Read icen AMatiyu 12 Bible Online

AMatiyu 12 - icen bible

AMatiyu 12

¹Ni izen e yɔng, aYeso kin se ni igot abak akɔ alikama. Atuk e yɔng kin yet kunom aSabat. Bafi imɛɛs wu kin fok nzong, wat ba kpa hwyii ace alikama na ba ya.

²Fɛ́ BaFarasi di anɔng, ba fɛ̀ na aYeso, “Di, bafi imɛɛs ngɔn, ba se ni inye ikyɛng fi ntsi yit ro ni ira me atuk aSabat.”

³AYeso ka ba bun ni ifɛ̀ yɛ, “Iyin man fa yin ikyɛng fɛ́ agbat agwɔm aDauda, kin nye ni izen fi iwu nɛ bafi itseet wu kin fok nzong awɛ?

⁴Fɛ́ a kin tsɛ a nɔ ni kutɔmɔng Adakunom, a ya akpam ntsi Adakunom, a da tɛ kaba bafi itseet wu ne, ikyɛng fi ntsi yit ro ni iya me tit áware kyɛk.

⁵Ke iyin ki mang fa yin afumung fɛ́ aMusa jɛk awɛ? Fɛ́ kaakye kunom aSabat, áware ni itu iya Adakunom ntong beseng kunom aSabat, ngma nɛ anɔng, da ba nye inɛn awo.

⁶Won in ki tak yin, akak di se azeng fɛ́ a wat kutu iya Adakunom ntong e ni iratek.

⁷Ki i fi rēn yin ikyɛng fi ifɛ̀ deng fɛ̀, ‘Imi tsɛɛt angmishish aza inabak-akuce,’ ki i mɔɔt yin bayɔng fɛ́ ba se vit inɛn awo.

⁸Nek Arim Anet wu a yet aTisa aSabat.”

⁹AYeso won karɔ fɛ́ a di se, a tsɛ a nɔ narɔ inyis baYahuda.

¹⁰Anet akak se azɔng fi kubɔk wu mi sɔrɔk. Banet bakak azɔng tsɛt irèn fɛ́ ba di ki sɛ aYeso ni inɛn, ba ku rip, “Ntsi yit fɛ̀ na ba te anet kyang atuk aSabat ɛ?”

¹¹AYeso fɛ̀ ni iba, “Won in fɛ̀ yit, akak ayɛt yin itsamang wu azining kpa ni ibong atuk aSabat. Anet e, da nabak kubɔk, a di tun iye awɛ?

¹²Anet wat itsamang ni iratek! Nek anɔng, ntsi fɛ̀ na ba nye ikyɛng itek atuk aSabat.”

¹³A fɛ̀ na anet e, “Nabak kubɔk ngɔn.” Wat anet e, nabak iko, kubɔk e wat ku te kyang kpaf ti kuzining e.

¹⁴Wat BaFarasi wuruk amatse, ba kpa tɔ irèn fɛ́ ba di ki wey na aYeso.

¹⁵Nek aYeso rēn ikyɛng fɛ́ BaFarasi se ne, a won karɔ me yɔng. Banet dot ku kuus mo, a ka ba te kyang ngma bá.

¹⁶A ka ba kɔrɔk kuto yɛ da na ba tak akak, fok iwu yet angan awo.

¹⁷A nye anɔng, nɔng ba bin di shining ikyɛng fɛ́ atan aIshaya kin fɛ̀,

¹⁸“Di yin, asam hom yong, fi in mi ku myak, ayɔng fi imi shim, in bi iyɛ ikan nek iwu; Imi da te Kabik hom naton wu, a bi shara ifɛ̀ ishɔt atsak, sak ngma ni mben azatse.

¹⁹A bi yet anet itsɛt ifa awo, ke afi shim iwɔng awo, ba bi fok kutɔ wu naton irèn awo.

²⁰A bi but agam fɛ́ ngmash na a but awo. A bi fɛt kudun agaramun fɛ́ a bɛ́ bakat iku awo, tit a bi sak ishɔt atsak ni iya kashon.

²¹Bafi nhwyi ngma kusum bi te iyɛ ni wu.”

²²Ama anɔng, banet bakak tse na akpey akpatɔn akak fɛ́ a bi itseng, ba tse ni wu narɔ aYeso. AYeso ku te kyang, a kpa cɛɛt, na yɛrɛ gyat.

²³Ngma banet fɛ́ ba se azɔng ayɔɔt ka ba yit, wɛt ba fɛ̀, “In fɛ̀ kɛ, Arim agwɔm aDauda yong awɛ?”

²⁴Ni izen fɛ́ BaFarasi fok anɔng, ba fɛ̀, “A yet aBɛɛlzɛbul, agwɔm itseng wu, a nesek anet yong agap fɛ́ a di turung itseng!”

²⁵AYeso rēn kuyiring bá, a fɛ̀ ni iba, “Kaakyi igwɔm fi i kaba ice de asa afaa, ni ira itsom ni ice de, igwɔm e, da kyem i nyeseng awo. Kaakyi kuwɔp ke kari fɛ́ banet e kana kaba nek ifà, ba da kyem ba ya kashon awo.

²⁶Kɛ aShetan da tɛ a kpa turung aShetan, idɔng tonong, a se ni itsom ni ice wu. Na anɛ fi igwɔm wu da nyeseng ɛ?

²⁷Ki imi turung itseng ni kukyem aBɛɛlzɛbul, wɛt nnon yin anɛ? Na agap angan fi ina di turung ɛ? Won ikyɛng fɛ́ ba kin ra, ide fi itonong fok iyin i mi dun yin.

