi nye ni nggon wu kpaf anɔng, nnon bi doro fulul sak nɛ batek, ni binggɔ bá, ba bi sak ba ka ba fɛɛs.

²²Banet kusum bi ki rayin nek imi, awɛt ayɔng fɛ́ a nyeseng nɛ agap sak ni igang e, ba bi ku sheshek.

²³Izen fɛ́ ba ki nɔɔk yin iyɔm ni wɔp ku ka, ni teng yin sak ni ku ya. Won in ki tak yin atsak, i bi tsang gang yin igoroso nwɔp mben aIsrela ninyen awo, Arim Anet bi tsang bɛ́s wu.

²⁴“Nggon imɛɛs kyem ka wat anet itees ka awo, ke asam na a wat atekari wu awo.

²⁵Won nggon imɛɛs na ka tas anet itees ka, asam na a se tɛ atekari wu. Kɛ ba mi yes atekari me aBɛɛlzɛbul[9], ba da yes nnon ari me na akyɛ kuri iyerek ɛ?”

²⁶Nek anɔng, i bi fok yin nnyim ba awo. Vit ikyɛng fi i se ni ifaam fɛ́ da ba bi rēn ide awo, ke idɔng fi i se ni nɛt fɛ́ da ba bi di ide awo.

²⁷Ikyɛng fi in ki mang ki tak yin natuk, cɛɛt yin ide ni nom, idɔng fi in kin ki tak yin ni nɛt, cɛɛt ide weshek.

²⁸Da i bi fok yin nnyim bayɔng fɛ́ ba fɛɛs kurɔm awɛt vit iba ni kukyem isok kutset awo. Ningya, fok nnyim ayɔng fɛ́ a da kyem na wey kutset ni kurɔm ari irong.

²⁹Ba rɛs naban abɔp nafaa nanu abɔk azining[10] awɛ? Ngma nɛ anɔng, vit kazining ayɛt na fɛ́ ka da kpa aben, ke da ada yin shim awo.

³⁰Ngma akwoy ice yin ba mi fa ina.

³¹Nek anɔng, i bi fok yin nnyim awo, iyin wat yin nanon dot ni iratek.

³²Kaangan fɛ́ a tonong ice wu weshek ashon banet, fok iwu yet anaan, imi bi ku tonong weshek ashon Ada min fɛ́ a se azanɛn.

³³Awɛt ayɔng fɛ́ a toon ashon banet, fok da iwu di rēn awo, imi bi ku toon ashon Ada min fɛ́ a se azanɛn, fok da imi ku irēn awo.

³⁴I bi yiring yin ti imi bɛ́ ni kusonong kukyang azatse awo. Imi bɛ́ nek kusonong kukyang awo, tit awal.

³⁵Nek imi bɛ́ “ ‘ni in tirik nggon nɛ ada ka, angas nɛ anyining, akugon nɛ anekop.

³⁶Banet ari anet, bi yet bafi ifa ni iwu.’

³⁷“Ngma ayɔng fɛ́ a dung shim atek ke anyining ayi aza hom, a kyem na a sot anaan awo; ngma ayɔng fɛ́ a dung shim ari wu ke angas ayi aza hom, a kyem na a sot anaan awo.

³⁸Kaakye anet fɛ́ da a sok kukum itegak wu, a di kuus mo awo, a kyem na a sot anaan awo.

³⁹Kaakyɛ anet fɛ́ a shim a sɛ kutset wu, a da bit iko. Kaakyɛ anet fɛ́ a nɔɔk nwaa kutset wu nek imi, a bi sɛ iko.

⁴⁰“Ngma ayɔng fɛ́ a ki shan yin, imi wu a di shan. Ngma ayɔng fɛ́ a di shan, a shan ayɔng fɛ́ a di tom.

⁴¹Ngma ayɔng fɛ́ a shan atan nek iwu yet atan, a da sɛ izang atan e. Ngma ayɔng fɛ́ a shan anet nnyim Adakunom, nek iwu yet anet nnyim Adakunom, a da sɛ izang anet nnyim Adakunom.

⁴²Kɛ akak nɔɔk ayɔng fɛ́ a dung yet awosong ayɛt bafi ikuus hom ashi isɔ kyang, nek a yet afi ikuus hom, won in ki tak yin atsak, a da bit izang wu awo.”