²⁸Awɛt ki imi turung itseng na Kabik Adakunom, idɔng tonong fok, Adakunom mi kpa iya igwɔm nate yin.

²⁹“Vit anet fɛ́ a kyem na a nɔ ari anet agap, na kok ikyɛng fɛ́ a bɛ̀, ma a tun rosom anet agap e ninyɛn, ama anɔng, na nɛ na kok nkyɔrɔk e.

³⁰“Kaakyɛ anet fɛ́ da a yet anaan awo, a se ni idi ramin. Ayɔng fɛ́ da a di ses mo itusung e awo, a se ni isharatat e.

³¹Nek anɔng, won in ki tak yin, Adakunom bi fuut banet kaakyi kuri inɛn ni tonong ibyes fɛ́ ba ras, awɛt ayɔng fɛ́ a tonong ibyes naton Kabik aJɛrɛ, ba bi ku fuut e awo.

³²Ke akak tonong ibyes naton Arim Anet, ba bi ku fuut e, awɛt ayɔng fɛ́ a tonong ibyes naton Kabik aJɛrɛ, ba bi ku fuut e awo, nkum yɔkɔnɔng sak na ayɛ fɛ a bi bɛ̀.

³³“Kakon fɛ́ ka yet katek, ka tes ica itek. Kakon fɛ́ ka yet kamaan e, ka tes ica imaan e bà. Nek ba rēn kakon ni kuri ica fɛ́ ka tes.

³⁴Iyin fi i yet yin nnon ámazɛrɛ! Na anɛ fi iyin ámaan ánet, da kyem i nye yin kucɛɛt kutek ɛ? Nek ikyɛng fi i se ayɛt iyɛ anet, ide fi iwuru na nu anet e.

³⁵Anet atek, nyes nkyɔrɔk ntek fi in nes narɔ fɛ́ a di tusung ni iyɛ wu, awɛt amaan anet ras nkyɔrɔk nmaane e fi in nes narɔ fɛ́ a di tusung ina ni iyɛ wu bà.

³⁶Won in ki tak yin, kaangan bi tsɛ a tak atuk ishɔt igang azatse, kaaki kuri kucɛɛt kukpɛɛ me, fɛ́ a mang cɛɛt iko.

³⁷Nek kucɛɛt ngɔn da ka kusu ke ku da ka rosom ayi.”

³⁸Wat bakak ayɛt bafi itees ntsi aMusa nɛ BaFarasi fɛ̀ na aYeso, “Anet itees, iyit shim in di yit ikyɛng idi ifɛ́ abes ni ngɔn.”

³⁹Wat aYeso fɛ̀ ni ba yɛ, “Banet nnu nang yet ámaane, ba raba ikuus Adakunom, ba shim fok ma ba ka ba tonong ikyɛng idi abes. Vit ikyɛng idi ikak fɛ́ ba da tɛ ba ka ba tonong fi iwɛt ifɛ́ atan aYunana.

⁴⁰Kpaf kyɔn tɛ fɛ́ aYunana kin sot nkɔs ntaat, kunom nɛ katuk, ayɛt afaa anyin ìzos, anɔng wu, fɛ Arim Anet bi nye nkɔs ntaat, kunom nɛ katuk ayɛt mben.

⁴¹Atuk ishɔt igang azatse, banet aNineve bi dorok tsik nɛ banet nnu nang, ba bi te kukun ba, nek banet aNineve me kin wosong anɛn bá ama fɛ́ bá fok ishara ifɛ̀ Adakunom na nu aYunana. Di yin ayɔng fɛ́ a wat aYunana ni iratek azeng.

⁴²Atuk ishɔt igang azatse, azɛnɛ mben aSheba bi dorok tsik nɛ banet nnu nang, a bi te kukun ba, nek iwu kin ne narɔ kayik-yik, a tsɛ a fok ifɛ̀ kutsitsɛng kutsik-tsik na nu agwɔm aSolomon. Di yin ayɔng fɛ́ a wat aSolomon azeng.

⁴³“Izen fi itseng wuruk ayɛt anet, i da teng i kat na narɔ na koot ni itsɛsɛk karɔ ifɔn, ke da i tsi i sɛ karɔ awo.

⁴⁴Ni fɛ̀ ni ice de, ‘In da tin bun ari hom fi in tsang di se.’ Izen fi bi ta, i bi sɛ karɔ me mo kakoot, ni iyɛs ni i nye ika yɛɛt.

⁴⁵Ni ti bun, ni tsi ni sok itseng ikak kanakataat fi i ki de wat nɛ anyas, ni i tsi i nɔ, ni i sot azɔng. Ama me, ni nse anet e, wat nfi imɛsɛng e ni imaan e. Ikyɛng fi i bi te nɛ ánet nnu nang dɔng.”

⁴⁶Ni izen fɛ́ aYeso rēn tsin cɛɛt nɛ banet, nggɔ wu nɛ barunyining se amatse, ba shim ke ba fɛrɛng ni iwu.

⁴⁷Nek anɔng, akak tsɛ a fɛ̀ ni iwu, “Di nggɔ ngɔn nɛ barunyining ngɔn yɔng amatse, ba shim ke ba fɛrɛng ni ngɔn.”[11]

⁴⁸AYeso fɛ̀ nɛ anet e yɛ, “Angan wu fɛ́ a yet nggɔ min ɛ? Bangan ba ba yet baruneng ɛ?”

⁴⁹Wat a di nabak kubɔk nɛ bafi imɛɛs wu, a fɛ̀, “Di nggɔ min nɛ baruneng ba!

⁵⁰Kaangan fɛ́ a ras ikyɛng fɛ́ Ada hom naton aza shim, iwu wu fɛ́ a yet aruneng nɛ anganeng ni nggɔ hom.”